Yaꞈ hkʼaˇ, Yaˬhoˉvaˬ lehˬ tinˍ taˍ ve awˬ yanˇ hkʼa gaˬ ngaˬ hui htaꞈ law tcuh gaˇ ve yoˬ. Aˬ htoꞈ ma te Yaˬhoˉvaˬ ngaˬ hui htaꞈ law tcuh gaˇ ve le? Yaˬhoˉvaˬ htaꞈ law chehˇ htaˇ ngaˬ hui a shu yawˇ awˬ to ha lehˬ ve cawˬ tuˬ hkʼaˬ hkʼe ga laˇ gʼa ve le?

Aˬ HTOꞈ MA TE YAˬHOˉVAˬ NGAˬ HUI HTAꞈ LAW TCUH GAˇ VE LE?

Liꞈ hpu hkʼaw kʼoˆ ve, “Gʼuiˬ sha lehˬ nawˬ hui htaꞈ ha kʼaˉ ve nyi ma cawˬ chehˇ sheˍ ve yoˬ. Awˬ lawn kʼo, yawˇ lehˬ hkʼaˬ htaˆ kaꞈ hteˇ ve cawˇ ve kanˉ htaꞈ ceh tiˉ te ve pa taw, nawˬ hui htaꞈ ga laˇ tuˬ gu taˍ hehnˇ taˍ ve yoˬ. Gʼuiˬ sha htaꞈ gʼaˇ va ve teˇ ceuˬ ceh tiˉ, ha lehˬ tuˬ ve awˬ ceuˬ htaꞈ gʼa hpehꞈ ve yoˬ.” (Iˉsaˍyaˆ 30:18) Awˬ tehˬ kʼo, Liꞈ hpu chi ve teˇ tawn lehˬ Iˉsaˍreˍlaˆ chaw nyi ma heh ve htaꞈ kʼoˆ piˇ taˍ ve yoˬ. (Iˉsaˍyaˆ 30:1) Yaꞈ hkʼaˇ, yawˇ hui hkʼaw ve chaw teˇ hpaˍ Yaˬhoˉvaˬ ve kanˉ ka tiꞈ yeˬ ve hkʼaw te chehˇ sheˍ ve yoˬ. Hkʼe te leh, tawˇ hkawˇ chi ve teˇ hpaˍ yawˇ hui dawˇ law kuiˬ cawˬ tuˬ te piˇ leh chi beuꞈ teˇ co˗e Yaˬhoˉvaˬ ve kanˉ te ve chaw kaꞈ dawˇ law kuiˬ cawˬ tuˬ te laˇ ve yoˬ.

Chi htaꞈ pa taw, Yaˬhoˉvaˬ yeunˇ hkanˍ leh law chehˇ ve awˬ yanˇ htaˇ, ngaˬ hui kaꞈ yeunˇ hkanˍ leh law cawˇ ve yoˬ. Haiˬ ve miˬ guiˬ chi htaꞈ hkʼaˬ hkʼe htaˇ te luˬ tuˬ, Yaˬhoˉvaˬ awˬ yanˇ tinˍ˗oˬ leh awˬ nyi oˇ ve teˇ nyi gaˬ la tuˬ htaꞈ yawˇ kaꞈ law chehˇ ve yoˬ. (Maꞈhtehˍ 24:36) Oˇ ve teˇ nyi gaˬ kʼo, Yaˬhoˉvaˬ leh yawˇ ve chaw htaꞈ Saˍtanˍ she pfuhˍ piˇ ve awˬ tehˬ maˇ heˆ ve tehꞈ, ngaˬ hui hkʼa tawˍ lehˆ gʼa mawˬ tuˬ yoˬ. Peuˬ hkʼawꞈ nawˉ Yaˬhoˉvaˬ lehˬ Saˍtanˍ leh yawˇ hpawˇ chehˇ ve chaw htaꞈ co co taiˍ taiˍ te luˬ piˇ tuˬ yoˬ. ‘Yaˬhoˉvaˬ lehˬ ngaˬ hui htaꞈ ha kʼaˉ ve nyi ma cawˬ ve yoˬ.’

Yaˬhoˉvaˬ lehˬ chi teˇ hkui ngaˬ hui shoꞈ shaꞈ ve htaꞈ gʼa hpuˇ chehˇ sheˍ ve htawˇ, ngaˬ hui yawˇ htaꞈ law chehˇ htaˇ ngaˬ hui ha lehˬ ve cawˬ tuˬ yoˬ tehꞈ yawˇ ka tiꞈ te taˍ laˇ ve yoˬ. Leh Iˉsaˍyaˆ kʼoˆ taˍ ve hkʼa shuˍ, ngaˬ hui Yaˬhoˉvaˬ htaꞈ law ve maˇ heˆ leh daꞈ ve awˬ ceuˬ hpehꞈ la tuˬ ve htaꞈ law chehˇ htaˇ, ngaˬ hui ha lehˬ ve cawˬ gʼa ve yoˬ. (Iˉsaˍyaˆ 30:18) a Leh ngaˬ hui hkʼaˬ hkʼe te ha lehˬ ve cawˬ gʼa tuˬ le? Ngaˬ hui htaꞈ ga laˇ gʼa ve 4 hkʼaˇ cawˬ ve yoˬ.

YAˬHOˉVAˬ HTAꞈ LAW CHEHˇ HTAˇ NGAˬ HUI A SHU YAWˇ AWˬ TO HA LEHˬ VE CAWˬ TUˬ HKʼAˬ HKʼE TE GʼA VE LE?

Daꞈ ve hpawˇ dawˇ nyi ve. Daˍviˆ a shaꞈ teꞈ kuiˬ hkʼaw hkʼaˬ htaˆ kaꞈ shoꞈ shaꞈ ve gʼa hpuˇ ve yoˬ. (Chiˇ mvuh ve 37:35) Yaꞈ hkʼaˇ yawˇ kʼoˆ ve, “Gʼuiˬ sha kanˉ te laˇ tuˬ, taꞈ iˉ gawˬ lehˍ chehˇ leh law taˍ˗oꞈ. Haiˬ ve kanˉ htaꞈ te leh paw sha la ve chaw hui htaꞈ nyi leh, hpehꞈ bawˬ ve taˇ cawˬ piˇ.” (Chiˇ mvuh  ve 37:7) Daˍviˆ lehˬ Gʼuiˬ sha peꞈ laˇ ve dawˇ law kuiˬ awˬ ceuˬ htaꞈ hkʼaˬ htaˆ kaꞈ dawˇ nyi chehˇ ve yoˬ. Chi hkʼoˆ kaꞈ, Yaˬhoˉvaˬ yawˇ htaꞈ daꞈ ve awˬ ceuˬ teˇ ceuˬ le le peꞈ laˇ ve htaꞈ yawˇ awˬ hpfuhˇ shiˍ ve yoˬ. (Chiˇ mvuh ve 40:5) Ngaˬ hui kaꞈ hkʼa shuˍ shuˍ, daꞈ ve hpawˇ coˇ caˇ leh dawˇ nyi ve kʼo, ngaˬ hui gʼa hpuˇ chehˇ ve shoꞈ shaꞈ ve awˬ lawn htaꞈ tiˉ maˇ dawˇ nyi leh ngaˬ hui Yaˬhoˉvaˬ htaꞈ law ve sha ve yoˬ.

Teˇ yanˇ le le Yaˬhoˉvaˬ htaꞈ chiˇ mvuh tuˬ awˬ yanˇ ca sheˍ. Chiˇ mvuh ve liꞈ 71 Daˍviˆ bvuhꞈ taˍ ve kʼa muiˬ hkawˇ hpehꞈ ve yoˬ. Yawˇ kʼoˆ ve, “hkʼaˬ htaˆ kaꞈ ngaˬ nawˬ htaꞈ dawˇ law leh nawˬ htaꞈ chiˇ mvuh tuˬ yoˬ.” (Chiˇ mvuh ve 71:14) Leh Daˍviˆ hkʼaˬ hkʼe te Yaˬhoˉvaˬ htaꞈ chiˇ mvuh ve le? Yaˬhoˉvaˬ htaꞈ caˉ daꞈ ve awˬ lawn shu htaꞈ kʼoˆ maˍ piˇ leh kʼa muiˬ hkawˇ kʼa leh yawˇ htaꞈ chiˇ mvuh ve yoˬ. (Chiˇ mvuh ve 71:16, 23) Ngaˬ hui kaꞈ Daˍviˆ hkʼa shuˍ te gʼa ve yoˬ. Ngaˬ hui Yaˬhoˉvaˬ ve kanˉ te leh, awˬ nu ve chaw geh tawˇ yaw daꞈ htaˇ, yawˇ htaꞈ chiˇ mvuh gʼa ve yoˬ. Ngaˬ hui kʼa muiˬ hkawˇ kʼa htaˇ kaꞈ yawˇ htaꞈ chiˇ mvuh gʼa ve yoˬ. Chi hkʼe te ve lehˬ ngaˬ hui Yaˬhoˉvaˬ htaꞈ law chehˇ htaˇ ha lehˬ ve cawˬ ve yoˬ. Gʼuˇ suhˍ teˇ pawˆ kʼo, hpawnˬ daꞈ kuiˬ yehˬ hkʼaw nawˬ Yaˬhoˉvaˬ htaꞈ kʼa muiˬ hkawˇ kʼa piˇ leh tcuhˉ kuiˬ nawˬ ha lehˬ ve cawˬ tuˬ hkʼaˬ hkʼe te laˇ ve htaꞈ hkʼa dehꞈ dawˇ nyi sheˍ.

Awˬ viˉ awˬ nyi geh awˬ gʼaˇ gʼa tuˬ yawˇ hui geh awˬ chawˇ te sheˍ. Daˍviˆ shoꞈ shaꞈ ve gʼa hpuˇ jaˇ htaˇ yawˇ kʼoˆ ve, “nawˬ daꞈ jaˇ ve awˬ lawn, nawˬ ve chaw moˍ lonˉ hpawnˬ daꞈ kuiˬ lo ngaˬ kʼaoˍ maˍ piˇ tuˬ yoˬ.” (Chiˇ mvuh ve 52:9) Hpawnˬ daꞈ kuiˬ hkʼaw Gʼuiˬ sha ve kanˉ te ve leh awˍ teˇ geh caˇ ve maˇ heˆ leh awˬ viˉ awˬ nyi geh tawˇ yaw daꞈ htaˇ, ngaˬ hui kaꞈ awˬ viˉ awˬ nyi geh awˬ gʼaˇ gʼa ve yoˬ.—Roˉmaꞈ 1:11, 12.

Nawˬ ve dawˇ law kuiˬ hkʼa tawˍ lehˆ mawˬ tuˬ coˇ caˇ leh te sheˍ. Chiˇ mvuh ve liꞈ 62:5 hkʼaw kʼoˆ ve, “ngaˬ lehˬ Gʼuiˬ sha htaꞈ gʼaˇ va leh, yawˇ htaꞈ tiˉ ngaˬ dawˇ law chehˇ ve yoˬ.” Awˬ leh meuˇ ve awˬ yanˇ ngaˬ hui dawˇ taˍ ve hkʼe maˇ gaˬ la sheˍ ve kʼo, ngaˬ hui ve dawˇ law kuiˬ htaꞈ hkʼa dehꞈ yonˍ gʼa tuˬ a yeˇ uiˍ jaˇ. Ngaˬ hui hkʼaˬ hkʼe maw gʼa law maw ve htawˇ maˇ kʼoˆ, Yaˬhoˉvaˬ ka tiꞈ te taˍ laˇ ve awˬ tehˬ hpehꞈ la tuˬ yoˬ tehꞈ yonˍ gʼa ve yoˬ. Ngaˬ hui ve dawˇ law kuiˬ htaꞈ hkʼa dehꞈ yonˍ gʼa tuˬ Liꞈ hpu gʼaw leh gʼa hpfuhˆ nyi ve yoˬ. Tawˇ pa haˉ te kʼo, Liꞈ hpu hkʼaw tcuh kaˍ paˍ ve tawˇ hkawˇ htaꞈ caˉ daꞈ ve henˇ ve, Liꞈ hpu hkʼaw ve awˬ lawn teˇ hpaˍ hkʼaˬ hkʼe te hawˍ daꞈ ve htaꞈ nyi leh Yaˬhoˉvaˬ ve te hkʼaˇ dawˇ hkʼaˇ teˇ hpaˍ htaꞈ hkʼa dehꞈ shiˍ tuˬ te ve yoˬ. (Chiˇ mvuh ve 1:2, 3) Chi hkʼoˆ kaꞈ, co co taiˍ taiˍ a shaꞈ gʼa tuˬ ka tiꞈ te taˍ laˇ ve awˬ tehˬ hpehꞈ la tuˬ law chehˇ htaˇ, ngaˬ hui Yaˬhoˉvaˬ geh meuˆ daꞈ tuˬ “daꞈ ve kehˬ ve awˬ ha hpu awˬ hkʼaw lo bon lawˬ chehˇ˗oˆ.”—Yuˇdaꞈ 20, 21.

Jawˇ mawˇ Daˍviˆ hkʼa shuˍ shuˍ, law chehˇ ve chaw htaꞈ Yaˬhoˉvaˬ nyi chehˇ ve tehꞈ yonˍ gʼa leh yawˇ ve kanˉ te ve chaw htaꞈ yawˇ haꞈ ve tehꞈ hpeuꞈ maw laˇ chehˇ ve htaꞈ kaꞈ yonˍ gʼa ve yoˬ. (Chiˇ mvuh ve 33:18, 22) Nawˬ yeunˇ hkanˍ ve hkʼaw Yaˬhoˉvaˬ htaꞈ law ve kʼo ha lehˬ gʼa tuˬ yoˬ. Daꞈ ve hpawˇ dawˇ nyi ve, Yaˬhoˉvaˬ htaꞈ chiˇ mvuh ve, awˬ viˉ awˬ nyi geh awˬ gʼaˇ gʼa tuˬ yawˇ hui geh awˬ chawˇ te ve, leh nawˬ ve dawˇ law kuiˬ htaꞈ hkʼa dehꞈ yonˍ gʼa tuˬ te sheˍ.