Nkhale wuutteelakani nrima ni nvilele ukati unonweherereenyu Yehova
NYUUVA nnoona upica uphiya nihuku Yehova ninhalaawe umaliha masakha o ntuninyani, keera? (Apoka. 21:1-5) Khweeliini, nyuuva nnaapheela cinene wiira nno nihukunno niwe. Masi ikhanle itthu yoorika uvilela ni unweherera Yehova wiira eerannyeehe citthu cotheene cikhuluvelihilyaawe. Venci-venci, yanikhumelelaka masankiho. Wakhalaka wiira ihaavo itthu yomaana inweherereehu ni iyo itthwiiyo yaahiirannyeehe, hiiva ninaakhala ooriipiya nrima cinene.—Miru. 13:12, niwehero.
Hataa ukhalaka commo, Yehova nopheela wiira hiiva nihoocye uweherera ukati ulakenlyaawe umalamaliha citthu coohinamaana. Kontha isiyani nopheelaawe wiira nivilele ni niweherere? Ni isiyani inhala unikavihera ukhala unitteelaka nrima ukati unonweherereehu?
KONTHA ISIYANI NOPHEELAAWE WIIRA NIVILELE NI NIWEHERERE?
Ibiiblya ineera: “Yehova naaweherera avilelakoono wiira ookavihereni, ni naahala wunwa waryaawe wiira oothoonyihereni uthunku. Kontha Yehova khanle Nluku nasariya. Ootteeliya thi ale ahinhiya unweherera.” (Isai. 30:18) Ala akhanle moolumo a Isaiya ni yantikheliye ayuuta yahaamwiiwelela Yehova. (Isai. 30:1) Masi iriyari wo yaayo ayuutaayo, yahaavo atthu akhwaawe ookhuluvelya. Ala moolumwaala yaanawaavaha niweherero ayova. Aswali ookhuluvelya a Yehova ilelo pooti ukhalana niweherero yasomaka moolumo a Isaiya.
Hiiva nihaana niwehereraka nivilelaka, kontha Yehova ciicammo naaweherera avilelaka. Uyo naahiya uviraka ukati hinaaya umalamaliha ila ituninya yoohilokeela. Uyo naaweherera uphiya nihuku ni ukati ulakenlyaawe. (Mat. 24:36) Naphiyaka nno nihukunno, unaahala woonannya wiira citthu cotheene cuulumilyaawe amwaacaka Yehova ni aswalyaawe caari cowoothiya. Vano, Yehova naahala ummalamaliha Sotwani ni ale ari mphanttyaawe, masi Yehova ‘naahala unoonela uthunku hiiva.’
Nihinaaya uphiya nno nihukunno, Yehova khanhala umaliha masakha anniphwanya, masi uyo naakhuluveliha wiira hiiva ninaahala ukhitiri ukhala ootteeliya ukati unonweherereehu. Toko Isaiya cinryaawe, hi pooti ukhitiri ukhala ootteeliya niwehereraka wiirannya itthu yomaana. (Isai. 30:18) a Masi ninhala ukhitiri cani? Nttwee noone citthu 4 cinhala unikavihera.
ISIYANI INHALA UNIKAVIHERA UKHALA UNITTEELAKA NRIMA UKATI UNONWEHEREREEHU?
Muupuwele citthu comaana cinwiirannyeelani. Mwene Davidi ahoona ciirannyaaka citthu cinci coohinamaana. (Isaa. 37:35) Waahookhalaru commo, uyo ahantikha co: “Mmaale uhoolo wa Yehova ni munweherere cinene. Nhirusiye nlattu wa pinaatamu cimmweettela saana citthu coohinamaana cinoopuwelacaawe upanka.” (Isaa. 37:7) Davidi aheettela iyo ikannweeyo ni anawuupuwela cinene niweherero naavahiyaawe ni Yehova. Uyo ciicammo ahosukhurweela citthu comaana cotheene caapankeliyaawe ni Yehova. (Isaa. 40:5) Hiiva nantakihaka ni noopuwelaka citthu comaana cinniirannyeela uhiya ukhala nuupuwelaka citthu coohinamaana cinnikhumelela, khunhala unirikela unweherera Yehova.
Nhihiye unttottopela Yehova. Isaalimu 71 atthunaka antikhile Davidi. Uyo ahomwiirela Yehova co: “Miiva, akinhala uhiyerera wuuwehererani; mi kinaahala wuuttottopelani muukumini waka wotheene.” (Isaa. 71:14) Davidi anttottopela cani Yehova? Uyo anttottopela aahimeryaka akhunanawe myaha ca Yehova ni amwiipelaka icipo. (Isaa. 71:16, 23) Toko Davidi, hiiva ciicammo ninaahala ukhitiri ukhala ootteeliya ukati unonweherereehu Yehova. Ninhala ukhitiri nanttottopelaka Yehova wuulalyaani moolumwaawe, ukati unwoopaneehu mwaha akhunanihu ni neepaka icipo cihu. Vano, ikwaha inhaleenyu wiipa icipo cihu, nweheehe itthu inhimyaaya nciponno ni muupuwela mananna iyo itthwiiyo cinootteelihaayani nrima.
Ntothe ulipihiya nimayamunna ni nimayanuunu. Ukati Davidi wankhumelelaaya masakha, uyo ahomwiirela Yehova co: “Iriyari yaatthu anoovaresesani, kinaahala uweherera ncina ninyu.” (Isaa. 52:9) Hiiva ciicammo pooti ulipihiya nimayamunneehu navirihaka ukati nkhayi naayo, kahi paahi umikutthaanoni awula wuulalyaani, masi ciicammo ukati wo waathukathukana.—Aroo. 1:11, 12.
Nlipihace niweherero ninyu. Isaalimu 62:5 ineera: “Nluku paasi phinonwehereraaka kinamanle, kontha uyo nawoona uweherera waka.” Ikhanle itthu yofayita ulipihaca niweherero nihu, venci-venci wakhalaka wiira nancenre khalayi uweherera umalamalihiya ila ituninya yoohinamaaneela. Nihaana nikhuluvelaka wiira citthu cikhuluvelihilyaawe Yehova cinaahala wiirannya, hataa ukhalaka wiira nipacenre khalayi uweherera. Nihaana nilipihacaka niweherero nihu nisomaka Nuulumo na Nluku, inatiri cawe, nisomaka mananna miphantte coovirikana co mbiiblyani cinvaranacaaya ni nisomaka citthu cinci Yehova noniitthucihaawe cinoonihera makhalelwaawe. (Isaa. 1:2, 3) Hiiva ciicammo, nihaana nihihiyaka ‘ulompa nilepelaka nnepa wowaarya’ wiira nilipihace upatthaniihu ni Yehova ukati ninweherereehu waakhela ukumi woohimala.—Yuda 20, 21.
Toko mwene Davidi, nkhuluvele wiira Yehova nawaawacera, nawaakhikicera ni naawoonihera nifento nookhuluvelya otheene ale anonweherera. (Isaa. 33:18, 22) Phimaana, nhihiye uvilela ni munweherera Yehova, mwiikurumicaka wuupuwela citthu comaana cinwiirannyeelani, uttottopela, utotha ulipihiya nimayamunna ni ulipihaca niweherero ninyu nomaana.
a Nuulumo “ahinhiya unweherera” niiluuka yaataphuleliyaaya wiipaceroni pooti ciicammo utaphuleliya “upheela venci wiira itthu yiirannye.” Iyo itthwiiyo inthoonyera wiira khunnanara hiiva upheela wiira Yehova amalihe masakheehu.
