Ɛlɛ, Yehowa sɔɔlaa se ɖɩɖaŋɩ-ɩ nɛ suuɖu nɛ ɛla mbʋ pɩpɔzʋʋ yɔ alɩwaatʋ ndʋ ɛɖʋwa yɔ tɩ-yɔɔ. Ɛbɛ yɔɔ ɛsɔɔlaa se ɖɩɖaŋɩ-ɩ nɛ suuɖu? Ɛbɛ pɩzɩɣ pɩsɩnɩ-ɖʋ nɛ ɖɩwɛɛ taa leleŋ taa alɩwaatʋ ndʋ ɖɩwɛɛ nɛ ɖɩɖaŋɩɣ yɔ?

ƐBƐ YƆƆ YEHOWA SƆƆLAA SE ÐƖÐAŊƖ-Ɩ NƐ SUUÐU?

Bibl yɔɔdʋʋ se: «Yehowa ɖaŋnɩ suuɖu se ɛna mɩ-pʋtɔdɩyɛ, nɛ ɛkaɣ kʋyʋʋ se ɛna mɩ-pʋtɔdɩyɛ. Mbʋ pʋyɔɔ yɔ Yehowa kɛ siɣsiɣ wɛtʋ tɛ Ɛsɔ. Koboyaɣ tɩnaa kɛlɛ mba payɩ pɛwɛ-ɩ ɖaŋʋʋ yɔɔ yɔ.» (Iza. 30:18) Kiɖe tɛɛ lɛ, Yuuda ñɩma kaañamtʋ tɩnaa Izaayii kaama tɔm ndʋ. (Iza. 30:1) Ɛlɛ ɛyaa siɣsiɣ tɩnaa nabɛyɛ kaawɛ Yuuda ñɩma mba pa-taa nɛ tɔm ndʋ tɩɩha-wɛ lidaʋ. Tɔm ndʋ tɩhaɣ ɖɔɖɔ lidaʋ Yehowa sɛyaa siɣsiɣ tɩnaa mba pɛwɛ sɔnɔ yɔ.

Ye mbʋ, pɩpɔzʋʋ se ɖɩɖaŋnɩ suuɖu, mbʋ pʋyɔɔ yɔ Yehowa wɛɛ nɛ ɛɖaŋɩɣnɩ suuɖu. Ɛɖʋ alɩwaatʋ ndʋ ɛkaɣ ɖɩzʋʋ ɛjaɖɛ kɩdɛkɛdɩyɛ ɖɩnɛ yɔ, nɛ ɛwɛɛ nɛ ɛɖaŋɩɣ se kɩyakʋ nɛ ñɩɣyʋʋ ŋgʋ ɛɖʋwa yɔ kɩtalɩ. (Mat. 24:36) Alɩwaatʋ ndʋ tɩ-taa, pɩkaɣ naʋ kpayɩ kpayɩ se tɔm ndʋ Eleeu yɔɔdaa nɛ ɛkaɖɩnɩ Yehowa nɛ Ɛ-sɛyaa yɔ tɩkɛ cɛtɩm. Ðɩnɛ ɛlɛ Yehowa kaɣ ɖɩzʋʋ Sataŋ nɛ mba payɩ patɩnɩɣ ɛ-yɔɔ yɔ, ɛlɛ ɛkaɣ ‘naʋ ɖa-pʋtɔdɩyɛ.’

Lɛɛlɛɛyɔ lɛ, pɩtɩla Yehowa ɛɛlɩzɩɣ-ɖʋ kala wena ɖɩkatɩɣ yɔ a-taa, ɛlɛ ɛha-ɖʋ lidaʋ se ɖɩpɩzɩɣ nɛ ɖɩwɛɛ taa leleŋ taa alɩwaatʋ ndʋ ɖɩwɛɛ nɛ ɖɩɖaŋɩɣ yɔ. Ɛzɩ Izaayii yɔɔdʋʋ yɔ, ɖɩpɩzɩɣ nɛ ɖɩwɛɛ taa leleŋ taa alɩwaatʋ ndʋ ɖɩwɛɛ nɛ ɖɩɖaŋɩɣ se pʋyʋ kɩbanʋ nɔɔyʋ ɛla yɔ. (Iza. 30:18) a Ɛbɛ ɖɩpɩzɩɣ ɖɩla nɛ ɖihiɣ taa leleŋ ɛnɩ? Ðɩpɩzɩɣ nɛ ɖɩkpɛzɩ nɩŋgbanzɩ 4.

ƐBƐ PƖZƖƔ PƖSƖNƖ-ÐƲ NƐ ÐƖWƐƐ TAA LELEŊ TAA ALƖWAATƲ NDƲ ÐƖWƐƐ NƐ ÐƖÐAŊƖƔ YƆ?

Ka ña-lɩmaɣza kɩbam mbʋ pɩtalɩɣ-ŋ ñe-wezuu caɣʋ taa yɔ pɩ-yɔɔ. Wiyaʋ Daviid na lakasɩ kɩdɛkɛdɩsɩ sakɩyɛ e-wezuu caɣʋ taa. (Keɣ. 37:35) Paa mbʋ yɔ ɛmawa se: «Su tamɩyɛ Yehowa ɛsɩndaa nɛ ŋɖaŋɩ-ɩ kpam. Ña-taa ɛtaawɩɩnɩ ɛyʋ weyi ɛ-tamasɩ kɩdɛkɛdɩsɩ ɖɔŋnɩ-ɩ camɩyɛ yɔ.» (Keɣ. 37:7) Daviid  maɣmaɣ ɖɔm lɔŋ tasʋʋ mbʋ pɩ-yɔɔ alɩwaatʋ ndʋ ɛkam ɛ-lɩmaɣza tamaɣ ŋga Yehowa labɩ-ɩ se ɛyakɩ ɛ-ñʋʋ yɔ kɔ-yɔɔ yɔ. Ɛɛwɛnɩ ɛsɩmɩyɛ ɖɔɖɔ kɩkam mbʋ payɩ Yehowa labɩ-ɩ yɔ pɩ-yɔɔ. (Keɣ. 40:5) Ye ɖa ɖɔɖɔ ɖɩkaŋ ɖa-lɩmaɣza kɩbam mbʋ pɩtalɩɣ-ɖʋ ɖe-wezuu caɣʋ taa yɔ pɩ-yɔɔ nɛ ɖɩɩkaŋ-yɛ ɖa-kala yɔɔ yɔ, pɩkaɣ-ɖʋ wɛʋ kɛlɛʋ se ɖɩɖaŋ Yehowa.

Wolo pɩ-yɔɔ nɛ ŋsaŋ Yehowa kaahɛzaɣ. Pɩwɛ ɛzɩ Daviid manɩ Keɣa 71 yɔ. Eheyi Yehowa se: «Mɛwɛɣ ɖaŋʋʋ yɔɔ; mankaɣ-ŋ sam nɛ pɩkɩlɩ.» (Keɣ. 71:14) Ɛzɩma tɩyɛ ɛsam Yehowa? Eheyi ɛyaa lalaa Yehowa tɔm nɛ etee-i samtʋ hendu. (Keɣ. 71:​16, 23) Ɛzɩ Daviid yɔ, ɖa ɖɔɖɔ ɖɩpɩzɩɣ nɛ ɖihiɣ taa leleŋ alɩwaatʋ ndʋ ɖɩwɛɛ nɛ ɖɩɖaŋɩɣ Yehowa yɔ. Ðɩsaŋɩ-ɩ alɩwaatʋ ndʋ ɖisusuu lalaa tɔm yɔ, alɩwaatʋ ndʋ ɖɩyɔɔdʋʋ ɛ-tɔm ɖa-taabalaa yaa ɖɔ-hɔʋ taa mba cɔlɔ yɔ nɛ alɩwaatʋ ndʋ ɖiteɣ ɖɛ-Ɛsɔ sɛtʋ hendu yɔ. Kɩyakʋ ŋgʋ ŋtasɩɣ teu Kewiyaɣ hendu natʋyʋ yɔ, maɣzɩ tɩ-taa tɔm pee yɔɔ camɩyɛ nɛ ɛzɩma ahaɣ-ŋ taa leleŋ yɔ pɩ-yɔɔ.

Yele nɛ ño-koobiya kpazɩ-ŋ ɖoŋ. Daviid kaakatɩ kala lɛ, eheyi Yehowa se: «Ñe-siɣsiɣ tɩnaa ɛsɩndaa, mankaɣ taʋ ña-hɩɖɛ liu.» (Keɣ. 52:9) Ða ɖɔɖɔ ɖɩpɩzɩɣ nɛ ɖihiɣ ɖoŋ kpazʋʋ alɩwaatʋ ndʋ ɖa nɛ ɖo-koobiya ɖɩwɛɣ kediɣzaɣ taa yaa tɔm susuu taa yɔ. Ðɩpɩzɩɣ ɖɔɖɔ nɛ ɖihiɣ ɖoŋ kpazʋʋ alɩwaatʋ ndʋ ɖa nɛ wɛ ɖɩmʋʋ helim yɔ.—Roma 1:​11, 12.

Cɛyɩsɩ ñe-lidaʋ. Keɣa 62:5 yɔɔdʋʋ se: «Monsum tamɩyɛ nɛ manɖaŋ Ɛsɔ mbʋ pʋyɔɔ yɔ ɛ-cɔlɔ me-lidaʋ lɩɣna.» Pɩcɛyaa kpem se ɖe-lidaʋ ɛwɛɛ ɖoŋ kɔzɩ kɔzɩ ye ɛjaɖɛ tɛm ɛɛkɔŋ lɔŋ ɛzɩ ɖɩmaɣzʋʋ yɔ. Pɩwɛɛ se ɖa-taa ɛtɛ se Yehowa tamasɩ kaɣ labʋ paa alɩwaatʋ ɛzɩma pɩpɔzʋʋ se ɖɩɖaŋ yɔ. Ye ɖɩkpɛlɩkɩɣ Ɛsɔtɔm yɔ, pɩpɩzɩɣ nɛ pɩcɛyɩsɩ ɖe-lidaʋ. Ðɩpɩzɩɣ nɛ ɖɩmaɣzɩ tɔm ndʋ payɩ Bibl yɔɔdaa nɛ tɩla ɖeyi ɖeyi yɔ tɩ-yɔɔ yaa ɛzɩma Bibl mayaa ndɩ ndɩ tɔm labɩ nɔɔ kʋɖʋmaɣ yɔ pɩ-yɔɔ. Ðɩpɩzɩɣ nɛ ɖɩmaɣzɩ ɖɔɖɔ tɔm ndʋ Yehowa yɔɔdɩ ɛ-maɣmaɣ ɛ-yɔɔ yɔ tɩ-yɔɔ. (Keɣ. 1:​2, 3) Pɩtasɩ lɛ, ɖɩwɛɣ nɛ ɖɩɖaŋɩɣ se tamaɣ ŋga Yehowa laba se ɛhaɣ-ɖʋ wezuu maatɛŋ yɔ kala lɛ, pɩwɛɛ se ɖiwolo pɩ-yɔɔ nɛ ‘ɖɩtɩmɩ fezuu kiɖeɖeu ɖoŋ taa’ se pɩsa nɛ taabalɩyɛ kɩbanɖɛ nɖɩ ɖɩwɛ ɖa nɛ Yehowa ɖɛ-hɛkʋ taa yɔ, ɖɩwɛɛ tam.—Yud. 20, 21.

Ɛzɩ Wiyaʋ Daviid yɔ, ña-taa ɛtɛ se Yehowa kandɩyɩɣ mba paɖaŋɩɣ-ɩ yɔ pɔ-yɔɔ nɛ ɛwɩlɩɣ-wɛ Ɛ-sɔɔlɩm siɣsiɣ ñɩmbʋ. (Keɣ. 33:​18, 22) Wɛɛ Yehowa ɖaŋʋʋ yɔɔ nɛ suuɖu. Ɛzɩma tɩyɛ? Ka ña-lɩmaɣza kɩbam mbʋ pɩtalɩɣ-ŋ ñe-wezuu caɣʋ taa yɔ pɩ-yɔɔ, saŋ Yehowa kaahɛzaɣ, yele nɛ ño-koobiya kpazɩ-ŋ ɖoŋ nɛ ŋcɛyɩsɩɣ ñe-lidaʋ.