Kasi, Yehova ke na nsatu beto vingila na ntima ya yinda nyonso, ntangu yina yandi ke yidika bamambu. Samu na yinki yandi ke na vingilaka beto sala yawu? Yinki ke sadisa beto na kuvingila na kilengi nyonso?

SAMU NA YINKI YEHOVA ZOLA BETO VINGILA?

Biblia ke zonzaka: ‘Yehova ke na vingilaka na ntima ya yinda nyonso samu na kulakisa beno ntima ya mbote, mpe yandi ke na telamaka samu na kulakisa beno ntima ya kyadi. Samu Yehova ke Nzambi ya lunungu. Kilengi na bantu nyonso yina ke na bikaka ve kuvingila yandi.’ (Iza. 30:18) Izaya zonzilaka bamambu yayi na Bazwife ya yintu ngolo. (Iza. 30:1) Kasi, na kati ya bawu vandaka mpe na Bazwife yina vandaka ya kukangama na Yehova. Na yawu, mambu yayi pesaka bawu kivuvu. Bubu yayi, ya ke na pesaka mpe bisadi ya Yehova kivuvu.

Samu ti Yehova ke na vingilaka na ntima ya yinda nyonso, beto mpe me fwana kusala mutindu yandi. Ya ke na ntangu yina yandi soolaka samu na kumwangisa yinza yayi, mpe yandi ke na vingilaka ntangu yango. (Mat. 24:36) Na ntangu yina, ya ke talana pwelele ti bamambu nyonso Satana ke na zonzaka na yina me tadila Yehova mpe bisadi ya yandi ke kaka luvunu. Yehova ke kufwa Satana na bilandi ya yandi, kasi yandi ke ‘lakisa beto ntima ya mbote.’

Ata ti bubu yayi, Yehova me katula ve bampasi ya beto, yandi me lakisa beto ti, beto lenda vanda na kilengi ntangu beto ke na vingilaka. Kaka faso Izaya zonzaka yawu, beto lenda vanda na kilengi ntangu beto ke na vingilaka kivuvu ya beto lungana. (Iza. 30:18) Yinki ke sadisa beto na kuzwa kilengi yango? Beto tala bamambu yiya yina lenda sadisa beto.

WA’ FASO NGE LENDA VINGILA NA KILENGI NYONSO?

Tula makanisi ya nge na bamambu ya mbote ya luzingu ya nge. Na luzingu ya yandi, mfumu Davidi talaka bamambu mingi ya yimbi. (Nku. 37:35) Kasi yandi sonikaka: ‘Vanda swi na mantwala ya Yehova mpe vingila yandi na kivuvu nyonso. Kuvanda ve na nkele samu na muntu yina ke na lenda kulungisa banzila ya yandi ya yimbi.’ (Nku. 37:7) Davidi yandi mosi sadilaka malongi yayi, na faso yandi tulaka ntima ya yandi nyonso na bansilulu ya Yehova. Mpe yandi vanda vutulaka Yehova matondo na bamambu nyonso ya mbote yina yandi vanda salaka samu na  yandi. (Nku. 40:5) Kana beto ke na tulaka ntima ya beto nyonso na bamambu ya mbote, kasi ve na bamambu ya mpasi yina ke na salamaka, ya ke vanda ve mpasi na beto na kuvingila Yehova.

Sadila ntangu ya nge samu na kukembila Yehova. Na Nkunga 71, Davidi zonzaka na Yehova: ‘Mu ke bika ve na kuvingila. Mu ke pesa nge lukumu mingi ya kulutila.’ (Nku. 71:14) Wa’ faso yandi kembilaka Yehova? Yandi vanda zonzilaka nkumbu ya Yehova na bampangi, mpe vanda yimbilaka yandi. (Nku. 71:16, 23) Kaka mutindu Davidi, beto lenda vingila Yehova na kilengi nyonso, kana beto samuna, beto zonzila nkumbu ya Yehova na masolo ya beto ya bilumbu nyonso, mpe beto yimbila yandi na banzimbu ya kimvuka. Mbala ya nkaka yina nge ke yimbila Yehova, kanisa mbote-mbote na bamambu yina ke na kati ya nzimbu, mpe na faso ya ke na pesaka nge kilengi.

Kuzwa bukindi na bambangi ya kimvuka. Ntangu Davidi kutanaka na bampasi, yandi zonzaka na Yehova: ‘Na mantwala ya bantu ya nge ya kukwikama, mu ke tula kivuvu na nkumbu ya nge.’ (Nku. 52:9) Beto lenda kuzwa bukindi na bampangi ya beto ya kimvuka kaka ve na balukutakanu to na kisalu ya kusamuna, kasi mpe na ntangu yina beto ke lutisaka ntangu na bawu.​—Rom. 1:11, 12.

Kumisa ngolo kivuvu ya nge. Nkunga 62:5 ke zonzaka: ‘Mu ke na vingilaka Nzambi na swi nyonso samu kivuvu ya munu ke katukaka na yandi.’ Ya ke mfunu mingi na kuvanda na kivuvu ya ngolo, mingi-mingi kana nsuka ya yinza ke na kwizaka ve na ntangu yina beto vanda vingila. Ata ya lenda baka ntangu mingi, beto me lunga kuvanda na kundima ti, bansilulu ya Yehova ke lungana kaka. Nge lenda kumisa ngolo kivuvu ya nge na kulongoka Biblia. Na kifwani, nge lenda kanisa na bambikudulu ya Biblia nyonso yina lunganaka, na faso yina bamambu nyonso yina ke na Biblia ke kwelanaka, mpe na faso yina Yehova ke zonzilaka kimuntu ya yandi. (Nku. 1:2, 3) Mpe beto me lunga kubika ve na ‘kusambila na mpeve ya santu’ samu na kubumba kindiku ya ngolo na Yehova ntangu beto ke na vingilaka kulungana ya nsilulu ya yandi na yina me tadila luzingu ya ntangu nyonso.​—Yude 20, 21.

Mutindu mfumu Davidi, vanda na kundima ti, Yehova ke bumbaka ba yina ke ya kukangama na yandi, mpe yandi ke lakisaka bawu luzolo ya kukwikama. (Nku. 33:18, 22) Vingila Yehova na ntima ya yinda nyonso na kutulaka makanisi ya nge na bamambu ya mbote ya luzingu ya nge, na kukembilaka yandi, na kusosaka bukindi na bampangi ya kimvuka mpe na kukumisaka ngolo kivuvu ya nge.