Туге гынат Иегован кумылжо почеш ме чытен вучышаш улына ту жапым, кунам тудо чылажымат вашталташ тӱҥалеш. Молан тудо мемнан деч тидым вуча? Куаным йомдарыде, мыланна вучаш мо полшен кертеш?

МОЛАН ИЕГОВАН КУМЫЛЖО ПОЧЕШ МЕ ТУДЫМ ВУЧЫШАШ УЛЫНА?

Библийыште ойлалтеш: «Туге гынат тендам чаманашлан Иегова чытен вуча, тудо тыланда порылыкым ончыкта. Вет Иегова — чын ыштыше Юмо. Тудлан ӱшаныше-влак чыланат пиалан улыт» (Ис. 30:18). Исайян нине мут-влак эн ончыч ӱскырт еврей-влаклан каласыме лийыныт (Ис. 30:1). Но нунын коклаште ӱшанле служитлыше-влакат лийыныт. Нине мут-влак нунылан ӱшаным пуэныт. Тиде мут-влак тачат Иегован ӱшанле служитлыше-влаклан ӱшаным пуат.

Иегова чытен вуча. Сандене мыланнат чытен вучыман. Тудо уже палемден ту жапым, кунам тиде тӱням пытара, да ту кечын да шагатын толмыжым шкежат вуча (Матф. 24:36). Тунам чылаштлан раш лиеш: Иегова да тудын служитлышыже-влак ваштареш Диаволын ойлымыжо шоя. Вара Юмо Сатанам да тудын полышкалышыже-влакым пытара, а мыланна порылыкым ончыкта.

Чаманаш логалеш, но таче ме тӱрлӧ нелылык дене тӱкнена. Иегова мемнам нунын деч огеш утаре гынат, тудо мемнам ӱшандара: шуко жап вучена гынат, ме куанен кертына. Исайян каласымыж дене келшышын, иктаж-мом сайым чот вучен, ме пиалан лийын кертына (Ис. 30:18) a. Кузе ме пиалан лийын кертына? Ныл каҥаш мыланна полшен кертеш.

КУАНЕН ВУЧАШ МО ПОЛША?

Сай нерген шоныза. Давид кугыжа ӱмыр мучкыжо шуко осалым ужын (Пс. 36:35). Туге гынат тудо возен: «Иегова ончылно шып код да тудым чытен вучо. Осал шонымашым шуктышо-влакым ончен, ит ойгыро» (Пс. 36:7). Давид шкежат тиде каҥашым кучылтын. Иегован полшаш  сӧрымыжӧ нерген тудо шонен коштын. А эше Давид Иеговам тудлан мом ыштымыжлан тауштен (Пс. 39:6). Уда шонымашлан ушнам авалташ она пу гын да ситуацийыштына сайым кычалына гын, мыланна Иеговам вучаш куштылгырак лиеш.

Иегова нерген чӱчкыдынрак ойлыза. 70-ше Псаломын авторжо — очыни, Давид — Иеговалан мурен: «Мый ӱшанымашым эре тыланет пыштем [«тыйым вучем», УТ] да Тыйым тӱрлӧ семын моктем» (Пс. 70:14). Кузе тудо Иеговам чапландарен? Тудо весе-влаклан тудын нерген каласкален да моктымаш мурым мурен (Пс. 70:15, 22, 23). Давид семынак, Иеговам вучен, меат куанен кертына. Ме служымашна дене, мутланымашна дене да мурым мурымына дене Юмым чапландарен кертына. Вес гана мурына-влакым мурымо годым мутышт нерген да, могай нуно куаным кондат, тидын нерген келгынрак шонкалыза.

Иза-ака-влаклан тендам кумылаҥдаш пуыза. Нелылык дене тӱкнымӧ годым Давид Иеговалан каласен: «Лӱметлан ӱшанем манын, тыланет ӱшанле-влаклан ончыктем» (Пс. 51:11). Мыланнат иза-ака-влак дене мутланымаш вийым пуа. Ме нунын дене вашлиймаште да служымаште гына огыл, тыгак яра жапым пырля эртарен мутланен кертына (Рим. 1:11, 12).

Ончыкылыклан ӱшанымашдам пеҥгыдемдыза. Псалом 61:6 палдара: «Мый Юмым шып вучем, вет тудо мыланем ӱшанен вучаш полша». Тиде тӱнян мучашыжым ме, очыни, уже шуко жап вучена. Лач тыгай годым мыланна пеҥгыде ӱшанымаш кӱлеш: Иегован чыла сӧрымыжӧ шукталтеш. Ӱшанымашнам пеҥгыдемдаш чотак кӱлеш. Тидлан Юмын Мутшым шымлыман: тудын ончылгоч каласымашыже-влакым, тӱрлӧ ужаш-влак кузе икте-весе дене кылдалтыт, тыгак лудын лекме ужаш мом Иегова нерген палдара (Пс. 1:2, 3). А эше мыланна святой шӱлыш нерген кумалаш кӱлеш. Тиде мыланна Иегова дене лишыл йолташ кодаш да курымашлык илышым пӧлеклаш тудын сӧрымыжым вучаш полша (Иуд. 20, 21).

Давид кугыжа деч примерым налза да пеҥгыдын ӱшаныза: Иегова тудым вучышо-влакым ужеш. Тудо тыгай еҥ-влакым чот йӧрата (Пс. 32:18, 22). Сай нерген шоныза, Юмым чапландарыза, иза-ака-влаклан тендам кумылаҥдаш пуыза да ончыкылыклан ӱшанымашдам пеҥгыдемдыза. Чыла тиде тыланда Иеговам чытен вучаш полша.