Jehovalli piumasaraa piffissarititamini iliuuseqar­nissaanut naammagit­tarluta utaqqis­sasugut. Sooq taama piumasaqarfigaatigut? Utaqqinitsinnilu qanoq nuannaarsin­naavugut?

SOOQ JEHOVAP UTAQQEQ­QUAATIGUT?

Biibilimi ima allassimavoq: “[Jehova] ajunngisaarfigiumallusi naammagit­tarluni utaqqivoq, nallittorumallusilu iliuuseqassaaq. Jehovami Guutiuvoq naapertuil­luartoq. Qilanaar­tuarlutik taassuminnga utaqqisut tamarmik pilluarput.” (Es 30:18, NW) Iisaajap allatai taakku juutinut naalasseriitsunut allataapput. (Es 30:1) Aammali aalajaatsunik ilaqarput, taakkualu Iisaajap allatai neriuuteqalis­sutigaat. Aamma nalitsinni Jehovap kiffaasa aalajaatsut neriuuteqalis­sutigaat.

Tassa Jehovap naammagit­tarluni utaqqimmat uagut naammagit­tarluta utaqqisariaqarpugut. Jehovap aalajangereersimavaa qaqugorpiaq pissutsit ajortut atuukkun­naarsin­niarlugit, piffissallu tamatuma nalliunnissaa utaqqivaa. (Mat 24:36) Tamanna nalliuppat Jehovamut taassumalu kiffaanut Diaavulup unnerluus­sutaasa ilumuun­nginnerat paasineqassaaq. Taava Saatani taassuminngalu tapersersuisut kikkulluunniit Jehovap piissavai, uagulli ‘nallittus­savaatigut’.

Tamanna nalliutserlugu Jehovap misilin­neqarnigut pinngitsoor­tinnavianngilai, neriorsorpaatigulli utaqqinitsinni nuannaarsin­naasugut. Iisaajap allaatigisaatut pisussaq nuannersoq qilanaaralugu pilluarsin­naavugut. (Es 30:18) Iliuuserineqartussat sisamat pilluar­nissamut iluaqutigisin­naasagut suuppat?

UTAQQININNI QANOQ NUANNAARSIN­NAASUTIT

Nuannersut eqqarsaatigisakkit. Kunngi Daavi inuunermini ajortorpas­suarnik takusaqarsimavoq. (Tuss 37:35) Taamaak­kaluartorli ima allappoq: “Eqqissillutit Naalagaq utaqqiuk, kamassaatigeqinagu iluanaarajuttoq pilersaarutiminik iluatsitsisartoq.” (Tuss 37:7) Jehovap ikiuinis­saminik neriorsuutaata eqqarsaatigineratigut Daavi taamaaliorpoq. Aamma pilluaq­qussutit Jehovameersut tamaasa maluginiartarpai. (Tuss 40:6) Uaguttaaq inuunitsinni nuanniitsut pinnagit nuannersut  eqqarsaatiginerugutsigit Jehovap utaqqinissaa ajornan­nginnerutis­savarput.

Jehovap unnersiutiginissaanut periarfis­sarsiortuarit. Tussiaat 71-imik tussiaasiortoq, Daaviugunartoq, Jehovamut ima oqarpoq: ‘Uanga neriuttuin­nassaanga, unnersiutigiuas­savakkillu.’ (Tuss 71:14) Qanoq ililluni Jehova unnersiutigissavaa? Jehova pillugu allat oqaluttuutissavai erinalimmillu unnersiutigalugu. (Tuss 71:16, 23) Daavi ilaarlugu Jehovap utaqqinerani nuannaarsin­naavugut. Oqaluus­sinitsinni, allanik oqaloqateqar­tarnitsinni erinarsuutigullu atorlugit unnersiutigisarparput. Tulliani erinarsuutitta ilaannik erinarsoruit taallai nuannersut eqqarsaatigeq­qissaakkit.

Uppeqatitit nakussatsis­sutigisakkit. Daavip ajornar­torsior­nermini Jehova ima oqarfigaa: “Ilinnut upperluartut peqatigalugit tunaarlerfigaara aqqit, ajunngitsuummat.” (Tuss 52:11) Uaguttaaq ataatsimiinnerni, oqaluus­sinermi aamma allatigut uppeqatigut peqatigigaangatsigit taakkunannga qiimmas­sarneqarsin­naavugut. – Rom 1:11, 12.

Neriuut upperil­luinnaruk. Biibilimi ima allassimavoq: ‘Guuti kisiat utaqqiuk nipangerlutit, tarniga, neriugisara taassumannga pissammat.’ (Tuss 62:6, tastamantitoĸaĸ 1961-imi naqitigaq) Neriuutip upperil­luinnarnera pingaaruteqangaarpoq – ingammik naggatissaq ilimagisatsinniit nalliutiaan­ngimmat. Qanorluunniit sivisutigisumik utaqqisariaqaraluarutta upperil­luinnar­tariaqarpagut Jehovap neriorsuutigisaasa piviusun­ngornissaat. Biibilip misissor­neratigut uppernerput nakussatsis­sinnaavarput. Assersuutigalugu siulittuutit, Biibilimi allassimasut imminnut ataqatigiil­luarnerat Jehovallu imminut pilluni oqaasii misissorsin­naavatit. (Tuss 1:2, 3) Aamma Jehovap inuunermik naassaan­ngitsumik neriorsuutaata eqquunnissaa utaqqitillugu taassumunnga ikinngutaajuarumalluta ‘anersaamit illernartumit siulersor­tilluta qinusassaagut’. – Juud 20, 21.

Daavitut qularis­sanngilat Jehovap imminut utaqqisut sernigisarai ilumoorfigin­nillunilu asanninnini taakkununnga ersersit­tarlugu. (Tuss 33:18, 22) Naammagit­tarlutit Jehovap utaqqinerani inuuninni nuannersut eqqarsaatigisakkit, Jehova unnersiutigisaruk, uppeqatitit nakussatsis­sutigisakkit neriuutillu erlinnartoq upperil­luinnarlugu.