Je Jeobá kui xi mele nga tsejta katamaa josaʼnda nga kjoaʼaí nichxin xi jetíjnachoa̱le. Ánni nga kui xi menile Jeobá nga kʼoasʼiaan. Jméni xi koasenkaoná nga tsejta koaan kʼoa nga tsjoa sʼe̱ tokoán.

ÁNNI KʼOATSONI JEOBÁ NGA TSEJTA KATAMAA NGA CHÓYAA

Je Biblia itso: “Je Jeobá skóyakaola nga koakono kjoanda, kʼoa kuisótjeen nga koakono kjoamatokon. Nga̱ je Jeobá jngoní Niná xi kjoatéxomakixi tjínle. Nʼio tsjoa tjíole je xi je koyale” (Is. 30:18). Jé chjota judío xi xíjin koan xokitsole Isaías (Is. 30:1). Kʼoajinti tsakinyakao én jebi je chjota judío xi kixi kitʼale Niná kʼoa kʼoati kuinyakaoná tsanda ñá ndʼaibi.

Je Jeobá tsejta kjima nga tíkoya, kʼoati machjén nga kʼoati sʼiaan tsanda ñá. Jetíjnachoa̱le nichxin kʼiáni sikjeson jmeni xi chon sonʼnde, tonga tíkoyakaola josaʼnda nga kjoaʼaí nichxin jebi (Mat. 24:36). Nga jekʼoakoa̱n, kʼiaa jchale nga to énndiso jmeni xi tso je Na̱i xi tʼatsʼe Jeobá kao tʼatsʼe choʼndale. Je Jeobá sikjeson je Na̱i kao xi ya tsjoánganʼiole, tonga koakole kjoamatokon je choʼndale.

Je Jeobá alikui kjoaʼaxinná je kjoa xi bitjatojiaan ndʼaibi, tonga basenkaoná nga chókjoajinná kʼoa nga tsjoa sʼe̱ tokoán. Tojo kitso je Isaías, koaan tsjoa kʼoé tokoán kʼianga tichoyalee je kjoanda xi kjoaʼaíkao Niná (Is. 30:18). a Ñola koya kataʼya xi koasenkaoná nga tsjoa sa̱tío tokoán.

JÓSʼIAAN NGA TSJOA SʼE̱ TOKOÁN NGA TICHOYÁ

Kuenta sʼiaan josʼin tíbasenkaoná Jeobá. Je rey David tsee kjoa jaʼatojin (Sal. 37:35). Ninga kʼoalani, i kitso: “Jyó tijnai kʼoa tsejta katamai nga chóyalai je Jeobá. Ali yaolijin nijtilai kʼianga nda bichómani jmeni xi bʼéndajin je chjotatsʼen” (Sal. 37:7). Je David kʼoakisʼin jokitso. Kui kuenta kisʼin nga kʼoakitsole Jeobá nga je koasenkao nga kjoa kjoaʼatojin kʼoa chjí tsabe josʼin tsakasenkao Jeobá (Sal. 40:5). Kʼoati koa̱n kʼoasʼiaan tsanda ñá, kui kuenta sʼiaan josʼin tíbasenkaoná Jeobá kʼoa  tsínkui nʼio si̱kjaʼaitsjeen kjoa xi bitjatojiaan. Tsa kʼoasʼiaan, ngisaa tsejta koaan nga chóyala josaʼnda nga kjoaʼaxin Jeobá je kjoa xi tjín sonʼnde.

Je Jeobá chʼa̱sjengʼaa ngantsjai. Je David i kitsole Jeobá kʼianga kiski Salmo 71: “Tosi tonda skoya; sa nda sa nda kʼoasjengʼale” (Sal. 71:14). Je David kʼiaa tsakʼasjengʼa Jeobá nga kitsoyale xi kjaʼaí xi tʼatsʼe kʼoa nga kisele (Sal. 71:​16, 23). Tojo kisʼin David, kʼoati koa̱n chʼa̱sjengʼaa Jeobá tsanda ñá kʼianga kʼuínyasoán, nga chja̱kaoñá xíngiaa xi tʼatsʼe Jeobá kʼoa nga kuijndálee. Kʼianga kuijndálee Jeobá, kuenta sʼiaan jmé xi tínchja̱ni xi tijndaa. Nga kʼoasʼiaan, koasenkaoná nga kao kjoatsjoa chóyalee nichxinle Jeobá.

Si̱miyoaa je ndsʼee. Kʼianga kjoa jaʼatojin David, i kitsole Jeobá: “Ji sinʼiotʼale ngixko̱n xi kixi fitʼali” (Sal. 52:9). Jé kisimiyo choʼndale Niná xi kisinʼio kon. Koaan kʼoasʼiaan tsanda ñá, chja̱kaonajmiá je ndsʼee kʼianga satíoná kjoajtín, nga ʼmiyasoán kʼoa tokʼiani (Rom. 1:​11, 12).

Tosi tonda chóyaa. Salmo 62:​5, itso: “Tsejta koa̱n nga skoyale Niná, nga̱ je títsjoána kjoachoya”. Tsa kʼoasʼin nikjaʼaitsjeen nga tísíkʼachxin Jeobá, nʼio chjíle nga tosi tonda tsejta katamaa kʼoa chóyala. Ñaki kʼoéjngoaa tokoán nga sitjoson jmeni xi tso ninga tse kʼoachxinle. Jméni xi sʼiaan nga tosi tonda chóyaa josaʼnda nga kjoaʼaí nichxinle Jeobá. Machjén nga chótʼayá Biblia, kuenta sʼiaan josʼin tíbitjoson je én xi tongini kinokjoa, kjoásjaiyaa josʼin mangóson jme xi kitso nga jngó jngó chjota xi kiski je Biblia kʼoa jmeni xi tsoná xi tʼatsʼe Jeobá (Sal. 1:​2, 3). Kʼianga kʼoétsʼoalee Jeobá si̱jélee nganʼiotsjele nga katabasenkaoná nga tosi tonda miyoná katama kʼoa chóyala josaʼnda nga ʼndenaxó koa̱n Sonʼnde (Jud. 20, 21).

Tojo kisʼin rey David, kʼoéjngoaa tokoán nga kuenta tísʼín Jeobá je xi tsejta kjima nga tjíokoyale, kʼoa bakóle kjoatsjoacha je xi kʼoasʼín (Sal. 33:​18, 22). Nga tsjoa sʼe̱ tokoán nga tichoyalee nga katafaʼáxin Jeobá je kjoañʼai xi tjín kʼoa nga katasíndachon Sonʼnde, kuenta sʼiaan josʼin tíbasenkaoná, tosi tonda chʼa̱sjengʼaa, si̱miyoaa je ndsʼee kʼoa tsín jao kʼoé tokoán nga kuitjoson jmeni xi tso Jeobá.