La a Zeova ratame tɩ d tall sũ-mare, n gũ wakat ning a sẽn yãkã. Bõe yĩng t’a rat tɩ d maan woto? Bõe n tõe n sõng-d tɩ d gũ ne sũ-noogo?

BÕE YĨNG T’A ZEOVA RAT TƖ D GŨ?

Biiblã yetame: “A Zeova maaga a yĩng n gũud n dat n maan yãmb neere. A na n maana bũmbu, a na n zoee yãmb nimbãanega. Bala a Zeova yaa tɩrlem Wẽnnaam. Sũ-noog rãmb la neb nins fãa sẽn ket n gũud-a wã.” (Eza. 30:18) Yaa Zʋɩf-rãmb nins sẽn yaa tõatbã la a Ezayi ra gomd ne. (Eza. 30:1) La Zʋɩf-rãmb sẽn maand sɩd n da be b sʋka, tɩ gom-kãensã kɩt tɩ b tẽed manegre. Gom-kãensã kɩtame tɩ neb nins sẽn maand sɩd ne a Zeova rũndã-rũndã wã me tẽed manegre.

Rẽnd d segd n talla sũ-mar n gũ, bala a Zeova me maanda woto. A yãka wakat n na n sãam dũni-kãngã, n gũudẽ tɩ daar-n-kãng la lɛɛr-kãng ta. (Mat. 24:36) Wakat kãng ne a na n ta tɩ lebga vẽeneg tɩ bũmb nins a Sʋɩtãan sẽn dõt a Zeova la neb nins sẽn tũud-a wã yaa ziri fasɩ. Rẽ poore a na n sãama a Sʋɩtãan la b rãmb nins fãa sẽn be a poorẽ wã. La “a na n zoee [tõnd] nimbãanega.”

Nananda, a Zeova tõeeme n pa kɩt tɩ d zu-loeesã sa ye. La a yeelame tɩ d bas d yam tɩ d tõe n gũu ne sũ-noogo. Yaa wa a Ezayi sẽn yeelã. D sã n gũud bõn-sõng ne d sũur fãa, d tõe n maana sũ-noogo. (Eza. 30:18) a Wãn to la d tõe n paam sũ-no-kãnga? Bũmb a naas n tõe n sõng-do.

Y SẼN TÕE N KELL N GŨ NE SŨ-NOOG TO-TO

Tagsd-y bõn-sõma nins sẽn maandã yelle. Rĩm a Davɩɩd vɩɩmã tõre, a yãa bõn-wẽns wʋsgo. (Yɩɩn. 37:35) Baasgo a yeelame yaa: “Sĩnd a Zeova taoore, n gũ-a ne f sũur fãa. Ra yik f sũur ne ned sẽn tõogd n pidsd a mag-wẽns ye.” (Yɩɩn. 37:7) A Davɩɩd mengã tũu sagl-kãnga, n da tagsd a Zeova sẽn pʋlem t’a na n fãag-a lame wã yelle. Sẽn paase, a  sũur da nooma ne bõn-sõma nins fãa a Zeova sẽn maand n kõt-a wã. (Yɩɩn. 40:5) Tõnd me sã n zʋʋg zu-loees nins d sẽn maood ne wã, n tagsd bõn-sõma nins d sẽn paamdã yelle, na n yɩɩ nana tɩ d kell n gũ a Zeova.

Tũnugd-y ne segb buud fãa n pẽgd a Zeova. Tõe tɩ yaa a Davɩɩd n gʋls Yɩɩn-sõamyã 71 soabã. Yɩɩn-kãng gʋlsdã yeela a Zeova yaa: “M na n kell n gũume. M na n maneg n pẽga yãmba.” (Yɩɩn. 71:14) Wãn to la a ra pẽgd a Zeova? A ra gomda a Zeova yell ne nebã, la a ra yɩɩnd n pẽgd-a. (Yɩɩn. 71:​16, 23) Tõnd me tõe n kell n gũu a Zeova ne sũ-noog wa a Davɩɩde. D tõe n pẽga a Zeova d sã n wa moond koe-noogã, d sã n wa sõsd ne neba, la d sã n wa yɩɩnd d tũudmã yɩɩla. Y sã n wa yɩɩnd Rĩungã yɩɩll bɩ y maag y yĩng n tags a goamã zugu, la b sẽn kõt tõnd sũ-noog to-to wã zugu.

Baood-y y tẽed-n-taasã zĩiga, tɩ b kengd y raoodo. A Davɩɩd sẽn wa n segd zu-loeese a yeela a Zeova yaa: “Sẽn maand-b sɩd ne yãmbã taoore, mam na n teega yãmb yʋʋrã.” (Yɩɩn. 52:9) Tõnd me tõe n paama raood kengr d sã n wa be ne d tẽed-n-taasã. La pa tigissã wall koe-moonegã sasa bal ye. Yaa d sã n wa tigim taab n na n kok pemsem me.—Rom. 1:​11, 12.

Kɩt-y tɩ y sẽn saagd n na n wa paam bũmb ningã maneg n lebg vẽenega. Yɩɩn-sõamyã 62:5 yetame: “Mam sĩndame n gũud Wẽnnaam, bala mam saagrã yita yẽ nengẽ.” Tara yõod tɩ d sẽn saagd n na n wa paam bũmb ningã yɩ vẽeneg d yamẽ wã, sẽn yɩɩd fãa saabã sã n kaoosd n yɩɩd d sẽn da tagsdã. D segd n kɩsa sɩd t’a Zeova pʋlemsã na n pidsame, baa sẽn wa n yaa tɩlɛ tɩ d gũ n kaoos to-to. D sã n dat tɩ d sẽn saagd n na n wa paam bũmb ninsã maneg n yɩ vẽeneg d yamẽ wã, d segd n zãmsda Wẽnnaam Gomdã. Wala makre d zãmsd Biiblã bãngr-goamã, n baood n bãngd a goamã sẽn tũud taab to-to wã, la bũmb nins a Zeova sẽn vẽneg yẽ mengã zugã. (Yɩɩn. 1:​2, 3) Sẽn paase, d segd n “pʋʋsda ne vʋʋsem sõngã pãng” sẽn na yɩl n kell n tall zood sõma ne a Zeova, n gũud wakat ning d sẽn na n paam vɩɩm sẽn kõn sa wã a sẽn pʋlmã.—Ziid 20, 21.

D kɩs sɩd wa rĩm a Davɩɩd t’a Zeova geta neb nins sẽn gũud-a wã, la a maand-b neere. (Yɩɩn. 33:​18, 22) Bɩ y tagsd bõn-sõma nins sẽn maandã yelle, n pẽgd a Zeova, n baood y tẽed-n-taasã zĩig tɩ b kengd y raoodo, la y modg tɩ y sẽn saagd n na n wa paam bũmb ningã yɩ vẽeneg y yamẽ, tɩ rẽ la y na n tõog n kell n gũ a Zeova ne su-mare.