Kala wa hafa, ofimbo wa teelela kuJehova nelididimiko
MBELA owa teelela nodjuulufi efimbo olo, eshi Jehova ta ka xulifa po oukolokoshi aushe nokuninga keshe shimwe shipe? (Eh. 21:1-5) Osho naanaa. Ashike haalushe hashi kala shipu okuteelela kuJehova nelididimiko, unene tuu ngeenge twa taalela omaupyakadi. Okukala twa teelela efimbo lile ohashi tu ehameke komutima. — Omayel. 13:12.
Jehova okwa hala tu kale twa teelela nelididimiko a katuke onghatu peufwafimbo laye. Omolwashike a teelela tu ninge ngaho? Oshike tashi dulu oku tu kwafela tu kale twa hafa, ofimbo twa teelela?
OMOLWASHIKE JEHOVA A HALA TU KALE TWA TEELELA?
Ombiibeli oya ti: “Omwene ota teelele a shiive oku mu fila onghenda, opo nee ota fikama e mu file olukeno, osheshi Omwene Oye Kalunga kouyuki. Ovanelao aveshe ava have mu teelele.” (Jes. 30:18, KB-13) Eendjovo odo daJesaja oda li da yukifwa kOvajuda, ovo va li ve na omitwe dikukutu. (Jes. 30:1) Ashike opa li Ovajuda ovo va li ovadiinini, neendjovo odo oda li de va pa eteelelo. Kunena, eendjovo odo ohadi yandje eteelelo kovapiya vaJehova ovadiinini.
Otu na okukala twa teelela nelididimiko, molwaashi Jehova naye okwa teelela nelididimiko. Okwa tula po eufwafimbo laye, eshi ta ka xulifa po ounyuni ou, nokwa teelela efiku olo novili i fike. (Mat. 24:36) Pefimbo olo, otashi ke limonikila mo filufilu kutya Ondiaboli oya lundila Jehova nosho yo ovo have mu longele. Ota ka hanauna po Satana nosho yo ovo have mu yambidida, ashike Jehova ote ke tu ‘udila olukeno.’
Ofimbo twa teelela, Jehova otashi dulika aha kufe po omaupyakadi etu, ashike okwe tu udanekela kutya ohatu dulu okukala twa hafa, ofimbo twa teelela. Jesaja okwa ti ohatu dulu okukala twa hafa, ofimbo twa teelela nodjuulufi oinima iwa i ningwe. (Jes. 30:18) Ongahelipi hatu dulu okumona ehafo olo? Apa otapa landula oitwa ine, oyo tai dulu oku tu kwafela.
NGHEE HATU DULU OKUKALA TWA HAFA, OFIMBO TWA TEELELA
Yandja elitulemo koinima oyo iwa. Ohamba David oya li ya mona oukolokoshi muhapu monghalamwenyo yayo aishe. (Eps. 37:35) Oya li ya shanga, tai ti: “Kala wa mwena koshipala shaJehova, nokuteelela nelineekelo kuye. Ino handukifwa komunhu, oo ha pondola mokuwanifa po eemhangela daye.” (Eps. 37:7, NWT-E) David okwa li a tula moilonga omayele oo, nokuyandja elitulemo komaudaneko aJehova oku mu xupifa. Okwa li yo e na olupandu loinima iwa aishe oyo Jehova e mu ningila. (Eps. 40:5) Nafye ngeenge otwa kala tu na etaleko liwa li na sha nonghalo yetu, noitatu yandje elitulemo koinima ii, oyo ye tu dingilila, ohatu ka mona shipu okuteelela kuJehova.
Kala we lipyakidila nokutanga Jehova. Omushangi wEpsalme 71, tashi dulika David, okwa lombwela Jehova, a ti: “Onda hala okuteelela efimbo alishe, nokutandavelifa efimano loye.” (Eps. 71:14, KB-13) Ongahelipi a li a dula okutanga Jehova? Okwa li ha lombwele vamwe kombinga yaJehova, nokwiimba omaimbilo te mu tange. (Eps. 71:16, 23) Ngaashi David, ohatu dulu okumona ehafo, ofimbo twa teelela Jehova a katuke onghatu. Ohatu mu tange, ngeenge hatu udifile vamwe, ngeenge hatu popi kombinga yaye nookaume ketu nosho yo ovaneumbo letu nongeenge hatu imbi omaimbilo. Moshikando tashi uya, ngeenge to imbi eimbilo lOuhamba, omolwashike ito yandje elitulemo ketumwalaka lalo tali tu omukumo?
Mona etwomukumo okudja kovamwatate novamwameme. Eshi David a li a taalela omashongo, okwa li a lombwela Jehova, a ti: ‘Moipafi yovayuki voye onda hala okuteelela edina loye.’ (Eps. 52:9, KB-13) Nafye ohatu dulu okumona etwomukumo okudja kovalongelikalunga vakwetu ovadiinini, hangeenge ashike tu li pokwoongala, ile moukalele, ndele nongeenge yo twa ongala pamwe pouvilo. — Rom. 1:11, 12.
Kaleka eteelelo loye la twa. Epsalme 62:5, KB-13 ola ti: “Lota, muKalunga amuke, omwenyo wange, osheshi kuye otaku di eteelelo lange.” Osha fimana okukaleka eteelelo letu la twa, unene tuu ngeenge exulilo inali uya diva ngaashi twa li twa teelela. Otu na okukala twa tomhwa kutya omaudaneko aJehova otaa ka wanifwa po, kashi na nee mbudi kutya otu na oku a teelela oule wefimbo li fike peni. Ohatu dulu okukaleka eteelelo letu la twa mokukonakona Eendjovo daKalunga. Pashihopaenenwa, diladila koinima aishe oyo Ombiibeli ya xunganeka, ndele oya wanifwa shili. Diladila yo kunghee ovashangi vOmbiibeli va yoolokafana tava tu kumwe nosho yo kouyelele oo Jehova a holola kombinga yaye mwene. (Eps. 1:2, 3) Shikwao vali, otwa pumbwa okutwikila ‘okwiilikana metwokumwe nomhepo iyapuki,’ opo tu kaleke po ekwatafano letu liwa naJehova, ofimbo twa teelela eudaneko laye lomwenyo waalushe li wanifwe po. — Jud. 20, 21.
Ngaashi ohamba David, kala u na elineekelo kutya Jehova ota pashukile ovo va teelela kuYe, nohe va ulikile ohole i na oudiinini. (Eps. 33:18, 22) Kala wa teelela kuJehova nelididimiko mokuyandja elitulemo koinima iwa monghalamwenyo yoye, moku mu tanga, mokumona etwomukumo okudja kEendombwedi dikweni nosho yo mokukaleka eteelelo loye la twa.
