Naana kpɔ a, Ujehofa leyice ku alɔ géē lɛ ɔtu lé lɛ ɔ kóō ya ɔdā nɛ ó bi ɔtu ō ya a eko okpaakpa a. Ɔdiya nɛ ó leyice ku alɔ géē ya lɛ a? Ɔdi gáā lɔfu ta alɔ abɔ ō lɛ eeye abɔ alɔ lɛ ɔtu lé yɔ i gbeyi a?

ƆDIYA NƐ UJEHOFA LEYICE KU ALƆ GÉĒ GBEYI A?

Ubáyíbu kahinii: “Óndú ā le tútū yɔ̄ ī gbēyī ka aá wā ɛgiyí nū kóō méyīnyinyi aá kpɔ́. Ó lɛ ā ohígbū ka Óndú ā gē yá ɔdā okpaakpa eko dóódu. Éeyē yɔ̄ lɛ ācɛ dúúmā nēe [lɛ ɔtu lé yɔ i gbeyi] Óndú ā.” (Ayis. 30:18) Ācɛ Ujiyu nōo yɔ i ya ikpɛyi olɔfu tu Ujehofa a, néē bi ɔtu eko néē yɔ i ta aɛlā nōo yɔ ipu ɛga ku Ubáyíbu nyā a. (Ayis. 30:1) Amáŋ ó lɛ ācɛ Ujiyu ōhī nōo hayi kpaakpa lɛ Ujehofa, aɛlā nōo ba nyā kē je eyiyoce lɛ uwa. Aɛlā ekponu nyā klla je eyiyoce lɛ ācɛ nōo yɔ i gba Ujehofa ɛ̄gbā kpaakpa icɛ a.

Ohigbu ɛnyā, ó wɛ o piii ku alɔ cika ō lɛ ɔtu lé yɔ i gbeyi, ohigbu ka Ujehofa abɔyi nu lɛ ɔtu lé yɔ i gbeyi duu. Ó lɛ eko nɛ ó géē bi ɛcɛ obɔbi nyā wɛ oŋmɛyi a miya taajɛ ɛ, ó kē lɛ ɔtu lé yɔ i gbeyi eko ɔɔma. (Umát. 24:36) Ɛpleeko ɔɔma, ó géē le teyi peee ka ɛjɛɛji ije nɛ Ebilii ce ba Ujehofa mla ācɛ nōo gē gba ɔ ɛ̄gbā a wɛ ɛkɛmgbɛ. Oŋma ɔɔma, ó géē je Usetan mla ɔcɛ duuma nōo yɔ aya ku nu a yiifi, amáŋ ó “géē ményinyi [alɔ].”

Babanya, Ujehofa i gáā lɔfu fu ɛjɛɛji unwalu nɛ alɔ yɔ i má a ŋ, amáŋ ó cɛ lɛ alɔ jé kpɔcii ku alɔ lɔfu lɛ eeye abɔ alɔ yɔ i gbeyi a. Ɛgɛ nɛ Ayisaya ka a, alɔ lɔfu lɛ eeye abɔ alɔ lɛ ɔtu lé yɔ i gbeyi ku ɔdā olɔhi kóō ya a. (Ayis. 30:18) Ɛgɛnyá nɛ alɔ lɔfu lɛ eeye ɔɔma a? Aɔdā ɛnɛ nōo ba nyā lɔfu ta alɔ abɔ.

ƐGƐ NƐ ALƆ LƆFU LƐ EEYE ABƆ ALƆ YƆ I GBEYI A

Yɔ i gbɛla lɛyikwu aɔdā olɔhi nōo yɔ i ya ipu oyeeyi ku uwɔ a. Udefidi nōo wɛ Ɔcɛ́ a má aɔdobɔbi alɛwa ipu ɛjɛɛji oyeeyi ku nu. (Aíjē 37:35) Naana kpɔ a, ó ta ɔkpá kahinii: “Gbeyī cíí, cɛ́ɛ́ kú ā gbēyī ɔdā nɛ̄ Ɔwɔicō í yá ā. Ā híī je unwalu lɛ iyī uwɔ ohígbū ācɛ nēe ī jāgbénū fíyafíya ā, ámāŋ ka ācɛ nēe ī yá lɔhi ipú ɔdōbɔ̄bí nēé gē miya ā ŋ́.” (Aíjē 37:7) Udefidi abɔyi nu bi ukɔ́ nyā le yuklɔ eko nɛ ó yɔ i gbeyi Ujehofa kóō lɛ okonu ku nu ō je otabɔ lɛ ɔ a ya jila a. Ɛjɛɛji aɔdā olɔhi nɛ Ujehofa ya lɛ ɔ a klla jɛ ɔ eyī nɛhi duu. (Aíjē 40:5) Ɔdaŋ  ku alɔ abɔyi alɔ gɔbu yɔ i gbɛla lɛyikwu aɔdā olɔhi nōo yɔ i ya ipu oyeeyi ku alɔ, ikɔkɔ ō lɛ ɔtu ku alɔ kwu unwalu nɛ alɔ gē má a, ó géē tɔɔtɛ lɛ alɔ fiyɛ ō gbeyi Ujehofa.

Bi ɛga duuma nɛ a lɛ a le cɛtra Ujehofa. Udefidi nōo lɔfu wɛ ɔcɛ nōo ta ɔkpá ku Aíjē Kú Ɛ̄gbā 71 a, da Ujehofa kahinii: “N géē [gɔbu yɔ i gbeyi] uwɔ, n klla í yɔ̄ ī cɛ̄tra awɔ fíyɛ́ eko dóódu.” (Aíjē 71:14) Ɛgɛnyá nɛ ó gáā bi le cɛtra Ujehofa a? Ŋma lɛ ō da ācɛ ɔhá lɛyikwu Ujehofa mla ō gwiije ō bi le cɛtra ɔ. (Aíjē 71:​16, 23) Bɛɛka Udefidi a, alɔ lɔfu lɛ eeye abɔ alɔ yɔ i gbeyi Ujehofa a. Alɔ gē cɛtra ɔ eko duuma nɛ alɔ tɔɔna lɛ ācɛ ɔhá, ō kɛla lɛyikwu ɔ lɛ aɔkpa mla ācɛ apɔlɛ ku alɔ, mla ō gwo aijé ku alɔ. Ó lɛ a, eko ɔhá nɛ a yɔ i gwo aijé ku alɔ, gbɛla tu aikpɛla ku ijé a lɔɔlɔhi mla ɛgɛ néē gē ya ku a gweeye a.

Bēē miyɛ ɔtu ō ta kwu ɔtu ŋma ɛgiyi ayinɛ uwɔ. Eko nɛ Udefidi yɔ ipu āhɔ̄ olɔnɔ a, ó da Ujehofa kahinii: “N géē yɔ̄ ī bī iyē kú uwɔ tɔ́ɔna, ipú ójila kú ācɛ kú uwɔ ohígbū ka a lɔhi.” (Aíjē 52:9) Alɔ abɔyi alɔ lɔfu lɛ ɔtu ō ta kwu ɔtu eko duuma nɛ alɔ yɔ mla ayinɛ alɔ. Ó wɛ eko nɛ alɔ yɔ tɔha ipu ōjila ku ujɔ amāŋ ipu uklɔ ku ɔna ō ta foofunu ŋ, amáŋ eko nɛ alɔ gē jɔɔnyɛ iyi alɔ a.—Uróm 1:​11, 12.

Ya ku eyiyoce nɛ a lɛ a kóō lɔfu tōōtɔ̄ɔ̄. Ɔkpá ku Aíjē Kú Ɛ̄gbā 62:5 kahinii: “Ɔwɔicō ōfōōfūnū gē je ɛbɔ́ lɛ odo kú um á. Anú nɛ̄ n kē [i gbeyi] á.” Ó cɛgbá nɛhi ku alɔ lɛ eyiyoce olɔfu, ofiyɛ duu ɔdaŋ ka oŋmɛyi ku ɛcɛ nyā i wa eko nɛ alɔ leyice a ŋ. Alɔ cɛgbá ō lɔtuce lɔfu lɔfu ku aokonu ō ce ku Ujehofa géē ya jila piii, ɛgɛ duuma nɛ alɔ kóō géē cɛgbá ō gbeyi lɛ naana a. Alɔ lɔfu ya ku eyiyoce ku alɔ kóō lɔfu tōōtɔ̄ɔ̄ ŋma lɛ ō klɔcɛ ku ɛlā ku Ɔwɔico. Ocabɔ mafu, gbɛla lɛyikwu aɛlā nɛ Ubáyíbu ka taajɛ nōo le ya jila ɛ ma, ɛgɛ nɛ Ubáyíbu cɛtɔha mla iyi uwa naana nɛ ācɛ ɛyɛɛyɛyi ta ɔ a, mla aɛlā nɛ Ubáyíbu ka lɛyikwu Ujehofa abɔyi nu a. (Aíjē 1:​2, 3) Ɔdā ɔhá kpɔ, alɔ cɛgbá ō ‘gbɔɔkɔ ō lɛ alelekwu ihɔ ku Ɔwɔico’ o ya ɛɛ ku alɔ lɛ abɔ bi ɛma olɔhi nɛ alɔ lɛ mla Ujehofa, abɔ alɔ yɔ i gbeyi kóō lɛ okonu nɛ ó ce ō je oyeeyi opiyoo lɛ alɔ a ya jila a.—Ujúd 20, 21.

Bɛɛka Udefidi nōo wɛ Ɔcɛ́ a, lɔtuce lɔfu lɔfu ka Ujehofa yɔ i má ɛjɛɛji ācɛ nōo yɔ i gbeyi nu a, ó kē géē mafu ihɔtu nōo i mɛ ŋ ma lɛ uwa. (Aíjē 33:​18, 22) Gɔbu ku a yɔ i lɔtu mla eeye abɔ a yɔ i gbeyi Ujehofa a, ŋma lɛ ō gbɛla lɛyikwu aɔdā olɔhi nōo yɔ i ya ipu oyeeyi ku uwɔ, ŋma lɛ ō cɛtra ɔ, ŋma lɛ ō miyɛ ɔtu ō ta kwu ɔtu ŋma ɛgiyi ayinɛ uwɔ, mla ō ya ku eyiyoce nɛ a lɛ a kóō yɔ i lɔfu tōōtɔ̄ɔ̄.