Ebe Ha Rẹkpa Uwẹ Rẹ Ha Ghọnghọn Beji Uwẹ Rẹ Ziẹngbe Khẹ Jehova
UWẸ be khuaẹloghe ẹghe nin Jehova ha rẹ ne emhin ebe rebhe kie bhi ọne otọ nan, ye re emhin rebhe kiẹn ọsọgbọn? (Arẹm. 21:1-5) Edandan i ribhọ ghe uwẹ khuaẹloghe ọle! Ọkpakinọn, ọ i yi ẹghe rebhe ọ rẹ lẹkhẹ nin mhan rẹ ziẹngbe ha khẹ Jehova, manman nọn sade mhan kuẹlo da ọkakale. “Ahamiẹn emhin nin ọria khẹ bha sẹ sẹ ọle bhi obọ, ọ gbe ọle ahu sotọ.”—Prov. 13:12.
Ọrẹyiriọ, Jehova guanọ nin mhan ziẹngbe ha khẹ ọle ọkuẹsẹ ẹghe nin ọle rẹyi sẹ. Bezẹle nin ọle da guanọ nin mhan lu iriọ? Be ha rẹkpa mhan rẹ ha ghọnghọn beji mhan rẹ khẹ ọle?
BEZẸLE NIN JEHOVA DA GUANỌ NIN MHAN MUNDIA HA KHẸ ỌLE?
Baibo yọle: “Jehova ziẹngbe khẹ ẹghe nin ọle ha rẹ lu bha nọnsẹn. Ọle dẹ kpanọ mundia mhọn itohan da bha, ranmhude, Osẹnobulua nọn bhuohiẹn nọn gbale Jehova khin. Eghọnghọn hi ọsi ọrebhe ne ziẹngbe mundia ha khẹ ọle.” (Isa. 30:18) Ibhokhan Ju ne wo bhi uhọnmhọn Ẹzaya gbẹn ene ẹmhọn nan je. (Isa. 30:1) Ọkpakinọn, ibhokhan Ju eso ne yẹ wo ha ga Jehova nọnsẹn yẹ wo ha ribhọ. Ene ẹmhọn nan nin Ẹzaya gbẹn da wo re iruduba nin ele. Ene ẹmhọn nan yẹ wo re iruduba nin eria ne ga Jehova nọnsẹn ẹlẹnan.
Ọkhẹke nin mhan ziẹngbe khẹ Jehova ranmhude ọle tobọle wo ha ziẹngbe. Ọle mhọn ẹghe nin ọle rẹyi nin ọle ha rẹ re ọkpẹnlẹn ọbhi ọne agbọn Esu nan, ọle wo ziẹngbe ha khẹ ọne ukpẹdẹ bi ọne uri-agogo. (Mat. 24:36) Ọne ẹghe ha sẹ, ọ ki wo khia bhi ẹlo a ghe, ohoghe ebe Esu tale rẹji Jehova bi eria ne ga Ọle khin. Ẹghenin, ọle ki gbe Esu bi ọrebhe ne ribhi ibo nesọle khuelo, ọkpakinọn, ọle ki mhọn itohan da mhan.
Bhi ejayenan nian, asabọmiẹn Jehova i da re ọkakale nin mhan ye kie, ọkpakinọn, ọle ji mhan lẹn ghe mhan dẹ sabọ ha ghọnghọn beji mhan rẹ khẹ ọle. Beji Ẹzaya tale, mhan dẹ sabọ ha ghọnghọn beji mhan rẹ khuaẹloghe emhin esili ne ha sunu. (Isa. 30:18) a Be imhan ha rẹ sabọ ha mhọn ọne eghọnghọn nan yẹ? Emhin enẹn ribhọ ne ha sabọ rẹkpa mhan.
EBI MHAN HA RẸ SABỌ HA GHỌNGHỌN YẸ BEJI MHAN RẸ ZIẸNGBE
Ha ria eria nyan emhin esili ne sunu bhi iẹnlẹn nọnsẹ. Devid nin Ojie wo miẹn ọkakale kẹkẹ bhi ẹdagbọn iẹnlẹn nọnsọle. (Ps. 37:35) Ọrẹyiriọ, ọle da gbẹn yọle: “Huẹan ha khẹ Jehova, uwẹ ha yẹ ziẹngbe ha khẹ ọle. Hei ji ẹkẹ ọria nọn wo ha mun emhanmhan ne i mhẹn nesọle sẹ ha khọ uwẹ.” (Ps. 37:7) Devid tobọle wo re obọ rẹkhan ọne adia nan. Ọle da ha ria eria nyan emhin nin Jehova ve ghe ọle dẹ lu rẹ rẹkpa ọle. Sẹyẹ, ọle da ha gbẹlokotọ bhi ẹsele kẹkẹ nin ọle miẹn bhi obọ Jehova. (Ps. 40:5) Ahamiẹn mhan ria eria nyan emhin esili ne sunu ji mhan bhi iẹnlẹn, ghe mhan bha dọ ha ria eria nyan emhin ne i mhẹn ne sunu nẹga mhan, ọ ki lẹkhẹ nin mhan rẹ ziẹngbe ha khẹ Jehova.
Noo isẹhoa nọn hi ki rẹ khin nin uwẹ miẹn rẹ ha gẹn Jehova. Ọria nọn gbẹn Psalm 71 da taman Jehova yọle: “Mẹn dẹ wo ha mundia khẹ uwẹ; mẹn dẹ ha khuẹnmhẹn uwẹ gbera ọnikhẹ.” (Ps. 71:14) Asabọmiẹn ghe Devid hi ọnọn bhọ gbẹn ọne ebe ọsi Psalm nan. Be ọle ha rẹ ha gẹn Jehova yẹ? Ọle ki ha tẹmhọn Jehova man ẹbho yẹ so illo rẹ gẹn ọlẹn. (Ps. 71:16, 23) Bọsi Devid mhan dẹ sabọ ha ghọnghọn beji mhan rẹ mundia khẹ Jehova. Mhan gẹn ọlẹn sade mhan dagbare bhi inẹbho, sade mhan tẹmhọn ọlẹn man imọẹ mhan, ẹbho bhi azagba-uwa nọnsẹmhan bi sade mhan so illo nesẹmhan. Ẹdẹ nin uwẹ ha kie ha so illo nesẹmhan, manman ria eria nyan ẹmhọn ne ribhi ene illo, bi ebe ele rẹ re uwẹ ghọnghọn yẹ.
Guanọ ikoudure bhi obọ ibhio uwẹ nin bha ko ga. Ẹghe nin Devid rẹ ha kuẹlo da ọkakale, ọle da taman Jehova yọle: “Imẹn dẹ mun udu nyan elin nọnsẹ bhi isira eguọmhandia nesẹ ne mhọn asun-rẹkhan.” (Ps. 52:9) Mhan dẹ yẹ sabọ miẹn ikoudure bhi obọ ibhio mhan nin mhan ko ga. Ọ i yi ikolo oga bi inẹbho ọkpa mhan da miẹn ikoudure bhi obọ ibhio mhan, mhan yẹ wo miẹn ikoudure bhi obọ ele sade mhan deba ele gbẹghe.—Rom 1:11, 12.
Ziẹn ikhuaẹloghe nin uwẹ mhọn. Psalm 62:5 yọle: “Mẹn dẹ huẹan mundia khẹ Osẹbobulua, ranmhude obọ ọle mẹn da miẹn iruduba.” Ọ manman wo khẹke nin mhan ha mhọn ikhuaẹloghe nọn ziẹn, manman nọn sade ọkpẹnlẹn ọsi ọne agbọn nan bha vae bhi ẹghe nin mhan rẹ ha mhọn bhi ọkhọle. Ọkhẹke nin mhan ha mhọn izebhudu ghe, ive nesi Jehova rebhe dẹ munsẹ, aharẹmiẹn ọ reele nin mhan mọn da khẹ ọle. Mhan dẹ sabọ ziẹn ikhuaẹloghe nin mhan mhọn sade mhan luẹ Ọta nọnsi Osẹnobulua. Bhi ọsi ijiẹmhin, mhan sabọ rẹ ria eria nyan ebi ọta akhasẹ ne ribhi Baibo rẹ ha munsẹ yẹ, ebi emhin kẹkẹ nin eria ne gbẹn Baibo tale rẹ diẹn kugbe yẹ, bi ebi Jehova ji mhan lẹn rẹji unan ọria nin ọle khin. (Ps. 1:2, 3) Sẹyẹ, ọkhẹke nin mhan ha bhii Jehova nin ọle re ẹlinmhin nọn khiale nọnsọle nin mhan rẹ sabọ ha ziẹn ikolu nin mhan bi ọle ko mhọnlẹn, beji mhan rẹ khẹ ọle nin ọle mun ive ọsi iẹnlẹn ighegheghe nin ọle ve sẹ.—Jud 20, 21.
Bọsi Devid, ha mhọn ọne izebhudu ghe Jehova gbega ẹbho ne mundia khẹ ọle, sẹyẹ ọle re ahoẹmhọn-egbe nọn i beghe nọnsọle man ele. (Ps. 33:18, 22) Wo mundia ha khẹ Jehova beji uwẹ ha rẹ ha denọ ẹlo ọbhi emhin esili ne sunu ji uwẹ bhi iẹnlẹn, ha gẹn ọlẹn, ha guanọ ikoudure bhi obọ ibhio uwẹ nin bha ko ga, yẹ ha ziẹn ikhuaẹloghe nọn ghanlẹn nin uwẹ mhọnlẹn.
a Bhi urolo nan rẹ gbẹn Baibo, ene ikpọta nan zedu ọle diọbhi “ziẹngbe mundia khẹ” dẹ yẹ sabọ mundia nin “nan rẹ ha guanọ, la nan rẹ re ẹlo ọbhọ nin emhin sunu.” Ọnan rẹman ghe, ọ i yi emhin ebe nin mhan rẹ ha guanọ nin Jehova re ọkpẹnlẹn ọbhi iloya ọsi eria.
