Nisaá, Jehová kúni̱ra ña̱ ná kundatuyó nda̱a̱ ná saxínura ña̱ ni̱ka̱ʼa̱nra. ¿Nda̱chun kúni̱ Jehová ña̱ kundatuyó? Ta, ¿ndáaña chindeétáʼan xíʼinyó kusi̱í-iniyó nani ndátuyó?

¿NDA̱CHUN KÚNI̱ JEHOVÁ ÑA̱ KUNDATUYÓ?

Biblia káchiña: “Soo Jehová kúee íyo inira ta ndátura ña̱ na̱ʼa̱ra ña̱ va̱ʼa-inira xíʼinndó, ta na̱ʼa̱ra ña̱ kúndáʼvi-inira xínira ndóʼó. Saáchi Jehová kúúra iin Ndióxi̱ ta̱ kéʼé ña̱ nda̱kú. Si̱íní íyo na̱ ndáa-iniñaʼá xíʼin ndiʼi níma̱na” (Is. 30:18). Ta̱ Isaías ni̱ka̱ʼa̱nra tu̱ʼun yóʼo xíʼin na̱ judío na̱ so̱ʼoní ni̱xi̱yo (Is. 30:1). Soo tiempo saá ni̱xi̱yova na̱ judío na̱ nda̱kúní ni̱xi̱yo ini xíʼin Jehová. Chi̱ka̱a̱ní tu̱ʼun yóʼo ndee̱ xíʼin na̱kán, ta saátu kivi keʼéña xíʼin miíyó tiempo vitin.

Tá saá, ¿nda̱chun xíniñúʼu kundatuyó? Saáchi nda̱a̱ Jehová ndátu. Xa̱a̱ xíniva Jehová ndáa ki̱vi̱ xíʼin hora sandíʼi-xa̱ʼa̱ra ña̱ kini, ña̱kán ndátura ña̱ ki̱xaa̱ ki̱vi̱ kán (Mat. 24:36). Tá ná kixaa̱ ki̱vi̱ kán, ndiʼina kunda̱a̱-ini ña̱ vatá kúú ña̱ káʼa̱n ta̱ Ndi̱va̱ʼa xa̱ʼa̱ Jehová xíʼin xa̱ʼa̱ na̱ ñuura, tasaá kǒokana kasi nu̱úyó ni ta̱ Ndi̱va̱ʼa ni na̱ kítáʼan xíʼinra. Soo, Jehová káʼa̱nra ña̱ kundáʼvi-inira kunira ndiʼi na̱ ndásakáʼnu miíra ta sakǎkura na̱ ñuura.

Nani ndátuyó, sana kǒo sakútaʼaví Jehová ndiʼi tu̱ndóʼo ña̱ íyo nu̱úyó soo káʼa̱nra xíʼinyó ña̱ kiviva kusi̱í-iniyó. Nda̱a̱ táki̱ʼva ni̱ka̱ʼa̱n ta̱ Isaías kiviva kusi̱í-iniyó nani ndátuyó ña̱ kixaa̱ ña̱ va̱ʼa ndakiʼinyó (Is. 30:18). a ¿Ndáaña chindeétáʼan xíʼinyó? Ná ka̱ʼa̱nyó xa̱ʼa̱ ku̱mí ña̱ʼa ña̱ kivi keʼéyó.

¿NDÁAÑA KEʼÉYÓ ÑA̱ VA̱ʼA KUSI̱Í-INIYÓ NANI NDÁTUYÓ?

Ná ndakanixi̱níyó xa̱ʼa̱ ña̱ va̱ʼa. Tiempo ña̱ ni̱xi̱yo ta̱ rey David xi̱nira xi̱keʼé na̱ yiví ku̱a̱ʼání ña̱ va̱ása va̱ʼa (Sal. 37:35). Nisaá, ta̱ David ka̱ʼyíra: “Kǒo ka̱ʼa̱n kúáchiún xíʼin Jehová, va̱ʼaka kúee koo iniún ta kundatún. Kǒo sa̱ún xíʼin ta̱a ta̱ kéʼé ña̱ va̱ása va̱ʼa tá vií kána ña̱ kéʼéra” (Sal. 37:7). Va̱ʼaní xi̱ndiku̱n ta̱ David consejo yóʼo, ¿ndáa ki̱ʼva xi̱ndiku̱nraña? Kǒo níxi̱ka-inira saáchi mií Jehová ni̱ka̱ʼa̱n ña̱ sakǎkurara, ta ndiʼi ña̱ ke̱ʼé Jehová xa̱ʼa̱ra xi̱ndayáʼviníña nu̱úra (Sal. 40:5). Ta saátu miíyó tá ndákanixi̱níyó  xa̱ʼa̱ ña̱ va̱ʼa saá kúú ña̱ kǒo ixayo̱ʼvi̱ña xíʼinyó kundatuyó ña̱ xi̱nu ña̱ káʼa̱n Jehová.

Ndiʼi tiempo ná ndasakáʼnuyó Jehová. Sananí ta̱ David kúú ta̱ ka̱ʼyí Salmo 71, ña̱yóʼo ni̱ka̱ʼa̱nra xíʼin Jehová: “Kundatuvai̱ ta chikaa̱níi̱ ndee̱ ña̱ ndasakáʼnukai̱ yóʼó” (Sal. 71:14). ¿Ndaáña ke̱ʼéra ña̱ va̱ʼa ndasakáʼnura Jehová? Xi̱kaʼa̱nra ña̱ va̱ʼa xa̱ʼa̱ Jehová xíʼin inkana ta xi̱xitara yaa nu̱úra (Sal. 71:​16, 23). Saátu miíyó kivi ndasakáʼnuyó Jehová nda̱a̱ táki̱ʼva ke̱ʼé ta̱ David tá nátúʼunyó xa̱ʼa̱ Ndióxi̱ xíʼin na̱ yiví veʼe tá veʼe xíʼin na̱ migoyó á xíʼin na̱ veʼeyó á tá xítayó yaa ña̱ tává na̱ ñuu Ndióxi̱. Tá xa̱a̱ xítaún yaa nu̱ú Jehová kiʼin va̱ʼún kuenta ndáaña káʼa̱n yaa ña̱ xítaún. Ndiʼi ña̱yóʼo chindeétáʼan xíʼinyó ña̱ kusi̱í-iniyó nani ndátuyó ña̱ saxínu Jehová ña̱ ni̱ka̱ʼa̱nra.

Ná taváyó tiempo ña̱ kutáʼanyó xíʼin na̱ hermanoyó. Tá ni̱ya̱ʼa ta̱ David nu̱ú tu̱ndóʼo ni̱ka̱ʼa̱nra xíʼin Jehová: “Ndiʼi na̱ nda̱kú íyo ini xíʼún kunina ña̱ kándíxaníi̱ yóʼó” (Sal. 52:9). Ta̱ David xi̱kitáʼanra xíʼin na̱ yiví na̱ xi̱ndasakáʼnu Jehová ta na̱yóʼo xi̱chikaa̱na ndee̱ xíʼinra. Ta saátu miíyó, kivi kitáʼanyó xíʼin na̱ hermanoyó tá xa̱a̱ ku̱a̱ʼa̱nyó reunión, tá xa̱a̱ ku̱a̱ʼa̱nyó sánáʼa̱yó na̱ yiví á inkaka lugar ña̱ va̱ʼa chikaa̱na ndee̱ xíʼinyó (Rom. 1:​11, 12).

¿Ndáaña chindeé miíyó ña̱ kandíxayó ña̱ xi̱nu ña̱ káʼa̱n Jehová? Salmo 62:5 káchiña: “Ndátui̱ ña̱ kixaa̱ Ndióxi̱ chi ta̱kán kúú ta̱ taxi ña̱ va̱ʼa ndaʼíi̱ chí nu̱únínu”. Kǒo xíniñúʼu kaka-iniyó ña̱ ndixa xi̱nu ña̱ káʼa̱n Jehová keʼéra chí nu̱únínu. Ni ku̱a̱ʼáníva tiempo ná kundatuyó soo saxínuva Jehová ña̱ ni̱ka̱ʼa̱nra. Soo, ¿ndáaña keʼéyó ña̱ va̱ʼa kandíxayó ña̱ xi̱nuvaña? Ña̱ kaʼviyó tu̱ʼun Ndióxi̱ xíʼin profecía ña̱ va̱xi nu̱úña, ta saátu ná kotoyó ndáaña sákuaʼayó xa̱ʼa̱ Jehová (Sal. 1:​2, 3). Saátu xíniñúʼu ka̱ʼa̱nyó xíʼinra ña̱ chindeétáʼanra xíʼinyó ña̱ vií kitáʼanyó xíʼinra nani ndátuyó ña̱ saxínura ña̱ ni̱ka̱ʼa̱nra xíʼinyó, ña̱ taxira ña̱ kutakuyó ndiʼi saá tiempo (Jud. 20, 21).

Nda̱a̱ táki̱ʼva ke̱ʼé ta̱ rey David kivi kandíxayó ña̱ kíʼinva Jehová kuenta xíʼin na̱ nda̱kú íyo ini xíʼinra, ta ndátuna ña̱ saxínura ña̱ káʼa̱nra ta saátu ña̱ na̱ʼa̱ra ña̱ ndixa kúʼvi̱-inira xínirana (Sal. 33:​18, 22). Ña̱kán ña̱ va̱ʼa kusi̱í-iniyó nani ndátuyó ña̱ saxínu Jehová ña̱ ni̱ka̱ʼa̱nra, ná kiʼinyó kuenta xíʼin ña̱ va̱ʼa ña̱ ndóʼoyó tiempo vitin, ná ndasakáʼnuyó Ndióxi̱, ná taváyó tiempo ña̱ kutáʼanyó xíʼin na̱ hermano ta ná kandíxaníyó ña̱ káʼa̱n Jehová keʼéra chí nu̱únínu.