Føro mai, Yova adi riji ko b’o ndi si lo nji ná saa ngatsovedha na. Ke ká adi riji ko njiri fø addudho? Ko tsotso ká addu ka ndi kó ko b’o ke hwè na d’e?

YOVA KÁ ADI RIJI KO B’O NDI ADDUDHO?

Biblia ripo: “Yova ngab’o ngatsovedha na ndi dhǒ bblonga ni dho, ndirigoti ke si dani ndi dhǒ zølo ni dho. Dhonalo Yova kʉ chølo dhi Mungu. Hwè na kʉ nari kʉ ke b’o ná ndrŭ.” (Isa. 30:18) Isaya nǎ fø lo le pongʉe ya kwanza nzɨ ngʉ ngarr ná Wayaudi dho. (Isa. 30:1) Ro, kpa kana nja kpa ngʉe chi ndima tøni ro ndirigoti fø lo ngʉ ngab’odha bbʉ kpa dho. Ndirigoti fø lo adi ngab’odha bbʉ Yova dho njínji chi ndima tøni ro ná ndrŭ dho njʉ maddi.

Føri dzá ringani ko b’onga ngatsovedha na dhonalo Yova adi ngab’o ngatsovedha na. Ke kpe i dz’ tso ndi si d’ø ná saa b’lo, ndirigoti ke fø saa ma, fø ddo ma na b’o. (Mt. 24:36) Fø saa na, ri si dhoni pʉlʉ nari kʉ, Ibilisi po Yova djo ná lo ma, ke unakpa ma na kʉ kali. Ke si Shetani ma, ndi unakpa ma na krʉ tso d’ød’ø, ro ke si “zølo dho [ko] dho.”

Ndi ko b’o ná fønga kana, nzá Yova ka ndi si kodhó kpakpalo krʉ ri, ro ke rid’ra ko dho nari kʉ, ko ka ko é hwè na ndi ko b’o nari kana. Isaya pori nari bbai, ko ka ko é hwè na bblo kʉ ná ritsi si njini nari ko b’o ro. (Isa. 30:18) a Nde, fø hwè ká ko ka ko ba ngbaribbai? Ko tsotso tho kʉ ná lo ka ndi kó.

NGBARIBBAI MA KO KA KO É HWÈ NA YOVA KO B’O RO NARI

Ali ni thí bblo kʉ ná lo djo. Pi Daudi njangʉe che kʉ ná lo bí ndidhó maisha nǎ. (Zb. 37:35) Føro mai, ke ndingʉeri: “Agoddi Yova njí ndirigoti ab’o ke. Nzɨ bbari ni nanga kani chelo kpe ná bblo dhó lo bbi ná ke djo.” (Zb. 37:7) Daudi lingʉe ndi thí Yova tsoni ndi si ndi gøgø nari djo. Ke ngʉ adi ngaddi Yova bbʉ ndi dho ná ledha krʉ djo. (Zb. 40:5) Njati ko di ngaddi kodhó maisha nǎ bblo bbi  ná lo djo, ko kuso lu njini ná che kʉ ná lo djo ko ddi é nga nari rɨngana ró, ri sie sʉsʉ ko dho ko b’o Yova.

Adi Yova má krʉ saa ró. Zaburi 71 ndingʉe ná ke Daudi pongʉeri Yova dho: “Ma si ra anzi ni b’odha na; ma si madha bbʉ ni dho bbo.” (Zb. 71:14) Ke ká ka ndi máe Yova ngbaribbai? Ke ka ndi tie lo Yova djo nja ndrŭ dho ndirigoti ndi bbʉ madha ke dho dyi chulu. (Zb. 71:16, 23) Daudi bbai, ko ma ka ko ba hwè ddi Yova ko b’o nari kana, njati ko di madha bbʉ ke dho lod’radha ma, ko tso nǎ lo ma, dyi ma na chulu ró. Luti rie Pidhinga dzá dyi ni ngo ri ró, ali ni thí li fø dyi nǎ kʉ ná lo djo.

Abbari ni djo-i ma, ni ve-i ma na li ni kpakpa. Kpakpalo na Daudi ngʉ bani ná saa na ke pongʉeri ɨ Yova dho: “Ni dho tøni chi ná ndrŭ kana, ma si madhó ngab’odha li ni ró dho djo.” (Zb. 52:9) Ko lai Wakristo ma ka ndima li ko kpakpa ddi, nga njudha ma, lod’radha dhi njí kana dhé ri, ro nja saa djo maddi.​—Ro. 1:11, 12.

Ali nidhó ngab’odha kpakpa. Zaburi 62:5 pori: “Ma Mungu b’o ddi ma go ro dhonalo madhó ngab’odha si ke dhó ró.” Ri kʉ bbo na ma na kʉ ná lo ko é kpakpa kʉ ná ngab’odha na plisiri rie nzɨ i dz’ dzá mwisho si tsé ko e riddi nari bbai ri ró. Ringani ko uri u nari kʉ, Yova dhó tsodha si njini nji, rie cho thɨ ma ko ri b’o ró. Ko ka ko li kodhó ngab’odha kpakpa Mungu dzá lo ko zø nari chulu føri i kʉ unabi ma, ri nǎ lo ma, ndi djo Yova dho ná nja lo ma na. (Zb. 1:2, 3) Føri kina, ringani ko ra anzi “roho takatifu ko kó Yova tsó” ndiro ko b’o ko kana kau ronga kpakpa Yova na d’e, cho ró nŭnŭ di ná shinga ke si bbʉ ko dho nari ko b’o ro.​—Yud. 20, 21.

Pi Daudi bbai, auri u nari kʉ Yova adi nì Ndi b’o ná ndrŭ nja nì, ndirigoti ke adi Ndidhó chi kʉ ná jidha dho kpa dho. (Zb. 33:18, 22) Ara anzi Yova ni b’o nari na, nidhó maisha nǎ bblo lo djo ni ni thí li nari ma, madha ni bbʉ ke dho nari ma, ni lai Wakristo ni bba li ni kpakpa nari ma, kpakpa ni nidhó ngab’odha li nari ma na chulu.