Meñe ãindein, ak Jeova ej kõtmãne bwe jen kijenmej wõt im kõttare an em̦m̦akũt ilo iien eo em̦õj an karõke. Etke ej kõtmãne bwe jen kõm̦m̦ane men in? Ta eo emaroñ jipañ kõj bwe jen maroñ m̦õn̦õn̦õ ilo ad kõttare?

ETKE JEOVA EJ KÕTMÃNE BWE JEN KÕTTARE?

Baibõl̦ eo ej ba: “Jeova enaaj kõttar, bwe En maroñ in jouj ñan kom̦; im kõn men in Enaaj utiej, bwe En maroñ in tũriam̦okake kom̦; bwe Jeova juon Anij in ekajet jim̦we; rem̦õn̦õn̦õ ro otemjej rej kõttar E.” (Ais. 30:18) Ilo jinoin, Aiseia ear je naan kein ñan ri-Ju ro me repenawiia. (Ais. 30:1) Bõtab ear wõr wõt ro retiljek ibwiljin ri-Ju ro, im naan kein rar lel̦o̦k kõjatdikdik ñan er. Im ejja naan kein wõt rej bar lel̦o̦k kõjatdikdik ñan ri-karejar ro retiljek an Jeova ilo raan kein.

Kõn men in, jej aikuj kijenmej im kõttar wõt kõnke Jeova ej bar kijenmej im kõttar. Em̦õj an karõke iien eo enaaj bõktok jem̦l̦o̦kin jukjukun pãd in, im ej kõttar ñan raan eo im awa eo ñe enaaj kõm̦m̦ane men in. (Matu 24:36) Ilo iien en̦, enaaj lukkuun alikkar bwe men ko Tepil̦ eo ej n̦aruon Jeova im ri-karejar ro An kaki, reriab. Innem, Enaaj jol̦o̦k Setan im jabdewõt eo ej jait ippãn, bõtab Enaaj “tũriam̦okake [kõj].”

Ilo tõre in me jej kijenmej im kõttar wõt, Jeova emaroñ jab jol̦o̦k apañ ko ad, bõtab ej rõjañ im kaalikkar ñan kõj bwe jemaroñ m̦õn̦õn̦õ ilo ad kõttar. Ãinwõt an kar Aiseia ba, jemaroñ m̦õn̦õn̦õ meñe jelukkuun kõn̦aan ak kijooror bwe juon men em̦m̦an en wal̦o̦k. (Ais. 30:18) a Ewi wãween bwe jen maroñ bõk kain m̦õn̦õn̦õ rot in? Eokwe, ewõr emãn wãween ko remaroñ jipañ kõj.

WÃWEEN AD MAROÑ M̦ÕN̦ÕN̦Õ ILO AD KÕTTAR

L̦õmn̦ak wõt kõn men ko rem̦m̦an. Elukkuun lõñ men ko renana rar wal̦o̦k ilo mour eo an Kiiñ Devid. (Sam 37:35) Meñe ãindein, ak ear je im ba: “Kom̦win kijenmej im jokwane im̦aan mejãn [Jeova] m̦ae iien eo enaaj kõm̦m̦an ankilaan. Kom̦win jab inepata kõn ro jeraam̦m̦an im kõn ro etõprak pepe ko aer renana.” (Sam 37:​7, UBS) Devid make ear bõk naanin kakapilõk in ñan bũruon ikijjeen an kar lukkuun l̦õmn̦ak wõt kõn  kõjatdikdik eo an bwe Jeova enaaj lo̦mo̦o̦rene. Ear bareinwõt kwal̦o̦k an kam̦m̦oolol kõn aolep jeraam̦m̦an ko ear bũki jãn Jeova. (Sam 40:5) Kõj bareinwõt el̦aññe jej l̦õmn̦ak wõt kõn men ko rem̦m̦an ilo mour ko ad im jab l̦õmn̦ak wõt kõn men ko renana, jenaaj loe bwe epidodol̦o̦k ad kõttare Jeova.

Poub wõt ilo am̦ nõbar Jeova. Ri-jeje eo an Sam 71 emaroñ kar Devid. Ri-jeje in ear ba naan kein ñan Jeova: “Inaaj kõjatdikdik iien otemjej, im inaaj nõbar Eok im kal̦apl̦o̦k aõ nõbar.” (Sam 71:14) Ewi wãween an nãj kar nõbar Jeova? Eokwe, enaaj kar kõnono ñan ro jet kõn Jeova im al kõn alin nõbar ko ñane. (Sam 71:​16, 23) Ãinwõt Devid, jemaroñ lo lañlõñ ilo ad kõttare wõt Jeova. Jej nõbare ikijjeen jerbalin kwal̦o̦k naan eo ad, ad bwebwenato ippãn ro jet kajjojo raan, im ikijjeen al ko ad. Ñe kwõnaaj bar al kõn juon iaan alin kweilo̦k ko ad, lukkuun l̦õmn̦ak kõn naan ko ilo al eo im wãween an naan kein kõm̦m̦an bwe kwõn lañlõñ.

Kõtl̦o̦k bwe ro jeim̦ im jatũm̦ ren kõkajoor eok. Ke Devid ear iioon apañ ko, ear ba ñan Jeova: “Ilubwiljin armej ro doom̦ inaaj kwal̦o̦k am̦ em̦m̦an.” (Sam 52:​9, UBS) Kõj bareinwõt jemaroñ bõk kõkajoor ñe jej kõm̦m̦ao ippãn ro jeid im jatid me retiljek, ejjab ilo iien kweilo̦k im kwal̦o̦k naan ko wõt, ak bareinwõt ilo iien iiãio ko.—Rom 1:​11, 12.

Kõkajoorl̦o̦k kõjatdikdik eo am̦. Sam 62:5 ej ba: “[Ij] kõttar Anij wõt, bwe aõ kõtmãne ej jãn E.” Elukkuun aorõk bwe en kajoor kõjatdikdik eo ad el̦aptata ñe jem̦l̦o̦kin jukjukun pãd in erum̦wij an itok jãn iien eo jaar kõtmãne kake. Jej aikuj lukkuun tõmak bwe kallim̦ur ko an Jeova renaaj baj jejjet wõt kũtieer jekdo̦o̦n ewi toon ad aikuj kõttar. Jemaroñ kõkajoorl̦o̦k kõjatdikdik eo ad ikijjeen ad katak Naanin Anij—jemaroñ ekkatak kõn kanaan ko, wãween an men ko ri-jeje Baibõl̦ ro rar jei jab idaaptõk jãn doon, im men ko Jeova ej kwal̦o̦ki kõn E make. (Sam 1:​2, 3) Bareinwõt, jej aikuj wõnm̦aanl̦o̦k wõt im “jar ikijjeen jetõb kwõjarjar” ñan dãpij wõt an em̦m̦an jem̦jerã eo ad ippãn Jeova ilo ad kõttare an jejjet kũtien kallim̦ur eo an kõn mour indeeo.—Jud 20, 21.

Ãinwõt Kiiñ Devid, lukkuun lõke bwe Jeova ej lale im kõjparok ro rej kõttare im Ej kwal̦o̦k yokwe eo An em̦ool ñan er. (Sam 33:​18, 22) Wõnm̦aanl̦o̦k wõt ilo am̦ kijenmej im kõttare wõt Jeova ikijjeen am̦ l̦õmn̦ak wõt kõn men ko rem̦m̦an ilo mour eo am̦, ilo am̦ nõbare, ilo am̦ kõtl̦o̦k bwe ro jeim̦ im jatũm̦ ren kõkajoor eok, im ilo am̦ kõm̦m̦an bwe kõjatdikdik eo am̦ eaorõk en kajoor wõt.