Aintsaitkiuisha nu tsawan jeamam Jehovaka katsuntas nakasarat tusa wakerawai. Urukamtai Jehovasha ainis turawarat tusa wakera? Nu tsawan jeamam warasmajai nakastai tusar wari itiurkatniuitiaj?

JEHOVASHA URUKAMTAIYA NAKASAR PUJUARAT TUSA WAKERA?

Yuusa chichame junis tawai: “Tumakrumnisha Jehová yainmaktasrum katsuntas nakarmarme. Ninkia waitnentramprattarme. Wari Jehovaka nakak turin Yuusaiti. Nin enentaimtusar nakainiana nu warasarti” (Is. 30:18 TNM). Ju chichamnaka judío aents umichu armiania nuna Isaías timiayi (Is. 30:1 TNM). Tumaitkiusha judío aents Yuusan umirainiasha irunmiayi. Nu chichaman antukar Jehová nekas nuna turattawai ainis enentaimsarmiayi. Iisha aitkiasrik enentaimsatin jeaji.

Nuinkia urukamtaiya katsuntsar nakastiniaitiaj? Jehovasha katsuntas nakawiti, iisha ainis katsuntsar nakastiniaitji. Jehovaka urutainia ju nunkanam yajauch irunna nuna amuktata nunaka tsawanta tesara takakui tura nu tsawan jeat tusa nakas pujawai (Mat. 24:36). Nu tsawan jeakuinkia Jehovan tura Jehovan enentaimtuiniana nuna iwianch natsan amajsana nuka paant nekanattawai. Nuna tura iwianchin tura iwianchin yayainiana nunaka amuktatui. Antsu niniu ainiana nunaka waitnentrartatui.

Nu tsawan jeamam Jehová ii itiurchatrin mash amukchattawai tumaitkiusha warasrum pujumniaitrume turameaji, Isaías timiania aintsan turunattana nu nakasar pujakrisha warasar pujumniaitji (Is. 30:18 TNM). a Wari turamniaitiaj nu nekaatai.

NAKASAR PUJAKUR WARASAR PUJUSTAI TUSAR WARI ITIURKAMNIAITIAJ?

Penker nankaamajnia nui enentaimsartai. Davidkia ti nukap itiurchatan wainkiamiayi (YKan. 37:35). David junis timiayi: “Uunt Yusai̱ mijiat pujusam shiir enentáiji̱a̱i̱ nákasta. Núnisaṉ aents yajauch túramuja̱i̱ páantin ajainia nu wainkiam  itiurchat enentáimsaip” tu timiayi (YKan. 37:7). Jehová uwemtikrurtatui David tu timiayi nuyasha Yuus warinmansha yainmiania nuna shiir enentaimtimiayi (YKan. 40:5). Aya ii itiurchatrin enentaimsar pujutsuk warinmansha penker nankaamajnia nui enentaimkiurkia uruma nui turunattana nu nakasar pujuttaji

Jehová tuke shiir awajsartai. Yus Kanta 71 nui junis tawai: “Antsu wikia Ámin nekas enentáimtusan tuke nákastatjai túran Áminkia nú arant shiir awajkin wétatjame” tu tawai, nu aarmanka David timiayash tumainti (YKan. 71:14). Davidkia chikich aentsjai aujmatuk Jehovan shiir awajniuyayi nuyasha shiir awajsattsa Jehovan namperniuyayi (YKan. 71:​16, 23). Iisha aintsan Yuusa chichame etsereakur nuya ii amikri turutskesha ii shuarjai aujmatkur Jehová shiir awajsamniaitji nuyasha aintsan nampereakur shiir awajsatniuitji. Amesha nampet najanamu achiakeajnia nu nampeakum wari ta nuisha enentaimsata. Ainis turakur warasmajai katsuntsar nakastatji.

Ii yachi ii umaijiai iruntrar nankaamastai. David itiurchat wainkiamiania nuinkia Jehovan junis chichaak “Túran Ame náaram péṉker asamtai Ámin enentáimturma ainia nu pujuiniamunam nákastatjame” tu timiayi (YKan. 52:9). Davidkia Jehovan enentaimtin armiania nujai irunar nankaamak shiir enentaimniuyayi. Iisha ii yachi ii umaijiai iruntainiam turutskesha Yuusa chichame etsermanum nuyanchuka tuinsha iruntrar nankaamasminiaitji (Rum. 1:​11, 12).

Uruma nui atatna nuisha enentaimsartai. Yus Kanta 62:5 nui tawai: “Aya Yusai̱ni̱ṉki wikia áyamjai, wi nákasar pujurmaka aya Níṉkiti”. Yajauchia nu amuukatin warik jeashkuisha Yuuska nekas turattawai tu enentaimsatniuitji. Yuus ukunmatai turattajai tana nunaka imiatrusan turattawai tu enentaimsatniuitji. Tu enentaimsatai tusar wari itiurkatniuitiaj? Yuusa chichame unuimiatratniuitji. Yuus papiinium nekas nankaamasun aujmatna nuisha enentaimsatniuitji, nuyasha Jehovanuncha warinia jintintrameaj nuisha enentaimsatniuitji (YKan. 1:​2, 3). Ni tiniuana nuna umikiat tusar nakakur Jehová seakur ame kakarmaram surusta tu titiniaitji (Jut. 20, 21).

David timiania aintsan Jehovaka ni umiktatui tusar nakainiana nunaka kajinmatkishtatui (YKan. 33:​18, 22). Jehová turattana nu uminkiat tusar nakakur penker nankaamajnia nui enentaimsar pujuartai, Yuus shiir awajsartai, ii yachi ii umaijiai iruntrar nankaamasartai nuyasha Yuus ukunam turattana nuisha enentaimsartai.