Bɔt stil, Jiova de ɛkspɛkt wi fɔ peshɛnt wet fɔ am fɔ du wetin i want di tɛm we i dɔn pik. Wetin mek Jiova de ɛkspɛkt wi fɔ du dat? Wetin go ɛp wi fɔ gɛt gladi-at we wi de wet?

WETIN MEK JIOVA DE ƐKSPƐKT WI FƆ WET?

Di Baybul tɔk se: “Jiova de peshɛnt wet fɔ sho se i lɛk una, ɛn i go grap fɔ sɔri fɔ una. Jiova na Gɔd we de du tin tret. Ɔl di wan dɛn we de wet fɔ am gɛt gladi-at.” (Ayz. 30:18) Dɛn wɔd dɛn ya we Ayzaya bin rayt na fɔ di Ju dɛn we bin trangayes. (Ayz. 30:1) Bɔt sɔm fetful Ju dɛn bak bin de, ɛn dɛn wɔd dɛn ya bin gi dɛn op. Dɛn sem wɔd dɛn ya de gi op to Jiova in fetful savant dɛn tide.

So wi nid fɔ peshɛnt wet bikɔs Jiova insɛf de peshɛnt wet. I dɔn pik tɛm we i go dɔnawe wit dis wɔl, ɛn i de wet fɔ mek da de ɛn awa rich. (Mat. 24:36) Da tɛm de, ɔlman go no klia wan se ɔl di tin dɛn we Setan tɔk bɔt Jiova ɛn di wan dɛn we de sav Am na lay. Dɔn, i go dɔnawe wit Setan ɛn ɔl di wan dɛn we de biɛn am, bɔt I go “sɔri fɔ [wi].”

Rayt naw, Jiova nɔ go pul di prɔblɛm dɛn we de mit wi, bɔt i de mek wi no se wi go ebul fɔ gɛt gladi-at we wi de wet. Lɛk aw Ayzaya bin tɔk, wi go ebul gɛt gladi-at we wi de wet ɔ op fɔ mek gud tin apin. (Ayz. 30:18) Wetin wi go du fɔ gɛt da gladi-at de? Lɛ wi tɔk bɔt 4 tin dɛn we go ɛp wi.

AW WI GO GƐT GLADI-AT WE WI DE WET?

Tink bɔt di gud tin dɛn we de apin na yu layf. Bɔku bad tin dɛn bin apin to Kiŋ Devid we i bin de alayv. (Sam 37:35) Bɔt i bin rayt se: “Sɛt yu mɔt we yu de bifo Jiova ɛn peshɛnt wet fɔ am. Nɔ vɛks bikɔs ɔf di pɔsin we ebul fɔ du ɔl wetin i dɔn plan.” (Sam 37:7) Devid insɛf sɛf bin fala da advays de bay we i pe atɛnshɔn pan di prɔmis we Jiova bin dɔn prɔmis fɔ sev am. I bin gladi bak fɔ ɔl di gud tin dɛn we Jiova bin dɔn du fɔ am. (Sam 40:5) If wisɛf pe atɛnshɔn pan di gud tin dɛn we de apin na wi layf ɛn nɔ pe atɛnshɔn pan di bad tin dɛn we de apin arawnd wi, dat go mek i izi fɔ lɛ wi wet fɔ Jiova.

 Yuz ɛni chans we yu gɛt fɔ prez Jiova. Di pɔsin we rayt Sam 71, we go dɔn bi Devid, bin tɛl Jiova se: “A go kɔntinyu fɔ wet; A go prez yu mɔ ɛn mɔ.” (Sam 71:14) Aw i go prez Jiova? I go tɛl ɔda pipul dɛn bɔt Jiova ɛn siŋ siŋ dɛn fɔ prez am. (Sam 71:​16, 23) Jɔs lɛk Devid, wisɛf go ebul gɛt gladi-at we wi de wet fɔ Jiova. Wi de prez am we wi de prich to ɔda pipul dɛn, we wi de tɔk bɔt am to wi famili ɛn padi dɛn, ɛn we wi de siŋ siŋ dɛn we wi de wɔship am. So di nɛks tɛm we yu de siŋ wan pan wi Kiŋdɔm siŋ dɛn, yu nɔ tink se i go fayn fɔ mek yu tek tɛm tink bɔt di wɔd dɛn ɛn aw dɛn de mek yu gladi?

Alaw yu brɔda ɛn sista dɛn fɔ ɛnkɔrej yu. We Devid bin de gɛt prɔblɛm dɛn, i bin tɛl Jiova se: “Bifo di wan dɛn we nɔ de kɔmɔt biɛn yu, a go abop pan yu nem.” (Sam 52:9) Wisɛf go ebul gɛt ɛnkɔrejmɛnt frɔm wi brɔda ɛn sista dɛn we nɔ de kɔmɔt biɛn Jiova. Ɛn nɔto we wi de na mitin ɔ we wi de prich nɔmɔ wi kin gɛt ɛnkɔrejmɛnt frɔm dɛn, bɔt wi kin gɛt am bak bay we wi de spɛn tɛm togɛda fɔ ɛnjɔy wisɛf.​—Rom. 1:​11, 12.

Du tin dɛn we go mek yu op strɔng mɔ ɛn mɔ. Sam 62:5 tɔk se: “A de wet kwayɛt wan fɔ Gɔd bikɔs na in de gi mi op.” I rili impɔtant fɔ gɛt strɔng op, mɔ if di ɛnd nɔ kam di tɛm we wi de ɛkspɛkt am fɔ kam. Wi fɔ biliv tranga wan se di tin dɛn we Jiova dɔn prɔmis go apin, ilɛk wi gɛt fɔ wet fɔ dɛn fɔ lɔng tɛm. Wi go mek wi op strɔng mɔ ɛn mɔ bay we wi de stɔdi Gɔd in Wɔd. Fɔ ɛgzampul, tink bɔt ɔl di tin dɛn we di Baybul bin dɔn tɔk bɔt we dɔn apin, aw pan ɔl we na difrɛn pipul dɛn rayt di Baybul, dɛn ɔl gri wit dɛnsɛf, ɛn tink bɔt di tin dɛn we Jiova tɔk bɔt insɛf. (Sam 1:​2, 3) Dɔn bak, wi nid fɔ kɔntinyu fɔ pre fɔ “lɛ di oli spirit ɛp [wi]” so dat wi go kɔntinyu fɔ gɛt tayt padi biznɛs wit Jiova as wi de wet fɔ lɛ di prɔmis we i dɔn prɔmis wi fɔ gɛt layf we go de sote go kam tru.​—Jud 20, 21.

Jɔs lɛk Kiŋ Devid, gɛt kɔnfidɛns se Jiova de wach oba di wan dɛn we de wet fɔ Am, ɛn i de sho In lɔv we nɔ de ɛva chenj to dɛn. (Sam 33:​18, 22) Na fɔ kɔntinyu fɔ peshɛnt wet fɔ Jiova bay we yu de kɔntinyu fɔ pe atɛnshɔn pan di gud tin dɛn we de apin na yu layf, we yu de prez am, we yu de alaw brɔda ɛn sista dɛn fɔ ɛnkɔrej yu, ɛn we yu de kɔntinyu fɔ du tin dɛn we go mek yu op we yu rili valyu strɔng mɔ ɛn mɔ.