Ĩndĩ Yeova endaa tũmweteele twĩ atanu na twĩ na wũmĩĩsyo nginya ose ĩtambya ĩvindanĩ yĩla yaĩlĩte. Nĩkĩ wendaa twĩke ũu? Nĩ kyaũ kĩtonya kũtũtetheesya tweteele twĩ atanu?

NĨKĨ YEOVA WENDAA TŨMWETEELE?

Mbivilia yaĩtye: “Yeova aketeela, nĩ kana amwĩke nesa; na kwondũ wa ũũ akanenevwʼa, nĩ kana amwĩwʼĩe tei: Nũndũ Yeova nĩ Ngai ũla ũsilaa katĩ; nĩ aathime onthe ala mamweteelaa.” (Isa. 30:18) Ndeto ila syĩ Isaia kĩlungu kya 30 syaandĩkĩwe Ayuti maĩ angʼendu. (Isa. 30:1) Ĩndĩ mũsoa wa 18 nĩwanengie wĩkwatyo Ayuti ala maĩ aĩkĩĩku. O na ũmũnthĩ, ndeto isu ninengae wĩkwatyo athũkũmi aĩkĩĩku ma Yeova.

Kwoou nĩtwaĩlĩte kweteela twĩ na wũmĩĩsyo, o ta Yeova. Nũnyuvĩte ĩvinda ya kwananga nthĩ ĩno nthũku, na nĩweteele mũthenya na saa ũsu. (Mt. 24:36) Ĩvindanĩ yĩu, vakeethĩwa vonekete ũtheinĩ vyũ kana maũndũ ala Ndevili wĩthĩĩtwe ayilĩĩla Yeova na athũkũmi make nĩ ma ũvũngũ. Ĩtina wa ũu, akamũvetanga Satani na onthe ala mamũkwataa mbau, ĩndĩ ithyĩ ‘akatwĩwʼĩa tei.’

Ĩvindanĩ yĩĩ tũĩ, Yeova ndatonya kũtũvetangĩa mathĩna onthe ala meũtũkwata, ĩndĩ atũĩkĩĩthĩtye kana no twĩthĩwe twĩ atanu o tũendeee kweteela. O tondũ Isaia wawetie, no tũendeee kweteela ũndũ mũseo wĩkĩke twĩ na mea maingĩ na twĩ atanu. (Isa. 30:18) Tũtonya kũkwata ũtanu ũsu ata? Ve maũndũ ana matonya kũtũtetheesya.

ŨNDŨ TŨTONYA KWĨTHĨWA TWĨ ATANU O TWETEELE

Vindĩĩsya maũndũ maseo ala mekĩkĩte thayũnĩ waku. Mũsumbĩ Ndaviti nĩwakwatĩtwe nĩ maũndũ mathũku thayũnĩ wake. (Sav. 37:35) O na vailye ũu, aandĩkie atĩĩ: “Thũmũa nthĩnĩ wa Yeova, na mweteele na wũmĩĩsyo: Ndũkenyamasye ũndũ wa ũla ũunĩkaa nzĩanĩ yake, nũndũ wa ũla ũtumaa mosũanĩo mathũku mekĩka.” (Sav. 37:7) Ndaviti nĩwaatĩĩie ũtao ũsu kwa kũtũnga kĩlĩko kyake wĩkwatyonĩ wa ũtangĩĩo ũla Yeova wamwathĩte. O na nĩwatũngaa mũvea nũndũ wa maũndũ onthe ala Yeova wamwĩkĩte. (Sav. 40:5) O naitũ twatũnga kĩlĩko maũndũnĩ maseo ala mekĩkĩte thayũnĩ witũ vandũ va mathĩna ala matũkwatĩte, ũkeethĩawa wĩ ũndũ wĩ laisi kũmweteela Yeova.

 Mũtaĩe Yeova kĩla ĩvinda. Mũandĩki wa Savuli ya 71, ũla nĩ Ndaviti, amwĩie Yeova ũũ: “Ngeethĩawa na wĩkwatyo mavinda onthe, na ngakũtaĩa mbee na mbee.” (Sav. 71:14) Ĩndĩ esaa kũmũtaĩa Yeova ata? Nĩ kwa kũtavya angĩ ĩũlũ wake na kwina mbathi sya kũmũkumya. (Sav. 71:​16, 23) O ta Ndaviti, no tũmweteele Yeova twĩ atanu. Yĩla twĩ ũtavanyʼanĩ, tũkũea ngewa na ala angĩ, na tũkwina mbathi sitũ sya Ũsumbĩ, twĩthĩawa tũimũkumya. Yĩĩngĩ ũkwĩthĩwa ũyina wathi wa Ũsumbĩ, vindĩĩsya nesa ndeto sya wathi ũsu na ũndũ siũkũtanĩthya.

Eka ana-a-asa na eĩtu-a-asa maku makwĩkĩe vinya. Ĩvinda yĩla Ndaviti waĩ thĩnanĩ, amwĩie Yeova ũũ: “Ngeekwatya syĩtwa yaku, atheu maku mene.” (Sav. 52:9) O naitũ no twĩkĩwe vinya nĩ athaithi ala angĩ twĩ maũmbanonĩ, ũtavanyʼanĩ, na o na yĩla tũkwĩtanĩthya.—Alo. 1:​11, 12.

Lũlũmĩĩlya wĩkwatyo waku. Ĩandĩko ya Savuli 62:5 yaĩtye: “Thayũ wakwa, eteela Ngai e weka ũvĩndĩtye; nĩkwĩthĩwa wĩkwatyo wakwa wĩ kwake.” Nĩ ũndũ wa vata tũlũlũmĩĩlye mũĩkĩĩo witũ na mũno mũno ethĩwa mũthya ndũnoka mĩtũkĩ ũndũ twĩĩkwatĩtye. O na ĩngĩ, nĩtwaĩle kwĩyĩĩkĩĩthya vyũ kana mawatho ma Yeova makeanĩa, o na ethĩwa twĩeteela ĩvinda yĩasavĩte ata. No tũlũlũmĩĩlye wĩkwatyo witũ kwa kwĩmanyĩsya Ndeto ya Ngai. Kwa ngelekanyʼo, no twĩmanyĩsye mawathani, ũndũ ũvoo ũla wĩ Mbivilianĩ ũkwatĩanĩe, na maũndũ ala Yeova ũvuanĩtye ĩũlũ wake mwene. (Sav. 1:​2, 3) O na ĩngĩ, nĩtwaĩlĩte kũendeea kũvoya ‘tũtongoewʼe nĩ veva mũtheu’ nĩ kana twĩthĩwe na ngwatanĩo nzeo na Yeova, o tweteele watho wake wa kwĩkala tene na tene wĩanĩe.—Yuta 20, 21.

O ta Mũsumbĩ Ndaviti, ĩthĩwa na mũĩkĩĩo vyũ kana Yeova nũmasũvĩaa ala mamweteela na nũmonasya ũseo wĩ wendo. (Sav. 33:​18, 22) Mweteele Yeova wĩ mũtanu na wĩ na wũmĩĩsyo kwa kũvindĩĩsya maũndũ maseo ala mekĩkĩte thayũnĩ waku, kũmũtaĩa, kũeka ana-a-asa na eĩtu-a-asa maku makwĩkĩe vinya, na kwa kũlũlũmĩĩlya wĩkwatyo waku.