Kansi Yehowa ke zolaka nde beto vingila yandi ti ntima-nda yonso tii na ntangu yina yandi mosi me tulaka. Sambu na nki yandi ke zola nde beto vingila yandi? Inki lenda sadisa beto na kuvanda na kiese ntangu beto ke vingila yandi?

SAMBU NA NKI YEHOWA KE ZOLA NDE BETO VINGILA YANDI?

Biblia ke tuba nde: “Yehowa ke vingila ti kukanga-ntima yonso sambu na kumonisila beno ntima ya mbote, mpi yandi ta telama sambu na kuwila beno mawa. Sambu Yehowa kele Nzambi ya lunungu. Kiese na bantu yonso yina ke landa kuvingila yandi.” (Yez. 30:18) Yezaya sonikaka mambu yina sambu na bantu ya Yuda yina vandaka ntu-ngolo. (Yez. 30:1) Kansi sambu na Bayuda yina vandaka kusambila Yehowa na mutindu ya mbote, mambu yina pesaka bo kivuvu. Mambu yina ke pesa mpi bansadi ya Yehowa ya bubu yai kivuvu.

Yo yina, beto fwete vingila ti ntima-nda yonso sambu Yehowa mpi ke vingilaka ti ntima-nda yonso. Yandi me tulaka kilumbu yina yandi ta fwa nsi-ntoto yai, mpi yandi ke vingilaka ti ntima-nda yonso nde kilumbu yango kulunga. (Mat. 24:36) Na ntangu yina, yo ta monana kibeni pwelele nde mambu yonso yina Satana tubaka sambu na Yehowa mpi sambu na bansadi na yandi kele ya luvunu. Yandi ta katula Satana mpi bantu yonso yina ke vandaka na lweka na yandi, kansi yandi ta ‘monisila beto ntima ya mbote.’

Kansi bubu yai, Yehowa ta katula ve bampasi na beto. Yandi ke ndimisa beto nde beto lenda vanda na kiese ntangu beto ke vingila yandi. Mutindu Yezaya tubaka yo, beto lenda vanda na kiese ntangu beto ke vingila nde kima mosi ya mbote kusalama. (Yez. 30:18) a Inki mutindu beto lenda vanda na kiese? Kele ti mambu iya yina lenda sadisa beto.

INKI MUTINDU BETO LENDA VANDA NA KIESE NTANGU BETO KE VINGILA?

Tula dikebi na mambu ya mbote yina ke kumina nge. Ntotila Davidi monaka mambu mingi ya mbi na luzingu na yandi. (Nk. 37:35) Kansi yandi sonikaka nde: “Vanda pima na ntwala ya Yehowa mpi vingila yandi ti kivuvu. Kuwa ve makasi sambu na muntu Yina ke nunga na kulungisa bangindu na yandi ya  mbi.” (Nk. 37:7) Davidi yandi mosi sadilaka ndongisila yina ntangu yandi vandaka kutula dikebi na balusilu ya Yehowa ya kugulusa yandi. Yandi vandaka mpi kumonisa ntonda sambu na mambu ya mbote yina Yehowa vandaka kusadila yandi. (Nk. 40:5) Kana beto mpi beto ke tula dikebi na mambu ya mbote yina ke salama na luzingu na beto kansi ve na mambu ya mbi, yo ta vandila beto pete na kuvingila Yehowa.

Kumisa Yehowa na konso dibaku. Yo ke monana nde Davidi muntu sonikaka Nkunga 71. Yandi songaka Yehowa nde: “Mono ta landa na kuvingila; mono ta pesa nge diaka lukumu mingi kuluta.” (Nk. 71:14) Inki mutindu yandi kumisaka Yehowa? Yandi songaka bantu ya nkaka mambu ya me tala Yehowa mpi yimbilaka yandi bankunga ya lukumu. (Nk. 71:16, 23) Bonso Davidi, beto lenda vanda na kiese ntangu beto ke vingila Yehowa. Beto ke kumisaka yandi ntangu beto ke longaka nsangu ya mbote, ntangu beto ke tubilaka mambu na yandi na masolo na beto ya konso kilumbu mpi ntangu beto ke yimbaka bankunga na beto. Na mbala ya nima yina nge ta yimba nkunga na beto mosi, yindula mbote-mbote bangogo na yo mpi mutindu yo ke pesa nge kiese.

Baka kikesa na bampangi. Ntangu Davidi kutanaka ti bampasi, yandi songaka Yehowa nde: “Na ntwala ya bantu na nge ya kwikama, mono ta tula kivuvu na zina na nge.” (Nk. 52:9) Beto mpi beto lenda baka kikesa na bampangi na beto, kaka ve na balukutakanu mpi na kisalu ya kulonga kansi mpi ntangu beto ke lutisa ntangu ti bo.​—Bar. 1:11, 12.

Kumisa kivuvu na nge ngolo. Nkunga 62:5 ke tuba nde: “Mono ke vingila Nzambi na pima yonso, sambu kivuvu na mono ke katukaka na yandi.” Yo kele mfunu mingi na kuvanda ti kivuvu ya ngolo, mingi-mingi kana nsuka ya nsi-ntoto yai ke kwisa ve nswalu mpila beto vandaka kuyindula. Beto fwete ndima kibeni nde balusilu ya Yehowa ta lungana kaka ata beto me vingila yo bantangu mingi. Longuka Ndinga ya Nzambi. Mu mbandu, yindula baprofesi yonso ya Biblia yina me lunganaka dezia, yindula mutindu mambu yina bo me sonikaka na Biblia ke wakanaka, mpi mambu yina Yehowa ke tubaka ya me tala yandi mosi. (Nk. 1:2, 3) Diaka, beto fwete landa ‘kusamba ti mpeve santu’ sambu beto landa kuvanda ti kinduku ya mbote ti Yehowa ntangu beto ke vingila nde lusilu na yandi ya luzingu ya mvula na mvula kulungana.​—Yude 20, 21.

Bonso ntotila Davidi, ndima kibeni nde Yehowa ke talaka bantu yina ke vingilaka yandi mpi yandi ke monisilaka bo zola na yandi ya kwikama. (Nk. 33:18, 22) Tula dikebi na mambu ya mbote yina ke kumina nge. Kumisa Yehowa. Baka kikesa na bampangi mpi landa kukumisa ngolo kivuvu na nge sambu na kulanda kuvingila Yehowa ti ntima-nda yonso.