O make rrọ ere na, Jihova ọ gwọlọ nọ ma thihakọ hẹrẹ oke nọ o fihọ na. Fikieme? Kọ eme o ti fiobọhọ kẹ omai gbẹ wereva nọ ma be hẹrẹ iẹe na?

FIKIEME JIHOVA Ọ RỌ GWỌLỌ NỌ MA HẸRẸ OKE NỌ O FIHỌ?

Ebaibol ọ ta nọ: “Jihova ọ be rọ odiri hẹrẹ owhai re o dhesẹ aruoriwo kẹ owhai, yọ ọ rẹ te kparoma re o dhesẹ ohrọ kẹ owhai. Keme Jihova yọ Ọghẹnẹ uvioziẹ. Eva e were ahwo kpobi nọ a bi rẹro riẹ.” (Aiz. 30:18) Ahwo Ju nọ a je koko izi Ọghẹnẹ hẹ Aizaya ọ ta ẹme yena kẹ. (Aiz. 30:1) O make rrọ ere na, ahwo Ju jọ a jariẹ nọ a jẹ gọ Ọghẹnẹ ziezi, yọ ẹme nọ Aizaya ọ ta na ọ lẹliẹ e rai wo ẹruore. Ẹme na ọ sae lẹliẹ omai wo ẹruore nẹnẹ re.

Ẹme Aizaya na o dhesẹ nọ u fo re ma hẹrẹ ẹdẹ Jihova keme Jihova omariẹ ọ be hẹrẹ ẹdẹ yena re. Jihova o fi ẹdẹ họ no nọ ọ te rọ raha akpọ omuomu nana no. Yọ ọ be hẹrẹ ẹdẹ na gbe auwa nọ o fihọ na. (Mat. 24:36) Nọ oke na u te te no, ma te ruẹ vevẹ nọ eme nọ Ẹdhọ ọ ta kpahe Jihova gbe ahwo nọ a be gọe kpobi na erue. O ti kpe Ẹdhọ avọ ahwo nọ a rrọ abọ riẹ kpobi no. Rekọ o ti “dhesẹ ohrọ kẹ” omai.

Taure oke yena o te ti te, Jihova ọ ta nọ eva e sae were omai. Orọnikọ ọ te nwane thọ omai no ẹbẹbẹ kpobi hi. Rekọ ẹme nọ Aizaya ọ ta o dhesẹ nọ eva e sae were omai dede nọ emamọ oware nọ ma bi rẹro riẹ o ri te omai obọ họ. (Aiz. 30:18) a Kọ ẹvẹ ma sai ro wo evawere kpakiyọ akpọ ọ be bẹ omai? Ma ti dhunu te eware ene jọ nọ e sai fiobọhọ kẹ omai.

EWARE NỌ E SAI FIOBỌHỌ KẸ OMAI WEREVA NỌ MA BE HẸRẸ NA

Hai roro kpahe eware iwoma. Eware iyoma buobu e via kẹ Devidi Ovie na. (Ol. 37:35) Ghele na o kere nọ: “Fọ tou kẹ Jihova jẹ hẹrẹ iẹe avọ irẹro. Whọ jọ eva e dha owhẹ hẹ fiki ohwo nọ o ru omaa omuomu riẹ gba.” (Ol. 37:7) Devidi omariẹ o ru oware nọ ọ ta kẹ omai nọ ma ru na. O wo ẹruore inọ ẹdẹ jọ Jihova o ti siwi ei. Yọ ọ jẹ hai muẹrohọ eware nọ Jihova o bi ru kẹe. (Ol. 40:5) Ere u fo nọ ma re ru re, orọnikọ eweware  iyoma nọ e via kẹ omai ọvo ma re roro kpahe he. Joma hai rri eware iwoma nọ Ọghẹnẹ o bi ru kẹ omai. Ma te ru ere, eva e te were omai, nọ ma be hẹrẹ ẹdẹ Jihova na.

Hai jiri Jihova ẹsikpobi. O wọhọ nọ Devidi ọye o kere Olezi avọ 71 na. Ọ ta nọ: “Mẹ te ruabọhọ ẹhẹrẹ; Me ti jiri owhẹ vi epaọ ọsosuọ.” (Ol. 71:14) Kọ ẹvẹ o je ro jiri Jihova? Ọ jẹ vuẹ ahwo emamọ eware nọ Jihova o ru no, yọ ọ jẹ hae so ile jiri ei. (Ol. 71:16, 23) Wọhọ epanọ eva e jẹ were Devidi na, eva e sae were omai re nọ ma be hẹrẹ Jihova na. Edhere jọ nọ ma sai ro jiri ei họ, nọ ma tẹ be ta usi uwoma kẹ ahwo, nọ ma tẹ be ta emamọ ẹme kpahe iẹe evaọ okenọ ma bi lele ahwo gbiku, gbe nọ ma tẹ be so ile jiri ei. Nọ whọ tẹ be so ole ukoko na jọ, roro kpahe eme ole na. O te lẹliẹ eva were owhẹ.

Hae jọ kugbe inievo na, a te tuduhọ owhẹ awọ. Okenọ Devidi o wo ẹbẹbẹ, ọ ta kẹ Jihova nọ: “Evaọ iraro enọ e talamu owhẹ, me ti fi ẹruore mẹ họ odẹ ra.” (Ol. 52:9) Jọ mai omamai ma hae nyabru enọ e talamu Jihova, koyehọ inievo mai, re a tuduhọ omai awọ. Orọnikọ obọ ewuhrẹ gbe okenọ ma te kpohọ usi uwoma ọvo ma rẹ rọ jọ kugbe ai hi, rekọ te oke ofa kpobi.—Rom 1:11, 12.

Hai ru eware nọ e rẹ lẹliẹ eyaa Ọghẹnẹ mu owhẹ ẹro. Olezi 62:5 o ta nọ: “Me fibo be hẹrẹ Ọghẹnẹ keme ọye ọ be kẹ omẹ ẹruore.” Eyaa Ọghẹnẹ i te mu omai ẹro o rẹ lẹliẹ omai thihakọ o tẹ make rọnọ Uvie na u lehie vi epanọ ma roro nọ u ti lehie te no. Jọ u mu omai ẹro nọ, u kri kẹhẹ, eyaa Jihova e te seba erugba ha. Ma tẹ be hae romatotọ wuhrẹ Ebaibol na, maero kọ oghẹrẹ nọ eruẹaruẹ Ebaibol i ro rugba, o te lẹliẹ omai fievahọ eyaa Ọghẹnẹ. Oye ovo gbe he, ma te bi muẹrohọ oghẹrẹ nọ eme Ebaibol na e rọ rọwokugbe ohwohwo dede nọ omọvo na o kere i rai hi, yọ oke ovona a ro kere ai hi, o te lẹliẹ omai riẹ nọ ẹzi Ọghẹnẹ a ro kere Ebaibol na. Yọ ma te bi muẹrohọ eware nọ ma bi wuhrẹ kpahe Jihova omariẹ na ziezi, o te lẹliẹ omai fievahọ iẹe te oka. (Ol. 1:2, 3) O jọ etẹe kuhọ họ, joma “hae lẹ rọwokugbe ẹzi ọfuafo na,” re usu mai avọ Jihova o gbẹ fa ha nọ ma be hẹrẹ uzuazọ ebẹdẹ bẹdẹ nọ ọ ya eyaa nọ ọ te kẹ omai na.—Jud 20, 21.

U mu Devidi ovie na ẹro inọ Jihova ọ be sẹro enọ e be hẹrẹ iẹe yọ o ti dhesẹ uyoyou riẹ nọ o rẹ hiẹ hẹ kẹ ae. Jọ u mu owhẹ ẹro ere re. (Ol. 33:18, 22) Gbe thihakọ hẹrẹ Jihova. Eware jọ nọ i ti fiobọhọ kẹ owhẹ nọ ohẹrẹ na o gbẹ te bẹ owhẹ hẹ họ, eware iwoma nọ Ọghẹnẹ o ru kẹ owhẹ nọ who re muẹrohọ, ejiri nọ whọ rẹ hai jiri ei, gbe inievo na nọ who re kuomagbe re a tuduhọ owhẹ awọ. U te no ere no, whọ vẹ jẹ hai ru eware nọ e rẹ lẹliẹ owhẹ fievahọ eyaa Ọghẹnẹ.