ယဟိဝၤယွၤ ဘၣ်သးလၢ ပကအိၣ်ခိးအီၤလၢ တၢ်ဝံသးစူၤအပူၤ တုၤလၢ အပာ်ပနီၣ်ဃာ် တၢ်ဆၢကတီၢ်ဘၣ်ဝဲ. ဘၣ်မနုၤအဃိ အဘၣ်သးလၢ ပကအိၣ်ခိးအီၤလဲၣ်. ဒီးဖဲပအိၣ်ခိးအီၤအခါ ဒ်သိးပကအိၣ်ဒီး တၢ်သးခုအဂီၢ် တၢ်မနုၤကမၤစၢၤပှၤလဲၣ်.

ဘၣ်မနုၤအဃိ ယဟိဝၤယွၤ ဘၣ်သးလၢ ပကအိၣ်ခိးအီၤလဲၣ်

လံာ်စီဆှံ တဲဝဲလၢ “ယဟိဝၤယွၤ အိၣ်ခိးဝဲလၢ တၢ်ဝံသးစူၤအပူၤ လၢအကပာ်ဖျါထီၣ် လၢအဘၣ်သူၣ်ဘၣ်သးသု ဒီးအဝဲ ကဆၢထၢၣ် ပာ်ဖျါထီၣ် တၢ်သးကညီၤ လၢသုဖီခိၣ်လီၤ. ယဟိဝၤယွၤ မ့ၢ်ကစၢ်ယွၤလၢ အစံၣ်ညီၣ်တၢ်တီလီၤ. ပှၤကိးဂၤဒဲးလၢ အအိၣ်ခိးကွၢ်လၢ်အီၤန့ၣ် ကသးခုဝဲ.” (ၡါ ၃၀:၁၈) ဝံယၡါယၤ အတၢ်ကတိၤအံၤ လၢအခီၣ်ထံးခါန့ၣ် အအဲၣ်ဒိးတဲဝဲလၢ ပှၤယူဒၤဖိလၢ အခိၣ်ကိၤတဖၣ်အဂီၢ်. (ၡါ ၃၀:၁) သနာ်က့ လၢပှၤယူဒၤဖိတဖၣ်အံၤ အကျါန့ၣ် ပှၤယူဒၤဖိလၢအသးတီ အိၣ်ဝဲတနီၤ ဒီးတၢ်ကတိၤတဖၣ်အံၤ ဟ့ၣ်အဝဲသ့ၣ် တၢ်မုၢ်လၢ်. တကးဒံးဘၣ် တၢ်ကတိၤတဖၣ်အံၤ ဟ့ၣ်ဝဲတၢ်မုၢ်လၢ်လၢ ယဟိဝၤယွၤ အခ့အပှၤ လၢဆၢကတီၢ်ခဲအံၤ အဂီၢ်စ့ၢ်ကီး.

ယဟိဝၤယွၤ အိၣ်ခိးတၢ်လၢ တၢ်ဝံသးစူၤအဃိ ဖဲပအိၣ်ခိးအီၤအခါ ပကဘၣ်အိၣ်ဒီး တၢ်ဝံသးစူၤစ့ၢ်ကီး. တကးဒံးဘၣ် ယဟိဝၤယွၤ ပာ်ပနီၣ်ဃာ် တၢ်ဆၢကတီၢ်လၢ အကမၤဟးဂီၤ ဒီးမၤကတၢၢ်ကွံာ် မုၣ်ကီၤလံၢ် အတၢ်ရဲၣ်တၢ်ကျဲၤဝံၤလံ ဒီးအဝဲအိၣ်ခိးလၢ မုၢ်နံၤအဝဲန့ၣ် ဒီးနၣ်ရံၣ်အဝဲန့ၣ် ကဟဲတုၤအဂီၢ်. (မး ၂၄:၃၆) ဖဲန့ၣ်အခါ ပှၤကသ့ၣ်ညါထီၣ်က့ၤလၢ တၢ်လၢမုၣ်ကီၤလံၢ် ပာ်ဒ့ၣ်ပာ်ကမၣ် ယဟိဝၤယွၤ ဒီးယဟိဝၤယွၤ အခ့အပှၤန့ၣ် မ့ၢ်ဝဲတၢ်လၢအကမၣ်. ဒီးယဟိဝၤယွၤ ကမၤဟးဂီၤကွံာ် မုၣ်ကီၤလံၢ် ဒီးပှၤလၢအအိၣ်ဃူအီၤတဖၣ်, ဘၣ်ဆၣ် ယဟိဝၤယွၤက “ပာ်ဖျါထီၣ် တၢ်သးကညီၤ လၢ [ပ] ဖီခိၣ်.”

ခဲအံၤန့ၣ် ယဟိဝၤယွၤ တမၤလီၤမၢ်န့ၢ် ပတၢ်ကီတၢ်ခဲဘၣ်. ဘၣ်ဆၣ် ဖဲပအိၣ်ခိးတၢ်အခါ ဒ်သိးပအိၣ်ဒီး တၢ်သးခု ကသ့အဂီၢ် ယဟိဝၤယွၤ အၢၣ်လီၤဝဲလၢ အကမၤစၢၤပှၤ. ဒ်ဝံယၡါယၤ ပာ်ဖျါထီၣ်ဝဲအသိး ခါဆူညါ တၢ်လၢအဂ့ၤ ကကဲထီၣ်သးအဃိ ပအိၣ်ခိးကွၢ်လၢ်တၢ် လၢတၢ်သးခုအပူၤသ့. (ၡါ ၃၀:၁၈) a ပကဒိးန့ၢ်ဘၣ် တၢ်သးခုအဂီၢ် ပကဘၣ်မၤဒ်လဲၣ်. ပကကွၢ်သကိး တၢ်လၢပကဘၣ်မၤအီၤလွံၢ်မံၤ.

ဖဲပအိၣ်ခိးတၢ်အခါ ပအိၣ်ဒီး တၢ်သးခုကသ့ဒ်လဲၣ်

သးစၢၢ်ဆၢ တၢ်လၢအဂ့ၤ. စီၤပၤဒၤဝံး ထံၣ်ဘၣ် တၢ်အၢတၢ်သီလၢ အတၢ်အိၣ်မူ ဒီတစိၤညါ. (စံး ၃၇:၃၅) သနာ်က့ အတဲဝဲလၢ “အိၣ်ဘှ့ၣ်ဘှ့ၣ်ဘှီၣ်ဘှီၣ်လၢ ယဟိဝၤယွၤ အမဲာ်ညါ ဒီးခိးကွၢ်လၢ်တၢ်လၢ အကမၤဝဲ တက့ၢ်. တဘၣ်သးတံာ်တာ်လၢ ပှၤတဂၤ အတၢ်ကူၣ် ကဲထီၣ်လိၣ်ထီၣ် အဃိတဂ့ၤ.” (စံး ၃၇:၇) စီၤဒၤဝံး အနီၢ်ကစၢ်စ့ၢ်ကီး မၤထွဲဝဲ ဒ်တၢ်လၢအတဲဝဲအသိး ဒီးအသးစၢၢ်ဆၢဝဲ ယဟိဝၤယွၤ အတၢ်အၢၣ်လီၤလၢ ကမၤပူၤဖျဲးအီၤ. တကးဒံးဘၣ် အဆိကမိၣ်ထီၣ်က့ၤ တၢ်ဆိၣ်ဂ့ၤတဖၣ်လၢ အဒိးန့ၢ်ဘၣ်ဝဲလၢ ယဟိဝၤယွၤအအိၣ်. (စံး ၄၀:၅) ခဲအံၤစ့ၢ်ကီး လၢပခိၣ်ပဃၢၤန့ၣ် ပထံၣ်ဘၣ် တၢ်အၢတၢ်သီအါမး သနာ်က့ ပမ့ၢ်သးစၢၢ်ဆၢ တၢ်လၢအဂ့ၤန့ၣ် ပခိးကွၢ်လၢ် ယဟိဝၤယွၤ လၢတၢ်သးခုအပူၤ ကညီထီၣ်ဝဲ.

မၤတၢ်လၢယဟိဝၤယွၤအဂီၢ် ဆူၣ်ဆူၣ် ဒီးစံးထီၣ်ပတြၢၤအီၤ. ပှၤကွဲးထါစံးထီၣ်ပတြၢၤ ၇၁ န့ၣ်အကဲဝဲ စီၤဒၤဝံး ဒီးအတဲယဟိဝၤယွၤလၢ “ယကအိၣ်ခိးနၤထီဘိ ဒီးယကစံးထီၣ်ပတြၢၤ အါထီၣ်နၤ.” (စံး ၇၁:၁၄) စီၤဒၤဝံး စံးထီၣ်ပတြၢၤ ယဟိဝၤယွၤဒ်လဲၣ်. အတဲပၠးပှၤဂၤလၢ ယဟိဝၤယွၤအဂ့ၢ် ဒီးအသးဝံၣ် စံးထီၣ်ပတြၢၤအီၤ. (စံး ၇၁:၁၆, ၂၃) ဒ်စီၤဒၤဝံးအသိး ဖဲပအိၣ်ခိးယဟိဝၤယွၤအခါ ပအိၣ်ဒီး တၢ်သးခုသ့. ဒီးပစံးထီၣ်ပတြၢၤ ယဟိဝၤယွၤသ့ဖဲ ပဟးစံၣ်တဲၤတဲလီၤတၢ်, တဲသကိးတၢ်ဒီးပှၤဂၤ ဘၣ်ဃးဒီး ယဟိဝၤယွၤအဂ့ၢ် ဒီးသးဝံၣ်စံးထီၣ်ပတြၢၤအီၤ. လၢခံတဘျီ ဖဲနသးဝံၣ် တၢ်အိၣ်ဖှိၣ်အတၢ်သးဝံၣ်အခါ ဆိကမိၣ်ထံ တၢ်သးဝံၣ်အခီပညီ လၢကကဲထီၣ် တၢ်ဟ့ၣ်ဂံၢ်ဟ့ၣ်ဘါလၢနဂီၢ်.

ဒ်သိးနကန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါအဂီၢ် နကဘၣ်ရ့ဒီး ဒီပုၢ်ဝဲၢ်မုၣ်ခွါ. ဖဲစီၤဒၤဝံး ထံၣ်ဘၣ် တၢ်ကီတၢ်ခဲအခါ အတဲဘၣ် ယဟိဝၤယွၤဒ်အံၤ– “လၢပှၤလၢအသးတီဒီးနၤတဖၣ် အကျါန့ၣ် ယကမုၢ်လၢ်တၢ်လၢနမံၤ.” (စံး ၅၂:၉) ပဝဲစ့ၢ်ကီး ပဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါ လၢပဒီပုၢ်ဝဲၢ်မုၣ်ခွါတဖၣ် အအိၣ်သ့ဖဲ ပလဲၤထီၣ်တၢ်အိၣ်ဖှိၣ်, ဟးစံၣ်တဲၤတဲလီၤတၢ် ဒီးဖဲပအီၣ်သကိးတၢ် ဒီးရ့လိာ်သးအခါ.—ရိ ၁:၁၁, ၁၂.

မၤဂၢၢ်ကျၢၤဒိၣ်ထီၣ် နတၢ်မုၢ်လၢ်. စံးထီၣ်ပတြၢၤ ၆၂:၅ တဲဝဲလၢ “ယကအိၣ်ဘှ့ၣ်ဒီး အိၣ်ခိးကစၢ်ယွၤ, မ့ၢ်လၢ အဝဲမ့ၢ် ယတၢ်မုၢ်လၢ် အဂံၢ်ခီၣ်ထံး အဃိလီၤ.” ပမ့ၢ်အိၣ်ဒီး တၢ်မုၢ်လၢ်လၢ အဂၢၢ်ကျၢၤန့ၣ် မ့ၢ်ဖျါလၢ ပဘၣ်အိၣ်ခိး ကစၢ်ယွၤအဘီအမုၢ် ဖးယံာ်သနာ်က့ ပအိၣ်ခိးအီၤကဲ. ဒီးပမ့ၢ် ဘၣ်အိၣ်ခိး ယဟိဝၤယွၤ အတၢ်အၢၣ်လီၤ ဖးယံာ်သနာ်က့ ပကဘၣ်နာ် သပှၢ်တၢၢ်လၢ အကဟဲလၢထီၣ်ပှဲၤထီၣ်နီၢ်ကီၢ်. ဒ်သိးပက မၤဂၢၢ်ကျၢၤဒိၣ်ထီၣ် ပတၢ်မုၢ်လၢ်အဂီၢ် ပကဘၣ်မၤလိ ကစၢ်ယွၤအကလုၢ်ကထါ. အဒိ ဝံအတၢ်စံးပာ်တဖၣ် ဟဲလၢထီၣ်ပှဲၤထီၣ်ဒ်လဲၣ်, အဘျးစဲလိာ်သး တခါဒီးတခါဒ်လဲၣ် ဒီးအပာ်ဖျါထီၣ်န့ၢ်ပှၤ ယဟိဝၤယွၤ အဂ့ၢ်ဒ်လဲၣ်န့ၣ် ပဃုသ့ၣ်ညါအါထီၣ်သ့. (စံး ၁:၂, ၃) တကးဒံးဘၣ် ဖဲပအိၣ်ခိး ယဟိဝၤယွၤ အတၢ်အၢၣ်လီၤ ဘၣ်ဃးဒီးတၢ်မူထူယိာ်အခါ ဒ်သိး ပကဆဲးအိၣ်ဒီး တၢ်ရ့လိာ်သးဒီး ယဟိဝၤယွၤ လၢအဂ့ၤအဂီၢ် ပကဘၣ် “ဃ့ထုကဖၣ်တၢ်လၢ သးစီဆှံအတၢ်ဟံးစုနဲၣ်ကျဲ အဖီလာ်.”—ယူ ၂၀, ၂၁.

စီၤပၤဒၤဝံး နာ်ဝဲသပှၢ်တၢၢ်လၢ ယဟိဝၤယွၤ အံးထွဲကွၢ်ထွဲဝဲ ပှၤလၢအအိၣ်ခိးကွၢ်လၢ်အီၤ ဒီးအပာ်ဖျါထီၣ် တၢ်အဲၣ်လၢအတီ လၢအဝဲသ့ၣ်အဖီခိၣ်. (စံး ၃၃:၁၈, ၂၂) အဃိ ဆဲးအိၣ်ခိးကွၢ်လၢ် ယဟိဝၤယွၤ လၢတၢ်ဝံသးစူၤ ဒီးသးစၢၢ်ဆၢ တၢ်အဂ့ၤ လၢနတၢ်အိၣ်မူအပူၤ, စံးထီၣ်ပတြၢၤ ယဟိဝၤယွၤ, တူၢ်လိာ် တၢ်ဟ့ၣ်ဂံၢ်ဟ့ၣ်ဘါလၢ ဒီပုၢ်ဝဲၢ်မုၣ်ခွါတဖၣ်အအိၣ် ဒီးဆဲးမၤဂၢၢ်ကျၢၤဒိၣ်ထီၣ် နတၢ်မုၢ်လၢ်ထီဘိ.