Bobola, Yehova alonzeze rhulindire omu kulembera okw’anajira echakola omu kasanzi ahebereho. Bulagurhe alonzeze rhujire ntyo? Bichi byakarhurhabala rhugwarhe obusime amango rhuli rhwagenderera kulindira?

BULAGURHE YEHOVA ALONZEZE RHULINDIRE?

Ebiblia ederhere ntya: “Yehova ali alindira omu kulembera y’abayereka olukogo, anayumanga omu kubayereka obubabale. Yehova aba Mungu we haki. Abagwerhe obusime bali balala boshi bagenderere ku mulingiriza.” (Isa. 30:18) Ebyola binwa bya Isaya byaliri by’aderhera oku Bayahudi baliri bigamba. (Isa. 30:1) Aliko haliri Bayahudi baguma baliri bemana, n’ebyola binwa byalibahere obulangalire. Ebyola binwa byen’ebyo bihereze abakozi b’emana ba Yehova obulangalire zene.

Bobola, rhukwanene kulindira omu kulembera bulala Yehova naye y’ajira ntyo. Ahebere h’akasanzi nj’alerha obuzinda bwalinola gulu, anali alinga gurhe olola lusiku n’esa byahika. (Mt. 24:36) Mw’agola mango nji byabonekana bwinja bwinja oku byoshi Ibilisi aderhere eju ya Yehova n’abalala banamukolera bili by’obubeshi. N’aho nj’alimbula Shetani na balala boshi bali oku lunda lwage, aliko “[rhwewe] nj’arhuyereka olukogo.”

Omu kulingiriza, nkabaga Yehova arharhukulira ebigeregezo byerhu, aliko arhurhabere rhuchizere oku rhwakagwarha obusime omu kulindira. Nk’oku Isaya aderhere, rhwakagwarha obusime amango rhuli rhwalingiriza n’enyorha. (Isa. 30:18) a Gurhe rhwakagwarha obola busime? Bintu 4 byakarhurhabala.

OKUNTU RHWAKAGWARHA OBUSIME AMANGO RHULI RHWALINGIRIZA

Owaze oku bintu binja by’akuhikire omu kalamo. Mwami Daudi aligwerhe bintu binene bibi aliri alwisa omu kalamo kage. (Zb. 37:35) Aliko, aliyandikire ntya: “Oyorhe osirire embere za Yehova onamulindire omu kulola bichi akujirira. Omenye wakagaya eju y’omuntu wahikire emihigo yage mibi.” (Zb. 37:7) Daudi yewe yenyine alikoleseze elyola hano amango aliri alingiriza ebilagane bya Yehova by’okumuyokola. Kandi aligwerhe eshukrani oku bintu byoshi Yehova alimujirire. (Zb. 40:5) Amango nerhu rhwamaseza obwenge bwerhu oku  bintu binja ahali h’okuchiseza oku bintu bibi rhuli rhwahurana omu kalamo, rhwabona oku biyorohere kulingiriza Yehova.

Ogwarhe binene by’okukola omu kusingiza Yehova. Bishushire ok’omwandisi we Zaburi ya 71, Daudi alibwirire Yehova ntya: “Nagenderera kulingiriza; nashuba kukusingiza kandi bwenene.” (Zb. 71:14) Gurhe wakasingiza Yehova? Daudi agendaga abwira abandi oku bilolere Yehova n’oku muyimpira enyimpo z’okumusingiza. (Zb. 71:16, 23) Kuguma na Daudi, nerhu rhwakapata obusime amango rhuli rhwagenderera kulingiriza Yehova. Rhunasingiza Yehova amango rhuli rhwahubiri abandi, bera-berhu n’abantu b’omulala, n’okuyimpa enyimpo zerhu. Amandi mango nji wayimpa luguma omu nyimpo zerhu z’Obwami, bulagurhe orhakachiseza oku burhumwa bulimo buhumire oku murhima?

Oleke bene-benyu na bali-benyu bakuhebe omurhima. Amango Daudi aliri ahurana ebigeregezo, alibwirire Yehova ntya: “Embere z’abemana bawe, nachizera ezino lyawe.” (Zb. 52:9) Nerhu rhwakahebwa omurhima amango rhuli haguma na bene-berhu na bali-berhu, arhali oku mbuganano zerhu n’omu kasi k’amahubiri konyine, s’aliko n’amango rhuli rhwageza ebisanzi haguma omu kuchisimisa.—Ro. 1:11, 12.

Okomeze obulangalire bwawe. Zaburi ya 62:5 ederhere ntya: “Indi nalingiriza Mungu bwisirire bulala obulangalire bwani burhengere emwage.” Bili by’akamaro bwenene okugwarha obulangalire bukomere, ahanene amango obuzinda burhayinjire omu kasanzi rhwaliwazize oku bwahika. Rhukwanene kuchizera oku ebilagane bya Yehova byayenera, chiro byamala bisanzi bingana gurhe, rhukwanene kubilingiriza. Rhwakakomeza obulangalire bwerhu omu kuyiga Echinwa cha Mungu. Omufano, owaze oku bintu byoshi Ebiblia yalilebere byayenere, gurhe amawazo m’abandisi be Biblia balengene mapatene, n’oku byoshi Yehova abishwire oku bimulolere. (Zb. 1:2, 3) Kandi, birhuhemere rhugenderere “kuhema eroho lichesibwa” yilirhurhabala kulanga obwira bwerhu haguma na Yehova oku rhunali rhwalindira echilagane ch’akalamo k’esiku n’amango chayenera.—Yud. 20, 21.

Kuguma n’Omwami Daudi, rhwakachizera oku Yehova alanga boshi bali bamulindira anagenderera kubayereka obuzigire bwage bwimana. (Zb. 33:18, 22) Rhugenderere kulindira Yehova omu kulembera, okugenderera kuchiseza oku bintu binja omu kalamo kerhu, kugenderera kumusingiza, kuhebwa omurhima n’aberhu Bakristu, n’omukugenderera kulanga obulangalire bwerhu bw’akachiro buyorhe bukomere.