Etomọṣo, Jehovah nọ donukun dọ mí ni yí homẹfa do nọtepọn emi nado yinuwa to ojlẹ dide emitọn mẹ. Naegbọn e do nọ donukun dọ mí ni wàmọ? Etẹwẹ sọgan gọalọna mí nado yin ayajẹnọ dile mí to ote?

NAEGBỌN JEHOVAH NỌ JLO DỌ MÍ NI NỌTE?

Biblu dọ dọ: “Jehovah yí homẹfa do to tenọpọn mì nado do nukundagbe hia mì, ewọ nasọ fọnṣite nado do lẹblanu hia mì. Na Jiwheyẹwhe whẹdida dodo tọn de wẹ Jehovah yin. Ayajẹnọ wẹ mẹhe to nukundo e zọnmii lẹpo.” (Isa. 30:18) Juvi atẹṣitọ lẹ wẹ hogbe Isaia tọn ehelẹ yin didọna to tintan whenu. (Isa. 30:1) Amọ́ nugbonọ delẹ tin to Juvi lọ lẹ mẹ, podọ hogbe ehelẹ na yé todido. Hogbe ehelẹ dopolọ nọ na todido sinsẹ̀n-basitọ nugbonọ Jehovah tọn lẹ to egbehe ga.

Enẹwutu, mí dona nọ yí homẹfa do nọte, na Jehovah lọsu yí homẹfa do to tenọ wutu. E tindo ojlẹ dide de whenue e na hẹn titonu ehe wá vivọnu, podọ e to tenọpọn dọ azán enẹ po gànmẹ enẹ po ni wá. (Mat. 24:36) To ojlẹ enẹ mẹ, e na họnwun gblegede dọ owhẹ̀ he Lẹgba sadokọna Jehovah po mẹhe nọ sẹ̀n Ẹn lẹ po yin lalo. To whenẹnu, e na de Satani po mẹdepope he tin to adà etọn mẹ po sẹ̀, amọ́ Ewọ na “do lẹblanu hia [mí].”

Kakajẹ whenẹnu, Jehovah gán nọma de whlepọn mítọn lẹ sẹ̀, amọ́ e hẹn mí deji dọ mí gán tindo ayajẹ dile mí to ote. Dile Isaia dọ do, mí gán tindo ayajẹ dile mí yí jejejininọ do to tenọpọn kavi to nukundo nudagbe de nado jọ. (Isa. 30:18) a Nawẹ mí gán mọ ayajẹ mọnkọ gbọn? Afọdide ẹnẹ delẹ gán gọalọna mí.

LEHE MÍ GÁN DO AYAJẸ DO DILE MÍ TO OTE

Nọ ze ayiha do nudagbe lẹ ji. Ahọlu Davidi mọ kanyinylan susu to gbẹzan etọn mẹ. (Salm. 37:35) Amọ́, e wlan dọmọ: “Nọ whii to Jehovah nukọn bo nọtepọn ẹn po todido po. A jẹflumẹ, na dawe ayiha gigẹdẹnọ lọ he to kọdetọn dagbe tindo wutu blo.” (Salm. 37:7) Davidi lọsu hẹn ayinamẹ ehelẹ do ahun mẹ bo ze ayiha etọn do opagbe Jehovah tọn nado whlẹn ẹn gán ji. E sọ na ayidonugo  dona he e mọyi sọn Jehovah dè lẹpo. (Salm. 40:5) Eyin mílọsu lẹ nọ ze ayiha do adà dagbe ninọmẹ mítọn tọn lẹ ji bọ e ma yin do nuylankan he to jijọ lẹdo mí pé lẹ ji, e na bọawuna mí dogọ nado nọtepọn Jehovah.

Nọ yí dotẹnmẹ hundote lẹpo zan nado pà Jehovah. Mẹhe kàn Salmu 71​tọ, vlavo Davidi dọna Jehovah dọmọ: “Yẹn na to tepọn we zọnmii; yẹn na nọ yidogọna pipà towe.” (Salm. 71:14) Nawẹ e na pà Jehovah gbọn? E nọ dọhona mẹdevo lẹ gando Jehovah go, bosọ nọ jihàn pipà tọn lẹ hlan ẹn. (Salm. 71:16, 23) Taidi Davidi, mí gán do ayajẹ dile mí to tenọpọn Jehovah. Mí nọ pà ẹ whenue mí dekunnuna mẹdevo lẹ, dọho etọn na họntọn po whẹndo mítọn po, podọ whenue mí jì ohàn sinsẹ̀n-bibasi tọn mítọn lẹ. To whedevonu he a jì ohàn Ahọluduta lọ tọn de, naegbọn a ma na na ayidonugo sọwhiwhe tọn owẹ̀n mẹjlọdote tọn he e bẹhẹn?

Nọ mọ tuli yí sọn mẹmẹsunnu po mẹmẹyọnnu towe lẹ po dè. To whenue Davidi pehẹ avùnnukundiọsọmẹnu lẹ, e dọna Jehovah dọmọ: “To nugbonọ towe lẹ nukọn, yẹn na ze todido ṣie do oyín towe mẹ.” (Salm. 52:9) Mílọsu lẹ gán mọ tuli yí sọn sinsẹ̀n-basitọ hatọ nugbonọ lẹ dè, e ma yin to opli mítọn lẹ ji podọ to lizọnyizọn lọ mẹ kẹdẹ gba, amọ́ to nuwiwa pọmẹ tọn lẹ whenu ga.—Lom. 1:11, 12.

Nọ hẹn todido towe lodo. Salmu lẹ 62:5 dọmọ: “Yẹn na nọte whii pọ́n Jiwheyẹwhe, na ewọ mẹ wẹ todido ṣie te.” Todido he dolido nọ bẹ nukundido dejidego hẹn, yèdọ nuhe sin hudo mí do taun, titengbe eyin opodo lọ ma yawu wá dile mí lẹn do. Mí dona kudeji dọ opagbe Jehovah tọn lẹ na mọ hẹndi mahopọnna ojlẹ nẹmu he mí dona nọtepọn yé na. Mí gán hẹn todido mítọn lodo eyin mí nọ plọn Ohó Jiwheyẹwhe tọn, enẹ wẹ dọdai lẹ, lehe nuhe Biblu-kantọ lẹ kàn lẹ sọgbe hẹ yede do gọna nudọnamẹ he Jehovah dehia gando ede go lẹ. (Salm. 1:2, 3) Podọ, mí dona zindonukọn nado nọ “hodẹ̀ to gbigbọ wiwe mẹ” nado sọgan hẹn haṣinṣan dagbe mítọn hẹ Jehovah go dile mí to tenọpọn opagbe ogbẹ̀ madopodo tọn etọn nado mọ hẹndi.—Juda 20, 21.

Taidi Ahọlu Davidi, kudeji dọ nukun Jehovah tọn tin to mẹhe nọ nọtepọn Ẹn lẹ ji, podọ E nọ do owanyi nugbo Etọn hia yé. (Salm. 33:18, 22) Zindonukọn nado nọ yí homẹfa do nọtepọn Jehovah, bo nọ ze ayiha do nudagbe lẹ ji, nọ pà ewọ bo nọ mọ tuli yí sọn Kunnudetọ hatọ lẹ dè, bosọ to todido họakuẹ towe hẹn lodo zọnmii.