Kasi, Yehova kena kulomba beto beto vingila yandi na ntima yinda yandi sala na ntangu yina yandi bongisaka. Samu na yinki yandi kena kulomba beto beto vingila na ntima yinda? Yinki lenda sadisa beto beto vuanda na kiese ntangu beto kena kuvingila?

SAMU NA YINKI YEHOVA KENA KULOMBA BETO BETO VINGILA?

Biblia metuba: ‘Yehova kena kuvingila na ntima yinda nionso samu na kumonisina beno ntima kiadi, mpe yandi ketelema samu na kumonina beno kiadi. Samu Yehova kele Nzambi ya lunungu. Kiese na bantu nionso yina kena kutatamana kuvingila yandi.’ (Yez. 30:18) Bampova yango ya Yezaya tadilaka ntetentete Bayuda yina vuandaka yintu ngolo. (Yez. 30:1) Kasi yavuandaka na Bayuda ndambu yina vuandaka ya kukuikama, mpe bampova yango pesaka bau kivuvu. Kaka bampova yango kena kupesa kivuvu na bisadi ya Yehova ya kukuikama bubu yayi.

Na yau, beto fueti vingila na ntima yinda nionso samu Yehova kena kuvingila na ntima yinda nionso. Yandi meponaka ntangu yina yandi ketula nsuka na yinza yayi, mpe yandi kena kuvingila kilumbu yango mpe ntangu yango koka. (Mat. 24:36) Na ntangu yango, yakemonana puelele ti mambu yina Diabulu kefundilaka Yehova mpe bisadi na Yandi kele ya luvunu. Na manima yandi kekatula Satana mpe konso muntu yina kele na ndambu na yandi, kasi Yandi ‘kemonisina [beto] ntima kiadi.’

Tekila ntangu yango koka, mbala yankaka Yehova lenda katula ve bampasi na beto, kasi yandi mendimisa beto ti beto lenda vuanda na kiese ntangu beto kena kuvingila. Mutindu Yezaya tubaka, beto lenda vuanda na kiese ntangu beto kena kuvingila diambu mosi ya kitoko salama. (Yez. 30:18) a Yinki mutindu beto lenda baka kiese yango? Mambu yiya lenda sadisa beto.

MUTINDU BETO LENDA VUANDA NA KIESE NTANGU BETO KENA KUVINGILA

Tula makanisi na nge na mambu ya mbote. Ntinu Davidi monaka mambu mingi ya yimbi na luzingu na yandi. (Nk. 37:35) Kasi, yandi sonikaka: ‘Vuanda niee na ntuala ya Yehova mpe vingila yandi na ntima ya mvimba. Kufuema ve samu na muntu yina kena kununga kukokisa makanisi na yandi ya yimbi.’  (Nk. 37:7) Davidi yandi mosi sadilaka dilongi yayi ntangu yandi tulaka makanisi na nsilulu ya Yehova ya kuvukisa yandi. Yandi vuandaka diaka na butondi samu na mambu nionso ya mbote yina Yehova sadilaka yandi. (Nk. 40:5) Kana beto kena kukanisa na mambu ya mbote na luzingu na beto mpe beto kena kutula ve makanisi na mambu ya mpasi, yakevuanda pete samu beto vingila Yehova.

Vuanda na mambu mingi ya kusala samu na kukumisa Yehova. Nsoniki ya Nkunga 71, yina kele mbala yankaka Davidi, tubaka na Yehova: ‘Munu ketatamana kuvingila; munu kepesa nge diaka lokumu mingi kuluta.’ (Nk. 71:14) Yinki mutindu yandi vuandaka kumisa Yehova? Yandi vuandaka tubila bantu yankaka mambu metadila Yehova mpe yandi vuandaka yimbila samu na kukumisa yandi. (Nk. 71:16, 23) Mutindu mosi na Davidi, beto lenda vuanda na kiese ntangu beto kena kuvingila Yehova. Beto kekumisaka yandi na nzila ya kisalu na beto ya kusamuna, na masolo na beto ya konso kilumbu, mpe na kuyimbilaka miyimbu na beto. Mbala kekuiza ntangu nge keyimbila mosi ya miyimbu na beto, kanisa na bampova na yau mpe na mutindu yakena kupesa nge kiese.

Baka lukindusu na kulutisaka ntangu na bampangi. Ntangu Davidi vuandaka kutana na mambu ya mpasi, yandi tubaka na Yehova: ‘Na ntuala ya bantu na nge ya kukuikama, munu ketula kivuvu na nkumbu na nge.’ (Nk. 52:9) Beto diaka beto lenda baka lukindusu kana beto kele kintuadi na bampangi na beto, kaka ve na balukutakanu na beto mpe na kisalu ya kusamuna kasi diaka na maluaku yankaka.​—Bar. 1:11, 12.

Kumisa kivuvu na nge ngolo. Nkunga 62:5 metuba: ‘Munu kena kuvingila Nzambi na kuvuandaka niee, samu kivuvu na munu kekatukaka na yandi.’ Yakele na mfunu kuvuanda na kivuvu ya ngolo mingimingi kana nsuka kena kuiza ve mutindu beto kanisaka yau. Beto fueti ndimisama ti bansilulu ya Yehova kekokisama yavuanda bantangu yikua beto kelutisa samu na kuvingila yau. Beto lenda kumisa kivuvu na beto ngolo na kulongukaka Mpova ya Nzambi​—bambikudulu na yau, nguizani yina kele kati na mambu yina mesonama na kati, mpe mambu yina Yehova metuba samu na yandi mosi. (Nk. 1:2, 3) Katula yau, beto fueti tatamana ‘kusambila na mpeve ya nlongo’ samu na kutanina nguizani na beto ya mbote na Yehova ntangu beto kena kuvingila nsilulu na yandi ya luzingu ya mvula na mvula kokisama.​—Yude 20, 21.

Mutindu mosi na Ntinu Davidi, ndimisama ti Yehova ketalaka bantu yina kena kuvingila Yandi mpe yandi kemonisinaka bau nzola na Yandi ya kukuikama. (Nk. 33:18, 22) Tatamana kuvingila Yehova na ntima yinda nionso, na kutulaka makanisi na mambu ya mbote na luzingu na nge, na kukumisaka yandi, na kundimaka lukindusu ya bampangi na nge Bambangi ya Yehova, mpe na kutaninaka ngolo kivuvu na nge yina kele na valere.