Jehovah udah netapka maya alai Iya deka betindak. Tang, Iya ngarapka kitai nganti enggau sabar sebedau maya nya datai. Nama kebuah Iya ngarapka kitai nganti enggau sabar? Nama ulih nulung kitai terus gaga ati seraya nganti?

NAMA KEBUAH JEHOVAH NGARAPKA KITAI NGANTI ENGGAU SABAR?

Bup Kudus madahka: ‘Jehovah nganti maya Iya deka kasihka kita. Iya sedia deka kasihka kita, laban Iya endang seruran ngereja utai ti ngena. Beberekat meh orang ke manggaika pengarap sida ba Jehovah.’ (Isa. 30:18) Utai ti dipadah Isaiah kebendar iya ditujuka ngagai orang Judah ti degil. (Isa. 30:1) Tang ba entara orang Judah nya, bisi mega ari sida ke tetap ati ngagai Jehovah, lalu utai ke dipadah Isaiah nya meri sida harapan. Jaku ti sama nya mega meri harapan ngagai bala nembiak Jehovah ti tetap ati kemayaharitu.

Nya alai, kitai mesti nganti enggau sabar laban Jehovah mega benung nganti enggau sabar. Iya udah netapka maya alai Iya deka ngerusakka sistem dunya tu, lalu Iya benung nganti enggau sabar nyentuk ngagai maya hari enggau jam nya datai. (Mat. 24:36) Ba maya nya ila, semua orang deka nemu, jaku tuduh Sitan ngagai Jehovah enggau bala nembiak Iya bula magang. Udah nya, Jehovah deka ngurung Sitan sereta bala melikat ti jai, lalu ngerusakka mensia ke bepiak enggau Sitan. Tang Iya “deka kasihka [kitai].”

Taja pia, ba maya ke diatu, Jehovah engka enda muai penanggul kitai. Tang Iya besemaya, kitai ulih gaga ati seraya kitai nganti. Baka ke dipadah Isaiah, kitai deka diberekat tauka gaga ati, lebuh kitai nganti ngagai utai ti manah ke deka nyadi. (Isa. 30:18) a Baka ni kitai tau bulih pengaga ati nya? Peratika empat iti chara ke ulih nulung kitai.

CHARA DEKA TERUS GAGA ATI SERAYA NGANTI

Fokus ba utai ti positif. Raja David udah meda mayuh utai ti jai nyadi sepemanjai pengidup iya. (Mas. 37:35) Taja pia, iya nulis: ‘Diau jenuh di mua Jehovah, lalu anti Iya enggau ati ti liat. Anang irau ketegal orang bukai mujur, tauka ketegal orang bejalaika pelan sida ke jai.’ (Mas. 37:7) David empu nitihka jaku lalau tu lebuh iya fokus  ngagai Jehovah, ti besemaya deka nyelamatka iya. Iya mega beterima kasihka semua utai ti manah ke udah dikereja Jehovah ke iya. (Mas. 40:5) Enti kitai fokus ngagai utai ti positif ba situasi kitai, lalu enda fokus ngagai utai ti negatif ke nyadi ngelingi kitai, kitai deka senang agi nganti ke Jehovah.

Mengkang kisuk muji Jehovah. David, ke engka nulis Masmur 71, madahka tu ngagai Jehovah: “Aku deka seruran manggaika pengandal ati aku ba Nuan. Aku deka bebendar agi muji Nuan.” (Mas. 71:14) Baka ni iya muji Jehovah? Iya madah ngagai orang bukai pasal Jehovah sereta belagu muji Jehovah. (Mas. 71:​16, 23) Baka David, kitai mega ulih gaga ati seraya nganti ke Jehovah. Kitai muji Jehovah lebuh kitai nginjil ngagai orang bukai, bejaku pasal Iya ngagai bala kaban enggau diri sebilik kitai, sereta lebuh kitai belaguka lagu sembah kitai. Nyadi, ambika chunto, lebuh nuan belaguka lagu sembah kitai, perundingka lirik lagu nya sereta chara lagu nya ulih nulung nuan gaga ati.

Bulih peransang lebuh begulai enggau bala menyadi Kristian nuan. Lebuh David napi penanggul, iya madah ngagai Jehovah: “Di mua bala nembiak Nuan, aku deka madahka pemadas Nuan.” (Mas. 52:9) Kitai mega deka bulih peransang lebuh kitai begulai enggau bala menyadi Kristian kitai, ukai aja lebuh ba gempuru tauka lebuh nginjil, tang mega lebuh kitai ngereja utai bukai ti ngagaka ati.​—Rom. 1:​11, 12.

Tegapka agi harapan nuan. Masmur 62:5 madahka: ‘Aku manggaika diri semina ba Petara siku aja, laban pengadang aku datai ari Iya.’ Pengadang, tauka harapan, amat penting kelebih agi lebuh pengujung dunya tu enda datai enggau jampat baka ke dikedekaka kitai. Kitai mesti yakin, semaya Jehovah deka dikeamatka enda ngira ni pengelama kitai patut nganti. Kitai ulih negapka harapan kitai enggau belajarka Jaku Petara. Ambika chunto, perundingka semua jaku benabi ke udah dikeamatka, baka ni utai ti ditulis bala penulis Bup Kudus sejalai enggau pangan diri, sereta utai ti dipadah Jehovah pasal Diri Iya Empu. (Mas. 1:​2, 3) Pia mega, kitai patut terus “besampi nitihka iring kuasa kudus Petara” ngambika kaul kitai enggau Jehovah mengkang tegap seraya kitai nganti semaya pasal pengidup belama iya dikeamatka.​—Jud. 20, 21.

Baka Raja David, andal meh Jehovah ngemataka sida ke nganti ke Iya. Lalu Iya mega ngayanka pengerindu ti setia ngagai sida. (Mas. 33:​18, 22) Terus meh nganti enggau sabar ke Jehovah. Fokus ba utai ti positif, mengkang kisuk muji Jehovah, bulih peransang lebuh begulai enggau bala menyadi Kristian, sereta tegapka agi harapan nuan.