Cikwaabw, Yehow ukaakaam bwa tumwiimanyinok ni kutukij koos bwa kulongey myand ha ciisang cidyey mulongolol. Bwabiny Yehow ukaakaam bwa tumwiimanyinok? I biny bidy mwa kwiitwambulwiish bwa kwiikal ni musangal hatucidy bamwiimanyinok?

BWABINY YEHOW UKAAKAAM BWA TUMWIIMANYIN?

Bibl uleeleeb neey: “Mawej [Yehow] i mutakamin neey wiiyiiy teng kwiinulongel bilengel. Naak wiiyiiy kujuuk bwa kwiiy kwiinufwiiley lus. Bwaal Mawej [Yehow] i Mawej muwaakan. Biin dyaakatook i baat bataatakamin kudyey.” (Ye. 30:18) May ma Yeshaay aam, i maakadyobw bambil biin Yuud ba mut mukasakan. (Ye. 30:1) Ki kwaakady bamw ba ku biin Yuud baakady ni lulamat, ni may aam miibaakishil kutakamin. May maakaabumw aam maakaakish leeloow biin mudimw ba lulamat ba Yehow kutakamin.

Nook bikaam twiimayinok Yehow ni kutuukij, bwaal yiy byend i mwiimanyinok ni kutukij. Udy ni ciisang cidyey musungul bwa kutwiish bulongolody oobw ku bulekel, ni ucidy mwangat lutuul bwa diifuk ni diib aady bikumban. (Mat. 24:36) Ciisang aacy, biiyiiy kumweek haatook neey, myand yoos yidy Dyaabol mudingidilomw Yehow ni baat Bamukaakadil mudimw i ya makos. Wiiyiiy kufulok Sataan ni boos bamuloolond, ki wiiyiiy “kwiituleej lus.”

Ki bwa kaabaak, Yehow kiish mwa kwiitufudilok makab moos matuheehet, ki wiitujaajaadikil neey: tudy mwa kwiikal ni musangal hatucidy bamwiimanyinok aah. Teng muleebel Yeshaay, tudy mwa kwiikal ni musangal hatucidy bindil bwa bwaal kaahand bulengel bulongek. (Ye. 30:18) I mushind kaay utudy mwa kuhet musangal oow? Myand yinaay eey yidy mwa kwiitwambulwiish.

MUWUDY MWA KWIIKAL NI MUSANGAL HAWUCIDY MWIIMANYINOK

Langil ha myand yilengel yikaady yikufikil. Mukaleng Davih utadil myand yivul yibiih mu shikacil indiy. (Mis. 37:35) Ufundil neey: “Ihooy kuuhal kwa Mawej [Yehow], umukun mat. Kufulwiil bend mund muut uheehet ciit kaahand ni ulang bwa kulong myand yibiih.” (Mis. 37:7) Davih ulamin mubel oow ku micim hakutum meej mindiy ku kutakamin kwaakadyey naak kwa neey, biiyiiy bamukuuloh. Uleejel  cikwaabw dyanyish bwa myand yoos yaakady Yehow mumulongel. (Mis. 40:5, NWT) Tut tulangil byeet ha myand yilengel yitufiifikil mu shikacil, hakulek kulangil ha myand yibiih, biikaakal biheehel menmen bwiitut kwiimanyinok Yehow.

Kaam mishind yiwudy mwa kwiikal utumbish teng Yehow. Ufundil Musambw a 71, bimweemwek neey i Davih wambiil Yehow neey: “Nady mutakamin teng kuwudy, niiyiiy kukuh teng kukuh lutumb.” (Mis. 71:14) I mushind kaay waakadyey mwa kutumbish Yehow? Waakady ni bwa kwambil baat bakwaabw myand ya Yehow ni kumumbil misambw ya kumuh naay lutumb. (Mis. 71:16, 23) Teng bu Davih, tudy mwa kuhet musangal hatucidy bindil Yehow. Tumutuutumbish ku dyambulwiish dya mudimw iitut a bukajaady, ni mu miisamb yiitut ya mafuk miitut moos ni mu misambw yiitut. Musang mukwabw uwiiyiiy kumb musambw a Bukaleng, bwaabiny kwiish mwa kutumok meej ku may mady mu musambw aaw?

Iitab mibel ya biin-kweet. Hahetel Davih makab, wambiil Yehow neey: “Nady muteek mucim aam kuwudy, kuuhal kwa baat bady bakooyel kuwudy.” (Mis. 52:9) Tut byeet bady mwa kwiitukashish kudy biin-kweet baan-balum ni baan-bakaj kiish teng mu bisangil eecy mu mudimw a bukajaady, ki cikwaabw hatushiishikat bwa kuhicish naab diib haakaabumw.—Rom 1:11, 12.

Kashish kutakamin kwiibuh. Misambw 62:5 [NWT] uleeleeb neey: “Nady mwiihooy mwiimanyinok Mawej, bwaal kutakamin kwaam kwaalaalukil kudyey.” Biikam kwiikal ni kutakamin kukasakan nang-nang—hady bulekel kabuy bwiiy lwang-lwang bu mutwaakady tulang. Twiikalaay batwiishiibw neey, malay ma Yehow miiyiiy makumban biin-biin ning mutudy mwa kwiimindil mafuk mavul. Tudy mwa kukashish kutakamin kwiitut a kubal Diiy dya Mawej—kulong may ma buprofet, kutal mudy myand yidy mu Bibl yihetangan ni myand yikwaabw yidy Yehow muleej habitaataal buumuut bwindiy. (Mis. 1:2, 3) Cikwaabw, bikaam tutungunuk ni “kulomb ni bukash bwa spirit mujilang” bwiitut kulam bulund bulengel butudy bady ni Yehow, hatucidy bindil bwa mulay indiy a buumy bwa mwendelel akumban.—Yuud 20, 21.

Teng bu Mukaleng Davih, iikal mutwiishiibw neey, Yehow i mutal boos bady bamwiimanyinok ni wiibaleeleej lukat Lwindiy lwa bulamat. (Mis. 33:18, 22) Tungunuk ni kwiimanyinok Yehow ni kutukij koos a kwiimanyin ha myand yilengel ya mu shikacil iibuh, a kumutumbish, a kwiitab bwa biin-kweet bakukashish ku micim, ni a kutungunuk ni kukashish kutakamin kwiibuh kwa buseeb.