Yehowa Hpe Myit Galu Let La Nga Ai Laman Pyaw Nga U
NHKRU n kaja ai lam yawng hpe Yehowa yeng seng kau ngut ai hpang, arai yawng mayawng hpe nnan bai galaw na aten hpe nang myit mada nga ai kun? (Shr 21:1-5) Myit mada nga na re. Raitim, mayak mahkak law law hkrum ai shaloi, Yehowa hpe myit galu let matut la nga na matu ayan gaw n loi ai. Myit mada ai lam gaw, aten na wa yang myit daw wa chye ai.—Gsh 13:12.
Raitim, masat da ai aten hta Yehowa galaw na re. Dai aten hpe mung myit galu let la shangun mayu ai. Hpa majaw kun? Pyaw pyaw hte la nga lu hkra hpa gaw karum ya lu ai kun?
YEHOWA GAW HPA MAJAW LA NGA SHANGUN MAYU AI KUN?
“Nanhte hpe chyeju myit madun na matu, Yehowa ala nga ai; nanhte hpe matsan dum na matu shi galu kaba nga ai: kaning rai nme law, Yehowa gaw tara ding ai Karai Kasang rai nga ai; shi hpe ala nga ai ni yawng, a lu ma ai” ngu Chyum Laika hta tsun ai. (Esa 30:18) Baw ja ai Yuda masha ni hpe yaw shada let, ndai ga ni hpe Esaia ka wa ai. (Esa 30:1) Raitim, Yuda ni hta sadi dung ai ni mung nga ai. Dai ga ni gaw, shanhte hpe myit mada lam nga shangun ai zawn, dai ni aten na Karai a sadi dung ai mayam ni hpe mung, myit mada lam nga shangun ai.
Yehowa myit galu let la nga ai majaw, anhte mung myit galu let la ra ai. Ndai nhkru ai mungkan hpe jahten kau na aten, Yehowa masat da sai. Dai nhtoi hte ahkying hpe shi la nga ai. (Mat 24:36) Yehowa hte shi hpe nawku ai ni hpe mara shagun da ai Satan a ga shut ai lam, dai aten hta dan dawng wa na re. Satan hte shi a hpang hkan ai ni hpe, Yehowa jahten kau na re. Raitim, anhte hpe gaw “matsan dum” la na re.
Ndai laman, mayak mahkak ni Yehowa n yen kau ya ai. Raitim, la nga ai laman pyaw lu ai ngu, Yehowa amahkam da ai. Esaia tsun wa ai hte maren, kaja ai lam lama ma byin wa na matu, la nga ai laman pyaw lu ai. (Esa 30:18) a Gara hku nna kun? Lam mali hku nna re.
LA NGA AI LAMAN PYAW LU AI LAM
Kaja ai lam ni hpe myit maju jung u. Hkawhkam Dawi gaw, prat ting nhkru ai lam law law hkrum wa ai. (Shk 37:35) “Yehowa a man e amu sha nga nna shi hpe ala nga u: myit magaw ai hku maw nna, shabyin lu ai hte, n hkru ai lam hta awng nga ai wa a jaw e, myit hkum kahtet et” ngu tsun wa ai. (Shk 37:7) Dawi gaw tsun ai hte maren galaw ai. Hkye hkrang la na ngu ai Karai a ga sadi hpe myit maju jung ai. Karai jaw ai shaman chyeju yawng a matu chyeju dum ai. (Shk 40:5) Anhte mung manghkang ni hpe n re ai sha, kaja ai lam ni hpe myit maju jung yang, Yehowa hpe la na matu grau loi na re.
Masa shagu hta Yehowa hpe shakawn nga u. Shakawn 71 hpe ka wa ai Dawi gaw Yehowa hpe ndai hku tsun ai: “Ngai chyawm gaw tut tut myit mada nga nna, Nang hpe shakawn ai ga, a jat nga na nngai.” (Shk 71:14) Dawi gaw Yehowa hpe gara hku shakawn ai kun? Shakawn mahkawn ni hkawn ai hku nna re. (Shk 71:16, 23) Anhte mung Yehowa hpe la nga ai laman, Dawi zawn pyaw lu ai. Hkaw tsun bungli, manaw manang ni, nta masha ni hte tsun shaga ai lam ni hta, Yehowa a lam tsun mai ai. Shakawn mahkawn hkawn mai ai. Mungdan mahkawn hkawn ai shaloi, nang hpe pyaw shangun ai ga yan ni hpe myit maju jung u.
Hpunau nauna ni hte kanawn mazum nna n-gun la u. Dawi gaw, mayak mahkak ni hkrum ai shaloi, Yehowa hpe ndai hku tsun ai: “Na a amying gaw chyoi pra ai ni a man e mai kaja nga ai majaw, Dai hpe ngai ala nga na nngai law.” (Shk 52:9) Anhte mung, hpunau nauna ni kaw na n-gun la mai ai. Nawku zuphpawng, hkaw tsun bungli hta sha n-ga, kaga kanawn mazum ai aten ni kaw nna mung n-gun la mai ai.—Rom 1:11, 12.
Myit mada lam hpe shangang u. Shakawn 62:5 hta “nye a myit masin e, Karai Kasang kaw asim sha nga u, Shi kaw nna nye a myit mada shara pru nga ai” ngu tsun da ai. Grau nna gaw, anhte myit da ai aten hta jahtum alawan n du wa ai shaloi, myit mada lam ngang nga na matu grai ahkyak ai. Kade daram la ra tim, Yehowa a ga sadi ni gaja wa hpring tsup wa na hpe anhte kam ra ai. Chyum Laika hkaja ai hku nna myit mada lam ngang hkra galaw lu ai. Ga shadawn, chyum myihtoi ga ni hpring tsup wa ai lam, Chyum Laika a shawng hpang bung pre ai lam, Yehowa hte seng nna ahkri ahkrai tsun da ai lam ni hpe hkaja mai ai. (Shk 1:2, 3) Dai hta n-ga, htani htana asak lu na ngu ai ga sadi hpring tsup wa na matu la nga ai laman, Yehowa hte kaja ai hku hkau lam nga na matu, matut nna “Chyoi pra ai Wenyi hta” akyu hpyi nga ra ai.—Yud 20, 21.
Myit mada nga ai ni hpe Yehowa yu nga ai lam, ngang kang ai tsawra myit madun nga ai lam, Hkawhkam Dawi zawn kam nga u. (Shk 33:18, 22) Kaja ai lam ni hpe myit maju jung ai, Karai Kasang hpe shakawn ai, hpunau nauna ni kaw na n-gun la ai, manu dan ai myit mada lam ngang hkra galaw ai hku nna, Yehowa hpe myit galu let matut la nga u.
a Madung amyu ga hta “lama ma byin wa na matu myit mada nga ai” ngu nna mung lachyum nga ai. Mayak mahkak ni hpe Yehowa jahtum kau ya na aten hpe la nga ai gaw, n shut ai lam, ndai ga si gaw madun ai.
