Ngem namnamaen ni Jehova a siaanus nga urayentayo ti panagtignayna iti inkeddengna a tiempo. Apay? Ania dagiti makatulong kadatayo nga agbalin a naragsak bayat nga agur-uraytayo?

APAY A NAMNAMAEN NI JEHOVA NGA AGURAYTAYO?

Kuna ti Biblia: “Siaanus nga agur-uray ni Jehova tapno ipakitaannakayo iti pabor, ken agtignayto tapno kaasiannakayo. Ta ni Jehova ket Dios ti hustisia. Naragsak ti amin nga agtultuloy a mangnamnama kenkuana.” (Isa. 30:18) Dagita a sasao ni Isaias ket nairanta para kadagiti nasukir a Judio. (Isa. 30:1) Ngem adda latta sumagmamano a matalek kadakuada idi, ket dagita a sasao ti nangted kadakuada iti namnama. Dagitoy met la a sasao ti mangyeg iti namnama kadagiti matalek nga agserserbi ken Jehova ita.

Masapul ngarud a siaanus nga aguraytayo ta uray ni Jehova a mismo ket siaanus nga agur-uray met. Adda inkeddengna a tiempo tapno pagpatinggaenna daytoy a sistema, ket ur-urayenna a dumteng dayta nga aldaw ken oras. (Mat. 24:36) Iti dayta a tiempo, naan-anayton a mapaneknekan nga ulbod dagiti akusasion ti Diablo kontra ken Jehova ken kadagiti agserserbi Kenkuana. Pukawennanton ni Satanas ken ti amin a dimmasig kenkuana, ngem ‘kaasiannatayto.’

Mabalin a saan nga ikkaten ni Jehova dagiti pakasuotantayo ita. Ngem ipaspasiguradona a mabalintayo ti agragsak bayat nga agur-uraytayo. Kas imbaga ni Isaias, mabalintayo ti agragsak bayat a mangnamnamatayo nga addanto nasayaat a mapasamak. (Isa. 30:18) a Kasano? Adda uppat a banag a makatulong kadatayo.

NO KASANO TI AGBALIN A NARAGSAK BAYAT NGA AGUR-URAYTAYO

Agpanunotka iti positibo. Iti intero a panagbiag ni Ari David, adu a kinadakes ti nakitana. (Sal. 37:35) Nupay kasta, insuratna: “Agulimekka iti sanguanan ni Jehova ken agurayka a sigagagar kenkuana. Saanka koma a masuron iti tao nga agballigi a mangibanag kadagiti dakes a planona.”  (Sal. 37:7) Impapuso ni David dayta. Pinampanunotna ti namnamana a pannakaisalakan. Inapresiarna met ti amin a nasayaat nga inaramid ni Jehova para kenkuana. (Sal. 40:5) No panunotentayo met dagiti nasayaat a mapaspasamak iti biagtayo, imbes a dagiti dakes a mapaspasamak iti aglawlawtayo, nalaklakatayo nga urayen ni Jehova.

Kanayon nga idaydayawmo ni Jehova. Ti nagsurat iti Salmo 71 ket nalawag a ni David. Imbagana ken Jehova: “Diak mauma nga aguray kenka; ad-addanto pay nga idaydayawka.” (Sal. 71:14) Kasanona a maidaydayaw ni Jehova? Impakaammona ti maipapan ken Jehova ken nagkanta iti panangidaydayaw kenkuana. (Sal. 71:​16, 23) Kas ken David, makapagragsaktayo bayat nga agur-uraytayo ken Jehova. Maidaydayawtayo isuna iti ministeriotayo, iti inaldaw a pannakisaritatayo kadagiti gagayyem ken kapamiliatayo, ken iti panagkantatayo kadagiti kanta para kenkuana. Inton agkantaka iti kanta ti Pagarian, panunotem a naimbag dagiti nagsayaat ken makaparagsak a lirikona.

Makikaduaka kadagiti kapammatiam tapno maparegtaka. Idi adda dagiti problema ni David, imbagana ken Jehova: “Iti sanguanan dagiti napudno kenka, manginanamaakto iti naganmo.” (Sal. 52:9) Maparegtadatayo met dagiti matalek a kapammatiantayo, saan laeng a kadagiti gimong ken iti ministeriotayo no di ket uray met kadagiti panaglalangen wenno gathering.—Roma 1:​11, 12.

Pabilgem ti namnamam. Kastoy ti mabasa iti Salmo 62:5: “Agurayak a siaanus iti Dios ta isu ti pangnamnamaak.” Nakapatpateg a pabilgentayo ti namnamatayo nangruna no saan a dumteng ti panungpalan iti tiempo a ninamnamatayo. Masapul a kombinsidotayo a matungpalto dagiti kari ni Jehova uray kasano kabayag ti panaguraytayo. Mapabilegtayo ti namnamatayo no adalentayo ti Sao ti Dios—dagiti padto, ti panagtutunos ti linaonna, ken dagiti impakaammo ni Jehova maipapan kenkuana. (Sal. 1:​2, 3) Masapul met nga itultuloytayo ti ‘agkararag babaen ti nasantuan nga espiritu’ tapno agtalinaed ti nasayaat a relasiontayo ken Jehova bayat nga ur-urayentayo a matungpal ti biag nga agnanayon nga inkarina.—Jud. 20, 21.

Kas ken Ari David, agtalektayo a bambantayan ni Jehova dagidiay agur-uray Kenkuana ken ipakpakitana ti napudno nga ayatna kadakuada. (Sal. 33:​18, 22) Maitultuloymo ti siaanus nga aguray ken Jehova no agpanunotka iti positibo, idaydayawmo isuna, makipinnaregtaka kadagiti padam a Saksi, ken itultuloymo a pabilgen ti namnamam.