Maji ne kiki, Jihova wamesena kwila tu kingila ni mwanyu woso o kithangana kya xindi mwene phala kubatula o maka. Mukonda dyahi mwene wamesena kwila tubhanga kiki? Ihi itena kutukwatekesa kusanguluka kyoso ki tuya ni kukingila?

MUKONDA DYAHI JIHOVA WAMESENA KWILA TU KINGILA?

O Bibidya yamba: “Kyene-phe kya-nda ku kingila Jihova ku mi kwatela henda; kyene kya-nda ku mi zangumwina phala ku mi lendukila, mukonda Jihova wene Nzambi ya kutetuluka; azediwa oso a kinga kwa Mwene.” (Iza. 30:18) O izwelu yiyi ya Izaya a isonekene kya dyanga phala o Jijudé ja bhukumukine. (Iza. 30:1) Maji mwaxaxe ka Jijudé jenyojo mwexile we athu exile jifiyele. Phala o jifiyele jojo, o izwelu yiyi ya abhana kidyelelu. O izwelu yiyi ibhana we kidyelelu ku jiselevende ja fiyele ja Jihova lelu.

Etu twatokala kukinga ni mwanyu woso mukonda Jihova wamukinga we ni mwanyu woso. Mwene waxindi kya o kithangana kyanda bheka o dizubhilu dya mundu yu, anga wamukingila o kizuwa ni ola yenyoyo kubhixila. (Mat. 24:36) Kyoso kyanda bhixila o kithangana kyenyokyo, twanda tena kumona ni kidi kyoso kwila, o ima yoso ya tatela Dyabhu kwa Jihova ni ku jiselevende Jê, ya makutu. Mu kusuluka, Jihova wanda bwika Satanaji ni oso ala ku mbandu ye, maji etu anda tu “kwatela henda.”

Mu kithangana kiki, Jihova nange kanda katula o ibhidi yetu, maji mwene utudyelelesa kwila tutena kusanguluka kyoso ki tuya ni kukinga. Kala kyambe Izaya, etu tutena kusanguluka mu kukingila o ima yambote. (Iza. 30:18) a Kyebhi ki tutena kukala ni kusanguluka kuku? Tumone ima iwana itena kutukwatekesa.

KYEBHI KI TUTENA KUSANGULUKA KYOSO KITUYA NI KUKINGA

Xinganeka ku ima yambote yamubhita ku mwenyu we. Ku mwenyu we woso, Sobha Davidi wamono kuyibha kwavulu. (Jisá. 37:35) Ne kiki, mwene wasoneka: “Nyohena kwa Jihova, u mu kinge kimwanu; kana kulalama mukonda dya yó wedi kala wa mu zediwila mu njila ye yengi, u xinganeka jindunge jayibha, anga uya mwene ni ku ji bhanga.” (Jisá. 37:7) Davidi wa kayela we o kitendelesu kiki mu kulunga o muxima we  ku ikanenu ya Jihova ya kumubhulula. Mwene we wexile musakidila Jihova mu ima yoso yambote yexile mu mubhanga. (Jisá. 40:5) Se tu kolokota mu kuxinganeka mu ima yambote yamubhita ku mwenyu wetu, sé kudikwatenena mu ima yayibha, ki kyanda tubhonza kukingila kwa Jihova.

Katula mbote mu ithangana yoso iwala nayu phala kuximana Jihova. O musoneki wa Sálamu ya 71, nange Davidi, wambe kwa Jihova: “Ngi dyelela jinga kokwé sé kufula, ngi kuximana jinga mwene ngi tona, kizuwa ni kizuwa.” (Jisá. 71:14) Kyebhi mwene kyeji ximana Jihova? Mwene weji tena kutangela akwa yalungu ni Jihova, ni kwimba mimbu phala ku muximana. (Jisá. 71:​16, 23) Kala Davidi, etu we tutena kusanguluka kyoso kituya ni kukingila Jihova. Tu muximana kyoso ki tubokela akwetu, tuzwela yalungu ni mwene ku makamba m’etu ni jindandu, ni kyoso ki twimba o mimbu yetu. Mu ithangana ku pholo, kyoso ki wanda kwimba o mimbu yetu ya ubhezelu, xinganeka kyambote mu izwelu ya mimbu. Xinganeka we mu kisangusangu ki kubhekela o mimbu yiyi.

Tambula o kiswinisu kijila ku jiphange jetu. Kyoso Davidi kya dibhanene ni ibhidi, mwene watangela kwa Jihova: ‘Ngi dyelela jinga mu dijina dye, kuma dijina didi dyambote bhu pholo ya athu’e a kukala fiyele.’ (Jisá. 52:9) Etu we tutena kutambula kiswinisu kya jiphange jetu, kana ngo mu yonge ni mu sidivisu ya kuboka, maji we ni mu ithangana ya kutonoka.—Lom. 1:​11, 12.

Kolesa o kidyelelu kye. O Jisálamu 62:5 yamba: “Muxima wami di xibhyé, u kinge ngo Nzambi; mukonda kudyelela kwami kutunda ngo kwa mwene.” Kima kyambote kukala ni kidyelelu kya kolo, benge-benge se o dizubhilu ki dya lenguluka mu kwiza kala ki twexile mu xinganeka. Twatokala kuxikina ni kidi kyoso kwila o ikanenu ya Jihova yanda dikumbidila, ne mwene se kubhinga kukinga kyavulu. Tutena ku kolesa o kidyelelu kyetu mu kudilonga o Mak’a Nzambi. Mu kifika, xinganeka mu ima yoso yakanena o Bibidya kwila yanda dikumbidila, kyebhi o asoneki a Bibidya sumbala kadifwile maji o ima yasoneka yene imoxi. Xinganeka we mu ima ijimbulula Jihova yalungu ni mwene. (Jisá. 1:​2, 3) Twatokala we kusuluka mu kusamba “mukutena kwa nzumbi ikôla” phala tukale jinga ni ukamba wambote ni Jihova, kyoso kituya ni kukingila o kikanenu kye kya mwenyu wa kalelaku kudikumbidila.—Jud. 20, 21.

Kala Sobha Davidi, dyelela kwila o mesu ma Jihova ala kwa yo ene mumukingila, ni kwila Mwene wanda ku alondekesa o henda Yê yafiyele. (Jisá. 33:​18, 22) Kolokota mu kukinga kwa Jihova ni mwanyu woso, mu ku xinganeka ku ima yambote yamubhita ku mwenyu we, mu ku muximana, mu kutambula o kiswinisu kibhana jiphange jetu, ni mu ku suluka mu kukolesa o ukamba we ni Jihova.