Mwaya nu Luzango Lino Mukuloleelela Pali Yeova
UZYE mukulondesya ukwiza lola lino Yeova alafumyapo iviipe vyonsi nu kulenga ivintu ukuya ivipya? (Kuso. 21:1-5) Ukwaula nu kutwisika mukalondesya ukwiza lola lino ivintu vii vilacitika. Nomba asi lyonsi lino cikaanguka ukutwalilila ukulolela pali Yeova sana sana lino twakwata intazi. Tukauvwa sana uyi ndi cakuti vino tukupalila visikucitika.—Mapi. 13:12.
Nomba Yeova akalonda twaya ateekele lino tukulolela ukuti atwazwe pa nsita yakwe ilinge. U mulandu ci uno akalondela tutwalilile ukuya ateekele lino tukulolela? I vyani ivingatwazwa ukuya ni nsansa lino tukulolela?
U MULANDU CI UNO YEOVA AKALONDELA TWAYA ATEEKELE LINO TUKULOLELA?
Baibo ikalanda ukuti: “Yeova alatwalilila ukuloleela ukumucitila ivisuma, nupya alamulanga uluse. Pano Yeova a Leza uwaya nu mulinganya. Aansansa ayayo aakatwalilila ukumuloleela.” (Eza. 30:18) Amazwi yaa yakwe Ezaya yalozyanga uku ya Yuda ali atalame. (Eza. 30:1) Nomba umu ya Yuda mwali yamwi ali na ucisinka nupya amazwi ya yayapeezile upaalilo. Amazwi yaa yakapeela upaalilo nu ku yaomvi yakwe Yeova acisinka ndakai.
Fwandi tulinzile ukuya ateekele lino tukulolela pano Yeova waya umuteekele. Yeova wapekanya uwanda ni nsita ino alafumyapo iviipe ivikacitika ndakai nupya watwalilila ukulolela ukuti uwanda uwo ukafike. (Mate. 24:36.) Pa nsita iyo cilamanyikwa ukuti vino Satana akalanda pali Yeova alino na pa yaomvi yakwe ivya ufi. Alonona Satana alino na antu yakwe, lelo swemo ‘alatulanga uluse.’
Pali ino nsita Yeova atanga asisyepo intazi zino tukakwata, lelo akatwazwa ukusininkizya ukuti tungatwalilila ukuya ni nsansa lino tukulolela. Wakwe vino Ezaya walanzile tungatwalilila ukuya ni nsansa nga tukupaalila ukuti ivisuma vilacitika ukunkoleelo. (Eza. 30:18) Tungacita uli pakuti tukwate insansa? I vintu 4 ivyalondelelapo vingatwazwa.
IVYA KUCITA PAKUYA NI INSANSA LINO MUKULOLELA
Mwaika mano uku visuma. Umwene Devedi waweni iviipe ivingi ivyacitikanga. (Masa. 37:35) Walemvile ukuti: “Uteekele sana nu kutaila muli Yawe. utasokela wiyo uwaya nu longo, nanti wiyo akacita ivya ucenjezi.” (Masa. 37:7) Devedi wisile sana amano uku mazwi yaa nu kutwalilila ukuya nu upaalilo lino akulolela. Nupya wisile sana amano uku mapaalo yano wapokelelanga ukufuma kuli Yeova. (Masa. 40:5) Naswe kwene nga tukwika amano uku visuma ivikatucitikila nu kukana ika amano uku viipe tulatwalilila ukuya ni nsansa nupya ateekele lino tukulolelela pali Yeova.
Mwaika mano ukukulumbanya Yeova. Uwalemvile Masamu cipande 71, walanzile ukuti: ‘namaloleelanga pali Yeova nu kumulumbanya.’ (Masa. 71, 14) Uzye wali nu kulacita uli pa kulumbanya Yeova? Wali nu kulaneena yauze pali Yeova alino nu ku mulumbanya. (Masa. 71:16, 23) Wakwe Devedi, naswe kwene tungatwalilila ukuya ni nsansa lino tukuloleelela pali Yeova. Tukamulumbanya ukupitila muli vino tukalanda cila wanda, ukuombako umulimo wa kusimikila alino na lino tukukutika uku nyimbo zya wene. Lino mu kwimba ulwimbo lwa Wene mwaelenganya pa mazwi akukomelezya ali umu lwimbo
Mwaleka aina na ya nkazi yamikomelezya. Lino Devedi wali ni ntazi wanenyile Yeova ati: “Namapaalilanga mwi zina lyako, apa manso ya antu yako.” (Masa. 52:9) Naswe kwene tungakomeleziwa na ina na ya nkazi asi sile lino tuli pa kulongana nanti lino tukuomba umulimo wa kusimikila lelo na lino tukwizizya capamwi.—Loma 1:11, 12.
Mwakomya upaalilo winu. Pa Masamu 62:5 pakati: “Nemo a Leza sile wenga, ali wino nikalilila.” Ukuya nu upaalilo ukome cikapiliula ukutwalila ukutaila ukuti vino tukaloleela vilacitika nupya ci cingatwazwa ukutwalilila ukuya ateekele umu nsi ii muno ivintu vyatala sana. Tulinzile ukutwalilila ukutaila ukuti vyonsi vino Yeova watulaya vilafikiliziwa asi mulandu ni nsita ino tungaloleela. Tungakomya utailo witu nga tukuisambilizya Baibo, ukwelenganya pa masesemo alembwamo, kulola vino yakufikiliziwa ndakai, vino ivyeo ivyalembwamo vyalemana alino na vino ivyeo ivyalembwamo vikalanda pali Yeova. (Masa. 1:2, 3) Tulinzile nu kutwalilila ‘ukulapepa ukulingana nu mupasi wa muzilo’ pakuti tutwalilile ukuya na ucuza usuma na Yeova lino tukulolelela ukuti akafikilizye ulayo uno watulaya uwa kutupeela umi wa pe.—Yuda 20, 21.
Namwe kwene mungasininkizya wakwe vino Umwene Devedi wasininkizye, ukuti amanso yakwe Yeova yaya pa antu akaloleelela pali aliwe, nupya nu kutemwa kwakwe kwaya pali aliyo. (Masa. 33:18, 22) Mwatwalilila ukuya ateekele lino mukuloleelela pali Yeova, mwalola ivisuma vino aakamucitila, mwamulumbanya nupya mwapokelela ukwazwa ukufuma ku ina na ya nkazi nu kutwalilila ukukomya utailo winu muli Yeova
