Amube Alusangalalo Ndyemutolindila Yehova Cakukalika Moyo
SA MUTOLANGILA ciindi Yehova ndyeshi akakusheewo shibiibi shoonse akulenga shintu shoonse kuba shipya? (Ciyu. 21:1-5) Ncakutatoonsha! Nacibi boobo, teshi lyoonse ndyeciba cuubu kulindila Yehova cakukalika moyo bunene bunene paciindi ndyetutokwiinda mubukaalo buyumu. Cilacisisha moyo na ncotolangila cacelwa kucitika.—Tus. 13:12.
Nacibi boobo, Yehova alatulangila kulindila cakukalika moyo kwaamba ayi akacitewo comwi na ciindi ncaakabika cikashiike. Ino nceebonshi alatulangila kulindila cakukalika moyo? Ino nshiinshi sheenga shatucafwa kuba alusangalalo ndyetutolindila?
INO NCEEBONSHI YEHOVA ALATULANGILA KULINDILA?
Baibo ilaamba ayi: “Yehova atoolindila cakukalika moyo kwaamba ayi amunyumfwile nkumbu, alimwi alaakunyamuka kwaamba ayi amunyumfwile luse. Mukwiinga Yehova ngu Lesa woombolosha cabululami. Balisangalete abo boonse balangila muli nguwe.” (Isa. 30:18, NWT) Maswi aya Isaya ngaakalemba akalembelwa baJuda beshicimpamya. (Isa. 30:1) Nacibi boobo, baJuda bamwi bakalinga kushomeka alimwi maswi aya akabacafwa kuba akulangila. Amunshiku shino, maswi aya atoocafwa basebenshi bakwe Yehova bashomeka kuba akulangila.
Aboobo tulyeelete kulindila cakukalika moyo mukwiinga Yehova atoolindila cakukalika moyo. Wakabika ciindi ndyeshi akanyonyoole cishi cino cibiibi, alimwi atoolindila bushiku ubo kwaamba ayi bukashiike. (Mate. 24:36) Na ciindi ico cikashiike, cilaakubonekela patuba ayi Satana nshaakaamba pali Yehova abasebenshi bakwe nshakubeca. Lyalo alaakukushawo Satana abaabo bali kulubasu lwakwe, sombi swebo ‘alaakutunyumfwila luse.’
Pacecino ciindi, Yehova inga taakushiwo mapensho ngotutokwiindaamo, sombi wakatushomesha ayi inga twaba alusangalalo ndyetutolindila. Kweelana a Isaya mbwaakaamba, inga twaba alusangalalo ndyetutolindila kwaamba ayi shintu shibotu shikacitike. (Isa. 30:18) Ino nshiinshi nsheenga twaciita kwaamba ayi tube alusangalalo ndyetutolindila? Kucita shintu shili 4 shitokonkelaawo inga kwatucafwa.
NSHEENGA TWACIITA KWAAMBA AYI TUBE ALUSANGALALO NDYETUTOLINDILA
Amubikile maano kushintu shibotu. Mwaami Defedi wakabona shintu shibiibi shiinji mubuumi bwakwe boonse. (Kulu. 37:35) Nacibi boobo, wakalemba ayi: ‘Kokalika caamba pameenso akwe Yehova akulindila lucafwo lwakwe. Utalisukami abantu basumpuka kwiinda munshila shabo beene, ee, bantu abo baswitilila kwiinda mumiyeeyo yabo ibiibi.’ (Kulu. 37:7) Defedi wakakonkela kululika uku ndyaakabikila maano kucishomesho cakwe Yehova cakwaamba ayi alaakumupulusha. Alimwi wakalinga kulumba pashintu shoonse shibotu Yehova nshaakamucitila. (Kulu. 40:5) Aswebo na twabikila maano kushintu shibotu Yehova nshaatotucitila muciindi cakubikila maano kushintu shibiibi shitoocitika, cilaakutubeta cuubu kulindila kwaamba ayi Yehova acitewo comwi.
Amutolelele kulumbaisha Yehova. Defedi uyo mpashi wakalemba Kulumbaisha 71, wakalwiita Yehova ayi: “Kulangila kwangu kunanooli muli ndimwe lyoonse. Ndanoomulumbaishabo lyoonse alyoonse.” (Kulu. 71:14) Ino wakacita buyani ubo? Wakacita boobo kwiinda mukulwiitako bamwi pali Yehova akwiimba nyimbo shakumulumbaisha. (Kulu. 71:16, 23) Bweenka mbuli Defedi, inga twaba alusangalalo ndyetutolindila Yehova. Tulamulumbaisha ndyetutoshimikila, mumibandi yesu, andyetutokwiimba nyimbo sha Bwaami. Na mukeembe lwiimbo lumwi lwa Bwaami, amukabikile maano ku maswi aliimo ambweenga amupa kuba alusangalalo.
Amuyuminishikwe kwiinda mubamakwesu abenankashi. Defedi ndyaakalinga kwiinda mubukaalo buyumu, wakalwiita Yehova ayi: “Ndaakusumpula liina lyanu libotu pakati ka bantu banu.” (Kulu. 52:9) Aswebo inga twayuminishikwa ndyetuli pomwi abamakwesu abenankashi, kuteshibo ndyetutobungana andyetuli muncito yakushimikila, sombi apashiindi shimwi ndyetuli pomwi ambabo.—Loma. 1:11, 12.
Amuyumye kulangila kwanu. Kulumbaisha 62:5 ilaamba ayi: ‘Omoyo wangu umunabo tontolo mukushoma muli Lesa, mukwiinga kuli nguwe eenkabo nkokuswa kulangila kwangu.’ Cilayandika abuumbi kuyumya kulangila kwesu bunene bunene na mamanino aboneka anga acelwa kusa. Tulyeelete kushoma cakutatoonsha ayi shishomesho shakwe Yehova shilaakukumanishikwa nabi tulindile kwaciindi cilaamfu buyani. Inga twayumya kulangila kwesu na katwiiya Maswi akwe Lesa. Kucakubonenaako, amuyeeye pabushinshimi boonse bwaambwa mu Baibo bwakakumanishikwa, makani amu Baibo mbwaaendelana a Yehova nshaakatucafwa kushiba pali nguwe. (Kulu. 1:2, 3) Alimwi tulayandika kutolelela kupaila “munkusu sha mushimu usalashi” kwaamba ayi tutolelele kuba abushicibusa bubotu a Yehova ndyetutolindila kukumanishikwa kwa cishomesho cakwe ca buumi butamaani.—Judi 20, 21.
Bweenka mbuli Mwaami Defedi, amushome cakutatoonsha ayi Yehova alatondesha lusuno lutamaani akulama baabo balindila nguwe kwaamba ayi acitewo comwi. (Kulu. 33:18, 22) Amutolelele kulindila Yehova calusangalalo alimwi cakukalika moyo kwiinda mukubikila maano kushintu shibotu, kumulumbaisha, kuyuminishikwa kubashominyinaanu alimwi akwiinda mukutolelela kuyumya kulangila kwanu.
