Pero, gusto ni Jehova nga mangin mapinasensiahon kita samtang ginahulat naton ang iya gintalana nga tion. Ngaa gusto niya nga maghulat kita? Ano ang makabulig sa aton nga mangin malipayon samtang nagahulat kita?

NGAA GUSTO NI JEHOVA NGA MAGHULAT KITA?

Ang Biblia nagasiling: “Si Jehova nagahulat sing mapailubon agod pakitaan kamo sing kahamuot, kag magatindog sia agod pakitaan kamo sing kaluoy. Kay si Jehova Dios sang hustisya. Malipayon ang tanan nga padayon nga nagalaum sa iya.” (Isa. 30:18) Ginsiling ini ni Isaias para palig-unon ang batinggilan nga mga Judiyo. (Isa. 30:1) Pero may matutom man nga mga Judiyo, kag nakahatag sa ila sang paglaum ang iya ginsiling. Subong, nagahatag gihapon ini sang paglaum sa matutom nga mga alagad ni Jehova.

Gani dapat kita maghulat sing mapinasensiahon kay nagahulat man sing mapinasensiahon si Jehova. May gintalana sia nga adlaw kag oras kon san-o niya tapuson ini nga sistema, kag ginahulat niya ina nga tion. (Mat. 24:36) Sa sina nga tion, mangin maathag nga indi matuod ang ginsiling sang Yawa parte kay Jehova kag sa mga nagaalagad sa Iya. Dayon laglagon niya si Satanas kag ang tanan nga nagadampig kay Satanas, pero ‘pakitaan Niya kita sing kaluoy.’

Samtang wala pa ina nga tion, posible nga indi pagdulaon ni Jehova ang aton mga problema. Pero, nagapasalig sia nga puede kita mangin malipayon samtang nagahulat kita. Suno kay Isaias, puede kita mangin malipayon samtang ginahulat naton ang maayo nga palaabuton. (Isa. 30:18) a Paano kita mangin malipayon? Ari ang apat nga makabulig sa aton.

KON PAANO KITA MANGIN MALIPAYON SAMTANG NAGAHULAT

Magpokus sa positibo. Madamo nga kalainan ang nakita ni Hari David sa bilog niya nga kabuhi. (Sal. 37:35) Pero, nagsulat sia: “Magpakalinong ka sa atubangan ni Jehova kag hulata sia nga may kalangkag. Indi ka magkaakig sa tawo nga nagamadinalag-on sa iya mga padihot.” (Sal. 37:7) Gin-aplikar ini ni David kay nagpokus sia  sa promisa ni Jehova nga luwason Niya sia. Ginpasalamatan man niya ang tanan nga pagpakamaayo nga nabaton niya halin kay Jehova. (Sal. 40:5) Kon magpokus man kita sa mga maayo nga nagakatabo sa aton kabuhi imbes nga sa mga problema, mangin mas mahapos ang paghulat kay Jehova.

Dayawa pirme si Jehova. Amo ini ang ginsiling sang manunulat sang Salmo 71 kay Jehova: “Padayon ako nga magahulat sa imo; dayawon ko ikaw sing labi pa.” (Sal. 71:14) Posible gid nga si David ang nagsulat sini. Paano niya gindayaw si Jehova? Ginsugid niya sa iban ang parte kay Jehova kag nagkanta sia sing mga pagdayaw sa iya. (Sal. 71:​16, 23) Pareho kay David, puede kita mangin malipayon samtang ginahulat naton si Jehova. Madayaw naton sia kon nagabantala kita sa mga tawo, kon ginasugid naton sa aton mga abyan kag pamilya ang parte sa iya, kag kon nagakanta kita sang aton mga ambahanon sa pagsimba. Gani sa kada tion nga ginakanta mo ang aton mga ambahanon, pamalandungi ang lyrics sini kon paano ini makahatag sa imo sing kalipay.

Makig-upod sa imo mga kauturan para mapalig-on ka. Sang nakaeksperiensia si David sang mga kabudlayan, nagsiling sia kay Jehova: “Sa atubangan sang imo mainunungon nga katawhan, magasalig ako sa imo ngalan.” (Sal. 52:9) Mapalig-on man kita paagi sa pag-upod sa aton mga kauturan sa aton mga miting, sa aton pagbantala kag pagtudlo nga hilikuton, kag bisan sa aton mga tipontipon.​—Roma 1:​11, 12.

Pabakura ang imo pagsalig sa imo paglaum. Ang Salmo 62:5 nagasiling: “Sa Dios lang ako nagahulat sing mapailubon kay sia ang akon paglaum.” Importante gid nga mabakod ang aton pagsalig sa aton paglaum ilabi na kon pamatyag naton daw kadugay mag-abot sang katapusan. Dapat kumbinsido kita nga matuman gid ang mga promisa ni Jehova bisan pa nga kinahanglan naton maghulat. Mapabakod naton ang aton pagsalig sa aton paglaum paagi sa pagtuon sa Pulong sang Dios. Halimbawa, tun-an naton kon paano natuman ang mga tagna, kon paano nagasantuanay ang mga sinulatan sang sarisari nga mga manunulat sang Biblia, kag kon ano ang mga ginsiling ni Jehova parte sa iya kaugalingon. (Sal. 1:​2, 3) Kag samtang ginahulat naton ang tion nga tumanon na ni Jehova ang iya promisa nga hatagan kita sing kabuhi nga wala sing katapusan, dapat naton padayon nga ‘ipangamuyo ang pagtuytoy sang balaan nga espiritu’ para buligan kita nga mangin mabakod pirme ang aton kaangtanan sa iya.​—Jud. 20, 21.

Pareho kay Hari David, dapat kita magsalig nga ginabantayan ni Jehova ang mga nagahulat sa Iya kag ginapakitaan Niya sila sang Iya mainunungon nga gugma. (Sal. 33:​18, 22) Gani padayon kita nga maghulat sing mapinasensiahon kay Jehova paagi sa pagpokus sa positibo, paagi sa pagdayaw sa iya, paagi sa pag-upod sa aton mga kauturan para mapalig-on kita, kag paagi sa pagpabakod sang aton pagsalig sa aton paglaum.