Magayayya Habang Mapasensia nga Maginnennag Kani Jehova
IINNAGGAMMU kari i tiempo sonu pawanan ni Jehova i ngamin nga marake anna talibaguan na i ngamin nga gannug? (Nep. 21:1-5) Siguradu nga excited ka! Ngem ari tu kanayun nga mabi nga pasensian nga innaggan si Jehova, mas ngana nu marigi-rigatan ittam. Nu ari paga gare nga nesimmu i iddanamattam, mamattaki yatun ta futu tam.—Prov. 13:12.
Ngem ekspektan lagapa ni Jehova nga mapasensia ittam nga maginnag ta pagguyu na ta pinili na nga tiempo. Ngatta ekspektan na yatun ta nittam? Kunnasi ittam mabbalin tu magayayya habang maginnennag?
NGATTA EKSPEKTAN NI JEHOVA NGA MAGINNAG ITTAM?
Kagian na Biblia: “Mapasensia nga maginnag si Jehova tapenu faboran naka, anna magguyu yayya tapenu mangipasingan tu allo nikaw. Megafu ta si Jehova ay Dios na hustisia. Magayayya danuri tulu-tuloy nga maginnag sa.” (Isa. 30:18) Para ta Judio ira nga matagga i ulu da danatun nga uvovug. (Isa. 30:1) Ngem egga lagapa i matalo ira nga Judio anna yatun ira nga uvovug i nangiyawa tu iddanama ta nira. Yatun gabbalaman nga uvovug i mangiyawa tu iddanama ta nittam sangawe.
Mawag gafu tu mapasensia ittam nga maginnag megafu ta mapasensia nga maginnag si Jehova. Egga i napili na nga tiempo sonu pangultimuan na yaw nga sistema anna iinnaggan na i dattal natun nga aggaw anna oras. (Mat. 24:36) Tatun nga tiempo, mapakurug saw nga falsu i akusasion na Diablo kontra kani Jehova anna ta massesserbi ta nisa. Daralan na saw i ngamin nga marake nga totolay anna ifuku na si Satanas anna i demonio na ira, ngem ‘mangipasingan yayya tu allo nittam.’
Ta maddaggun, ari paga alsan ni Jehova i problema tam ira. Ngem ipasiguradu na nga awayya tam mabbalin tu magayayya habang maginnennag ittam. Kagitta na nakagi ni Isaias, awayya tam mabbalin tu magayayya habang iddanamattam onu kakayà tam ngana nga mesimmu i mapia nga gannug. (Isa. 30:18) a Kunnasi ittam mabbalin tu magayayya? Innattam i appa nga makua tam.
NU KUNNASI MABBALIN TU MAGAYAYYA HABANG MAGINNENNAG
Maffokus ta positibo. Aru nga kinamarake i nasingan ni Patul David ta pinattolena. (Sal. 37:35) Ngem nitura na: “Ta arubang na YAFU ay magimammo ka, anna pasensiam-mu nga innaggan i uffun na; ari ka nga magaburidu megafu ta totolay nga mapia i paddiad-da, onu megafu ta maketuppal ira ta marakay nga gakkag da.” (Sal. 37:7) Sinuttul ni David yatun nga tabarang. Naffokus yayya ta promesa ni Jehova nga ipaliag na yayya. Inappresia na gapa i ngamin nga bendision ni Jehova nisa. (Sal. 40:5) Nu maffokus ittam gapa ta positibo nga mesissimmu ta pattoletam anna ari tam agga-nono i problema ira, mas mabi para ta nittam i maginnag kani Jehova.
Kanayun nga dayawan si Jehova. Awayya na tu si David i nattura ta Salmo 71. Nikagi na kani Jehova: “Kanayun ngà nga magiddanama nikaw, ay pasikkalak-ku paga i maddaya-rayaw.” (Sal. 71:14) Kunnasi na nga dayawan si Jehova? Ikagi na ta tanakuan i meyannung kani Jehova anna makkansion yayya tu pammadayaw ta nisa. (Sal. 71:16, 23) Kagitta ni David, awayya tam mabbalin tu magayayya habang maginnag kani Jehova. Dayawattam yayya gukaban na pallayyagayya, inaggaw nga paggiristoria meyannung ta nisa, anna pakkansion. Sonu makkansiokka gafu tu Kingdom song, makasta nu pannonopammu i mensahe natun.
Makikavvulu ka ta wawwaragim tapenu mapagaram ka. Turi ta neparubang ta problema ira si David, nikagi na kani Jehova: “Ta arubang na totolem ira, i piam ay ek-ku nga ilammuyag noka.” (Sal. 52:9) Mapagaram ittam gapa ta matalo ira nga kapangngurug tam, ari laman tu ta study anna pallayyagayya, nu ari, pati ta gatherings tam ira.—Roma 1:11, 12.
Paladdammu i pagiddanamam. Kagian na Salmo 62:5: “Ta Dios laman i ek-ku pammakatalakkan, yaya laman i ek-ku nga pagiddanaman.” Mawag tam i maladda nga pagiddanama jebi nu mas paga mabayag i dattal na panuppalan anne ta pagabbo tam. Mawag gare tu kumbinsidu ittam nga matuppal i promesa ira ni Jehova maski kunnasi paga kabayag i mawag tu innaggattam. Mapaladda tam i iddanama tam gukaban na paggigiammu ta Uvovug na Dios—i profesiya ira, i pattoronos natun, anna i detalye ira nga nipakannammu ni Jehova meyannung ta nisa. (Sal. 1:2, 3) Mawag gapa nga tulu-tuloy ittam nga “makimallo . . . ta pakapangngua na Espiritu Santo” tapenu mattalupaddian i makasta nga relasiottam kani Jehova habang iinnaggattam i promesa na nga inango nga mannanayun.—Jud. 20, 21.
Kagitta ni Patul David, mattalo ka nga tangngallan ni Jehova danuri i maginnennag ta nisa anna ipasingan na i ari manguli nga pangaya na ta nira. (Sal. 33:18, 22) Pasensiammu gafu i maginnag kani Jehova. Habang kuammu yatun, maffokus ka ta positibo ira nga mesimmu ta pattolem, dayawammu yayya, makikavvulu ka ta wawwaragi tapenu mapagaram ka, anna kanayummu nga paladdan i iddanamam.
a Egga paga i tanakuan nga kebalinan na uvovug ira nga ne-translate tu “tulu-tuloy nga maginnag.” Awayya na nga kebalinan natun nga “kakayà onu iddanaman nga mesimmu i tadday tu gannug.” Ipasingan gafu natun nga awan tu dake na nu kakayà tam nga mangultimu ngana nakuan i ziga tam.
