Komave Yehova unofuna ira niembekezelenga moleza murima mpakana thawi ineyo unaze liye apangevo yongo ingakwakwanile. Chifukwa n’ni unafuna ira iyo nipangenga vyevyo? Nanga chin’ni inanitandize ira nisangalalenga vevo ninaembekezela iyo?

CHIFUKWA N’NI YEHOVA UNAFUNA IRA NIEMBEKEZELENGA?

Baibulo linaonga ira: “Yehova unoembekezela moleza murima ira auwomeleni murima, ndipo unoza anyamuke ira auireleni chifundo, chifukwa Yehova ngu Mulungu unoyo unaweluza mwachilungamo. Osangalala mba athu etene anayo kanamuembekezela.” (Yes. 30:18) Yehova oowonga mawu anala wa Ayuda o-ovwela. (Yes. 30:1) Koma vookala Ayuda amo-i anayo kali ororomeleya ndipo mawu anala koowava-a chiyembekezo. Malambwano mawu anala kanopeleka chiyembekezo wa atumiki a Yehova ororomeleya.

Eno ninafuneya embekezela moleza murima chifukwa naliyene Yehova unoembekezela moleza murima. Liye oogarati-a thawi ineyo unaze liye aononge ilambo yotakalela ndipo unoembekezela ira dambo koma teto ola liwa lifiye. (Mat. 24:36) Vathawi ineyo vinaza vikala vingaoneile ira vyetene vyevyo Mdyerekezi ukalile liye amuongelanga Yehova koma teto athwae anayo kanamutumikela pivyonama. Vanduli viwa unoza amuononge Satana na etene anayo kali umbalae, koma iyo ‘unoza anipangele chifundo.’

Vathawiila Yehova kanamali-e mavuto a athu etene, komave unonisimikizela ira ninokoza kala osangalala vevo ninaembekezela iyo. Eno monga mwemo Yesaya aongele liye, ninokoza sangalalanga vevo ninaembekezela iyo vyongo vyapama. (Yes. 30:18) a Ndiye kodi chin’ni inanitandize ira nisangalalenga? Tiyemoni nione vyongo 4 vyevyo vinanitandize.

VYEVYO VINANITANDIZE IRA NISANGALALENGA VEVO NINAEMBEKEZELA IYO

Niganizelenga vyapama vyevyo vinaireya vamoywi-u. Mwene Davide oogumanavo na vyotakala vinjinji vamoywae. (Sal. 37:35) Koma liye oolemba ira: “Kala pee vamaso va Yehova ndipo umuembekezele moleza murima. Kukumudwe na muthu  unoyo unakoza vyachiwembu novikwakwaneli-eda vookaana vuto lililetene.” (Sal. 37:7) Davide oo-arela malangizo anala vo-ela maganizwae etene va chiyembekezwae yoi Yehova unomuvulumucha. Ooyamikela teto vyapama vyetene vyevyo amupangela liye. (Sal. 40:5) Ngati iyo teto ninaganizela vyongo vyapama vyevyo vinaireya, ookala vyotakala, vinokoza kala vyo-orucha ira niembekezelenga Yehova.

Mu-indi-edenga chito mpata uliwetene vomutamanda Yehova. Olemba Salimo 71, unoyo vinaoneya ira ngu Davide, oomuwandela Yehova ira: “Ndinopitiliza embekezela. Ndinoza ndiutamandeni mowilikiza posa wale.” (Sal. 71:14) Kodi liye atamanda avi Yehova? Oowandela amo-iwa vyokuza Yehova koma teto imba nyimbo domutamanda. (Sal. 71:16, 23) Mofwanafwana na Davide, iyo teto ninokoza sangalalanga voembekezela Yehova. Ninomutamanda nalaleelanga, waleda na amo-iwa koma teto imba nyimbo di-u. Thawi dimo-i mwaimbanga nyimbo da Umwene muganizelenga mawuwa mosamala ira muone mwemo kanaulimbikiseleniathu.

Mulolenga ira abali na arongolinyu kaulimbikisengani. Davide angagumanile na mavuto oomuwandela Yehova ira: “Vamaso va atumikinyu ororomelaya, ndinoza ndiembekezele zina linyu, chifukwa ti lapama.” (Sal. 52:9) Iyo teto Akiristu afwi-u kanokoza nilimbikisa, ookala vamisonkano voka kapena nalaleelanga, koma teto nawaledanga. — Arom. 1:11, 12.

Mukaengana chiyembekezo yakopolo. Lemba la Salimo 62:5 lini: “Ndinoembekezela Mulungu modeka chifukwa chiyembekezo yanga inakumela wa liye.” Chiyembekezo yakopolo chofuneya vinjinji makamaka vevo mapeto katinafiya vathawi ineyo ninaembekezela iyo. Niroromelenga vinjinji ira malonjezo a Yehova kanoza kakwakwaneli-ediwe ngakale vangalandile thawi indendai niembekezelanga. Ninokoza kaana chiyembekezo yakopolo ngati ninafunjeda Mawu a Mulungu, vyevyo vinatangani-avo maulosi, gwilizana wa khani diwa koma teto vyongo vinjinji vyevyo Yehova unaniwandela liye vyokuza liye. (Sal. 1:2, 3) Ninafuneya teto pitiliza pempela “mogwilizana na zimu owela” ira nipitilizeve kala vausamwali wapama na Yehova vevo ninaembekezela iyo kwakwaneli-ediwa wa lonjezo lae la moyo o-omala. — Yuda 20, 21.

Mofwanafwana na Mwene Davide, munokoza kala osimikiza ira Yehova unoing’anela athu etene anayo kanamuembekezela ndipo unowatonyi-eda chikondae yororomeleya. (Sal. 33:18, 22) Pitilizani embekezela Yehova molimba murima voganizela vyapama vyevyo vinaireya vamoywinyu, mutamanda, lola ira Akiristu afwinyu kaulimbikiseni koma teto vopitiliza kaana chiyembekezo yolimba.