Inoko Yehova usakanga tumwilaije na kitūkijetyima mwanda wa alonge bintu pa kitatyi kyatungile. Mwanda waka usakanga tumwilaije? Le i bika bibwanya kwitukwasha twikale na nsangaji potwilaija?

MWANDA WAKA YEHOVA USAKANGA TWILAIJE?

Bible unena’mba: “Yehova wilaije na kitūkijetyima kwimutōkelwa mutyima, kadi ukemana mwanda wa kwimufwila lusa. Mwanda Yehova i Leza wa boloke. Ba nsangaji i boba bonso bamukungila.” (Isa. 30:18) Bino binenwa bya Isaya byādi bitala dibajinji Bayuda ba bujundu. (Isa. 30:1) Inoko mu bukata mwabo mwādi ne Bayuda bamo ba kikōkeji, kadi bino binenwa byēbapele lukulupilo. Bino binenwa bimo byonka bipānga lukulupilo ne bengidi ba Yehova ba kikōkeji dyalelo.

Nanshi tufwaninwe kwilaija na kitūkijetyima, mwanda Yehova wilaije na kitūkijetyima. I mutunge kitatyi kyakafudija ino ngikadilo ya bintu, kadi wilaije dino difuku ne nsá bifike. (Mat. 24:36) Mu kine kitatyi’kya, bikamweka patōka amba matope a Dyabola padi Yehova ne pa bantu bamwingidila, i a bubela. Yehova ukatalula’ko Satana ne boba bonso badi ku mutamba wandi, inoko ‘batwe uketufwila lusa.’

Pano’ko bidi, Yehova kakatalula’kopo padi makambakano etu, inoko witukulupija’mba tubwanya kwikala na nsangaji potwilaija. Monka mwānenene’byo Isaya, tubwanya kwikala na nsangaji potutengēle na kipyupyu kintu kiyampe kilongeke. (Isa. 30:18) a I muswelo’ka otubwanya kwikala na ino nsangaji? Bintu biná bibwanya kwitukwasha.

MWA KWIKADILA NA NSANGAJI POTWILAIJA

Tá mutyima ku bintu biyampe. Mulopwe Davida wātenwe na bintu bivule bibi mu būmi bwandi. (Ñim. 37:35) Inoko wālembele amba: “Ikala talala ku meso a Yehova kadi mukungile na nsangaji. Kokifītyijibwa mutyima na muntu ufikidija nkuku yandi.” (Ñim. 37:7) Davida aye mwine wālondele ano madingi na kuta mutyima  ku lukulupilo lwandi lwa lupandilo. Kadi wātele mutyima ku madyese onso āmwesele Yehova. (Ñim. 40:5) Ne batwe netu, shi tute mutyima ku bintu biyampe pa kyaba kya kuta’o enka ku makambakano etu, tukapēlelwa kwilaija Yehova.

Tendela nyeke Yehova. Mulembi wa Ñimbo ya Mitōto 71, mobimwekela i Davida, wālombwele Yehova amba: “Nkakungilanga nyeke; nkabweja mitendelo yobe.” (Ñim. 71:14) Le wādi wa kutendela Yehova namani? I na kulombola bantu bakwabo myanda ya Yehova ne kumwimbila mitendelo. (Ñim. 71:​16, 23) Pamo bwa Davida, netu tubwanya kutana nsangaji potwilaija Yehova. Tumutendelanga kupityila ku mwingilo wetu wa busapudi, ku mīsambo yetu ya difuku ne difuku, ne ku ñimbo yetu ya mu butōtyi. Nanshi kitatyi kikwabo kyosa kwimba lwimbo kampanda lwa Bulopwe, ubulwepo kuta mutyima ku musapu udi’mo uleta nsangaji?

Itabija batutu ne bakaka bakukankamike. Davida paādi mu makambakano, wāsapwidile Yehova amba: “Mu meso a bantu bobe ba lulamato, nkakulupilanga mu dijina dyobe.” (Ñim. 52:9) Netu tubwanya kukankamikwa na batutu ne bakaka, ke enkapo’tu ku kupwila ne mu busapudi ino i ne potupityija kitatyi pamo.—Loma 1:​11, 12.

Ningija lukulupilo lobe. Ñimbo ya Mitōto 62:5 inena’mba: “Ami ntengele Leza talala nyā mwanda lukulupilo lwami lutambanga kwadi.” I kya mvubu mpata kwikala na lukulupilo lukomo—nakampata shi mfulo ibaije kufika kutabuka motwadi tulangila. Tufwaninwe kukulupila’mba milao ya Yehova ikafikidila nansha shi twiilaije bininge namani. Tubwanya kuningija lukulupilo lwetu na kwifunda Kinenwa kya Leza—ko kunena’mba bupolofeto, kukwatañana kwa myanda idi’mo, ne myanda palapala itusokwedile Yehova pādi. (Ñim. 1:​2, 3) Kadi tunenwe kwendelela ‘kulomba mushipiditu ujila’ pa kulama nyeke kipwano kiyampe na Yehova, pano potutengēle kufikidila kwa mulao wandi wa būmi bwa nyeke.—Yude 20, 21.

Pamo bwa Davida, kulupila’mba meso a Yehova adi pa boba bamwilaije kadi wibalombolanga buswe bwandi bwa ndamatyidile. (Ñim. 33:​18, 22) Endelela kwilaija Yehova na kuta mutyima pa bintu biyampe mu bobe būmi, na kumutendela, na kwitabija batutu ne bakaka bakukankamike, ne na kuningija nyeke lukulupilo lobe lulēme.