Bâ mu nsayi bu ta kwe viviriri mu kêla Yehova
NGANO timina die naku mu mona ntangu Yehova yi kakatula mbi yayansoni, mpe yi katitula bima biabiansoni bia môna? (Nza. 21:1-5) Ntembe kâni ya ta kêla! Kâ, ntangu zazansoni ka wubâka musamu wa fioti ko mu kêla Yehova na luvivululu, nsungula bu tubâka mu mpasi. Tivuvu tizingilaka mu lungana tilendi tu bêlesa.—Bin. 13:12, note.
Kâ, Yehova mbo kazoloko ti tamukêla na luvivululu, ngatu kasala mu ntangu yi kakubika. Mu bungu dia nti kakekoloko ti tasila bo? Nti bilendi tu bakisa mu bâ mu nsayi bu tuta kwe kêle?
MU BUNGU DIA NTI YEHOVA KAZOLOLO TI TAKÊLA?
Bibila mbo ditâka: ‘Kâ Yehova mbo kata kêla ntangu yi kalufwila tiari, mbo katelama mu lu songela bulemvo bwandi, mu bungu ti Yehova wena Nzambi ya buderede. Mayangi mawu bô babansoni bata mu kêla.’ (Iza. 30:18) Misamu mio mia tâ Izaya, ku mbatukulu mbo mieri toko tarilaka Bayuda beri na tungu. (Iza. 30:1) Kâ, Bayuda beri kô ba kwikama, mpe misamu mio miabahana tivuvu. Misamu mio mbo mihanaka mpe tivuvu kwe bisari bia Yehova bia kwikama bia lumbu ti.
Buna, tufweti kêla na luvivululu, mu bungu ti Yehova mbo kakêlaka na luvivululu. Ntangu ye kô yi batikubikila mu sukisa nza yi, mpe mbo kakêlaka ti ntangu yo yatula. (Mat. 24:36) Mu ntangu yîna, ntembe kâni bungungu bwa Diabulu mu Yehova na mu bisari biandi, mbo butomo zabakana. Mbo kakatula Satana na bô babansoni bê ku lweka lwandi, kâ mbo ‘katufwitla tiari.’
Kâ bwawu bu, Yehova ka lendi’â kakatula mpasi zeto ko, kâ mbo katuhanaka lukwikulu ti tulendi bâ mu nsayi bu tuta kwe kêle. Ntiana bwa tâ Izaya, tulendi bâ mu nsayi bu tukekoloko ti tima tia mbote tiatula. (Iza. 30:18) a Bwe tulendi bakila nsayi yo? Misamu miyà milendi tu bakisa.
BWE TULENDI BÊLA MU NSAYI BU TUTA KWE KÊLE
Tûla mabanza mu misamu mia mbote. Mutinu Davide wabwabana na misamu miamingi mia mpasi mu luzingu lwandi. (Mik. 37:35) Kâ, watsoneka ti: “Kuta ha matu ma Yehova, mpe mu kêla na luvivululu. Kubakandi nkesi mu bungu dia muntu wulendaka mu lungisa makani mandi ma mbi.” (Mik. 37:7, NWT) Davide yandi beni watûla malongi mo mu mutima bu katûla mabanza mandi mu tivuvu tiandi tia mvukulu. Mpe watomo tûla mabanza mu tusakumunu twatwansoni tu keri bakaka kwe Yehova. (Mik. 40:5) Tala ti beto mpe tutûriri mabanza meto mu misamu mia mbote mia luzingu lweto, mpe tukariri mu bika misamu mia mbi mituturilaka miatunôkesa, mbo wubâ musamu wa fioti kwe beto mu kêla Yehova.
Tatamana mu yôkesa ntangu mu kembela Yehova. Titsoniki tia Mikunga 71, kampe Davide, watâ ti: ‘Mbo nitatamana mu kêla, mbo nikuhana nkembo ha zulu nkembo.’ (Mik. 71:14) Bwe kaketi kembelela Yehova? Mbo kaketi zonzela Yehova kwe bantu, mpe mbo kaketi mu tangila mikunga. (Mik. 71:16, 23) Ntiana Davide, tulendi bâ mu nsayi bu tukêlaka Yehova. Mbo tumukembelaka mu tisalu tieto tia samuna, mu bimoko bieto bia bilumbu biabiansoni na mu mikunga mieto mia nsambululu. Bu vutu tanga mukunga wa nsambululu, tomo sa keba mu nsangu zitungaka ze mu kati?
Baka lutindusu kwe mpangi zaku. Davide bu keri mu misamu mia mpasi, watêla Yehova: “Ha matu ma bantu baku ba kwikama, mbo nisa tivuvu mu nkumbu’aku.” (Mik. 52:9, NWT) Beto mpe tulendi baka lutindusu kwe mpangi zeto za kwikama, ka ku tukutakanu’â ko kwa na ku tisalu tia samuna, kâ mpe bu tuyôkesaka ntangu nawu.—Rom. 1:11, 12.
Yika tivuvu tiaku ngolo. Mikunga 62:5 yitêle: “Nzambi nita kêla mu tidzunu mu bungu ti tivuvu tiani kwe Yandi titûkaka.” (NWT) Nguria mfunu wena mu bâ na tivuvu tia ngolo, nsungula tala ti nsuka ka yita kulu kwiza ko ntiana bu tukekoloko. Tufweti bâ na lukwikulu ti makani ma Yehova mbo malungana, ni bu sa ti tufweti kêla bwabwingi. Tulendi yika tivuvu tieto ngolo bu tulongoka Zu dia Nzambi—mbikululu, mpila yi kwelanaka mabanza ma bantu batsoneka dio, na misamu mi zabikisaka Yehova mu timuntu tiandi. (Mik. 1:2, 3) Musamu wakaka, tufweti tatamana mu lomba mpeve santu ngatu tatatamana mu bâ na tindiku tia mbote na Yehova bu tuta kwe kêle ti kani di katusila dia luzingu lwa mankululu dialungana.—Yude 20, 21.
Ntiana mutinu Davide, bâ na lukwikulu ti Yehova mbo kakebaka bô bamukêlaka, mpe mbo kabasongelaka luzolo lwandi lwa kwikama. (Mik. 33:18, 22) Tatamana mu kêla Yehova na luvivululu bu tûla mabanza mu misamu mia mbote mia luzingu lwaku, bu mu kembela, bu baka lutindusu kwe mpangi zaku, na bu tatamana mu bâ na tivuvu tia ngolo.
a Ntelo ya ntete yi basarila mu bangula ‘kêla’ yilendi zolo tâ mpe ‘bâ na nsatu peleko bâ na tivuvu ti tima mbo titula,’ mbangululu yo mbo yita songela ti wa delakana wena ti tasarila ngolo mu baka mvukulu.
