No Jehova endaga tweterere tũkirĩrĩirie oe ikinya ihinda rĩrĩa amũrĩte. Hihi endaga twĩke ũguo nĩkĩ? Nĩ kĩĩ kĩngĩtũteithia gũkorũo na gĩkeno o twetereire?

JEHOVA ENDAGA TWETERERE NĨKĨ?

Bibilia yugaga ũũ: “Jehova nĩ etereire akirĩrĩirie nĩguo amuonie ũtugi, na nĩ ekwarahũka nĩguo amuonie tha. Nĩ gũkorũo Jehova nĩ Ngai wa kĩhooto. Gũkena nĩ arĩa othe maikaraga mamwetereire.” (Isa. 30:18) Kĩambĩrĩria-inĩ ciugo icio cia Isaia cierekagĩrio harĩ Ayahudi aremi. (Isa. 30:1) No nĩ kwarĩ na Ayahudi amwe ehokeku, na ciugo icio nĩ ciamaheire kĩĩrĩgĩrĩro. O na ũmũthĩ, ciugo icio nĩ iheaga ndungata njĩhokeku cia Jehova kĩĩrĩgĩrĩro.

Kwoguo twagĩrĩirũo gweterera tũkirĩrĩirie tondũ o nake Jehova nĩ etereire akirĩrĩirie. Nĩ amũrĩte ihinda rĩrĩa akaaniina mũtabarĩre ũyũ, na nĩ etereire mũthenya ũcio ũkinye. (Mat. 24:36) Ihinda rĩu rĩakinya, nĩ gũkooneka wega atĩ thitango cia Shaitani kwerekera Jehova na ndungata ciake nĩ cia maheeni. Jehova agaacoka aniine Shaitani na arĩa othe mamũnyitaga mbaru, no ithuĩ nĩ ‘agaatuonia tha.’

No kwa ihinda rĩrĩ, Jehova no age gũtwehereria magerio, ĩndĩ atwĩrĩire atĩ no tũkorũo na gĩkeno o twetereire. O ta ũrĩa Isaia augĩte, no tũkorũo na gĩkeno o twetereire maũndũ mega mekĩke. (Isa. 30:18) a No hihi tũngĩgĩa na gĩkeno atĩa? Rekei twarĩrĩrie maũndũ mana mangĩtũteithia.

ŨRĨA TŨNGĨGĨA NA GĨKENO O TWETEREIRE

Igaga meciria harĩ maũndũ marĩa mega. Ũtũũro-inĩ wake wothe, Mũthamaki Daudi nĩ eeyoneire maũndũ maingĩ moru magĩkĩka. (Thab. 37:35) O na kũrĩ ũguo, aaugire ũũ: “Kiraga ũrĩ mbere ya Jehova na ũmwetagĩrĩre ũtegũthethũka. Ndũgatangĩkage nĩ ũndũ wa mũndũ ũrĩa ũragaacĩra harĩ kũhingia njama ciake.” (Thab. 37:7) Daudi we mwene nĩ aarũmĩrĩire ũtaaro ũcio na njĩra ya kũiga meciria make harĩ kĩĩrĩgĩrĩro kĩa ũhonokio. Ningĩ nĩ eeririkanagia irathimo iria aamũkĩrĩte kuuma kũrĩ Jehova. (Thab. 40:5)  O na ithuĩ tũngĩigaga meciria maitũ harĩ maũndũ marĩa mega, tũtegũtahwo mũno nĩ maũndũ moru marĩa tũrona magĩkĩka, nĩ ũrĩkoragwo ũrĩ ũndũ mũhũthũ gweterera Jehova.

Caragia mĩeke mĩingĩ ya kũgooca Jehova. Mwandĩki wa Thaburi 71, na no kũhoteke nĩ Daudi, eerire Jehova ũũ: “Nĩ ngũthiĩ na mbere gweterera; nĩ ngũkũgooca o na makĩria.” (Thab. 71:14) Hihi aagoocaga Jehova atĩa? Na njĩra ya kwĩra arĩa angĩ ũhoro wĩgiĩ Jehova na kũina nyĩmbo cia kũmũgooca. (Thab. 71:​16, 23) O ta Daudi, o na ithuĩ no tũkorũo na gĩkeno o tũgĩetagĩrĩra Jehova, na njĩra ya kũmũgooca kũgerera kũhunjia, kwaria ũhoro wake rĩrĩa tũrĩ hamwe na arata na andũ a famĩlĩ, na kũina nyĩmbo cia kũmũgooca. Rĩrĩa ũraina rwĩmbo rwa Ũthamaki-rĩ, na githĩ to wĩcũranie ũrĩa ciugo ciaruo ingĩgwĩkĩra hinya?

Rekaga aarĩ na ariũ a Ithe witũ magwĩkĩre ngoro. Rĩrĩa Daudi aacemanagia na moritũ, eerire Jehova ũũ: “Ndĩ mbere ya andũ aku arĩa ehokeku-rĩ, nĩ ndĩrĩĩrĩgagĩrĩra rĩĩtwa rĩaku.” (Thab. 52:9) O na ithuĩ no twĩkĩrũo ngoro nĩ aarĩ na ariũ a Ithe witũ, na to rĩrĩa tũrĩ mĩcemanio-inĩ na ũtungata-inĩ, ĩndĩ nĩ nginya tũrĩ maũndũ-inĩ ma gwĩkenia.—Rom. 1:​11, 12.

Ĩkĩraga kĩĩrĩgĩrĩro gĩaku hinya. Thaburi 62:5 yugaga: “Niĩ njetagĩrĩra Ngai o ngirĩte tondũ kĩĩrĩgĩrĩro gĩakwa kiumaga kũrĩ we.” Nĩ ũndũ wa bata gũkorũo na kĩĩrĩgĩrĩro kĩrũmu, makĩria angĩkorũo tũrona ta mũico ũikarĩte gũkĩra ũrĩa twerĩgagĩrĩra. No mũhaka tũkorũo na ma atĩ ciĩranĩro cia Jehova nĩ ikaahinga, gũtekũmakania nĩ ihinda rĩigana atĩa tũkũbatara gweterera. No twĩkĩre kĩĩrĩgĩrĩro gitũ hinya tũngĩthuthuria Bibilia, ta morathi marĩa marĩkĩtie kũhinga, ũrĩa andĩki matiganĩte a Bibilia maandĩkire maũndũ maratwarana, na maũndũ marĩa Jehova aguũrĩtie mamwĩgiĩ. (Thab. 1:​2, 3) Ningĩ nĩ tũrabatara ‘kũhoyaga tũrĩ na roho mũtheru’ nĩguo tũtũũrie ũrata mwega na Jehova, o twetereire kĩĩranĩro gĩake kĩa muoyo wa tene na tene kĩhinge.—Jud. 20, 21.

O ta Mũthamaki Daudi, koragwo na ma atĩ Jehova nĩ aroraga andũ arĩa mamwetagĩrĩra, na akamonia wendo mwĩhokeku. (Thab. 33:​18, 22) Thiĩ na mbere gweterera Jehova ũkirĩrĩirie na njĩra ya kũigaga meciria maku harĩ maũndũ marĩa mega ũtũũro-inĩ waku, kũmũgoocaga, kũrekaga aarĩ na ariũ a Ithe witũ magwĩkĩre ngoro, na gwĩkĩraga kĩĩrĩgĩrĩro gĩaku hinya.