Jehovaba du ǃâu hâ ǁaeb ǃnâ ǃgâiaǂgao
JEHOVAB eloxoresasiba dīkākā tsî hoa xūna nî ǀasa kai ǁaeba ǃoa mûǂui i du ra? (J.ǂHa. 21:1-5) Îo, amase. Xawe î ge supu tama Jehovaba ǃâu ǀgarasa, ǃgōsase da ga ǃgomsina hōǃâ o. ǃÂubasents hâ xū-i, mâiǂuihe ra î ge ǂgaoba ra ǀaesen kai.—ǂKhm. 13:12.
Xawe Jehovab ge ra ǃâubasen î da ǃnūǃnâxase ǁîb xūna nî ǀkharaǀkhara ǁaeba ǃâu. Tae-i ǃaromab nēsa sida xu ra ǃâubasen? Tae-e nî hui î da ǃgâiaǂgaob ǀkha ǃâu?
JEHOVABA TAE-I ǃAROMA RA ǃÂUBASEN Î DA ǃÂU?
Elobmîs ge ra mî: “ǁNā-amagab ge ǃKhūba sadob nî ǀkhomxase nî ǃâu du; ǁîb ge sadob nî ǀkhomxaga nî khâimâ, ǃKhūb a ǂhanu-aisib Elo xui-ao; ǀkhaehen ge hâ hoan ǁîba ra ǃâuna.” (Jes. 30:18) Jesajab di mîdi ge ǂgurose ǃnâudanaxa, Jodeǁîna ǃoa gere ǁnaeǁgau. (Jes. 30:1) Xawen ge ǀnî ǂgomǂgomsa Jodeǁîna ǁîn ǁaegu ge hâ i tsî î ge nē mîde ǁîna ǃâubasensa ge mā. ǁNā mîdi tsîn ge Jehovab ǂgomǂgomsa ǃoaba-aona nētsē ǃâubasensa ra mā.
ǁNā-amaga da ge ǃnūǃnâxase ra ǃâu, Jehovab tsîn ǃnūǃnâxase ra ǃâu amaga. Nē ǃhūbaib ǀamsab nî dīkākā ǁaebab ge mîmâi hâ tsîb ge ǃnūǃnâxase ǁnā tsēs tsî īri nî hā tsēsa ǃâu hâ. (Mat. 24:36) ǁNā ǁaeb ai î ge nî ǃgāsa, ǁGâuab ge Jehovab ǃoagu mî xūn hoan ge ǂhumi isa. ǁNās khaoǃgâb ge ǁGâuab tsî ǁîb ǀkhāb ai hân hoana nî dīkākā xaweb ge sida nî “ǀkhomxa.”
Jehovab ge nēsi sida ǃgomsin hoana ūbe tide xaweb ge ra ǁapoǁapo, ǂkhîba da ūhâ ǁkhāsa ǃâu da hâ ǁaeba. Jesajab ǃnâ i ra ǁgau khami da ge a ǂkhî ǁkhā, ǃgâi xūn nî īsa da ǃâu hâ ǁaeba. (Jes. 30:18) ǁNā ǂkhîba da mati a hō ǁkhā? Sao ra haga xūn ge nî hui da.
ǃÂU DA HÂ ǁAEB AI ǃGÂIAǂGAOS
ǃGâi xūn ai ǂâisa ǂnûi. Gao-aob Davidi ge ǁîb ûib ǃnâ ǂgui eloxoresasiba ge mû. (Psa. 37:35) Xaweb ge saorase ge xoa: “ǃKhūba ǃnōba î, ǁîba ǃâu re. Tā ǁnān hîa ûib ân ǃnâ ra aiǃgûn ǃoagu ǁaixa; ǁnān hîa tsū ǀapede ra dīn ǃoagu.” (Psa. 37:7) Davidi ge nē ǀapemāsa ge sîsenū tsî ǁîb ǂâisa Jehovab di mîmâidi ai ge ǂnûi îb huihe. Jehovaba xub gere hō ǃgâi ǀkhaegu hoagab ge gere ǃgôaǃgâ. (Psa. 40:5) Sida ûib ǃnâ ge ī ǃgâi xūn ai da ga sida ǂâisa ǂnûi tsî ǃgomsin ais ose, o i ge nî supuba da Jehovab ai ǃâu ǀgarasa.
Mâǃēs hoasa sîsenū tsî Jehovab xa ǃgâise ǃhoas. Psalmdi 71 xoa-aob ge ǀnîsi ge David i, ǁîb ge Jehovaba ǃoa ge mî: “Satsa ta ge hugaǀgui ǃâubasen tsî ti koasa hugaǀgui satsa nî ǁnaeba.” (Psa. 71:14) Matib ge Jehovaba koa ǁkhā i? Nau khoenab ge Jehovab xa mîba tsî koas ǁnaetsande ge ǁnaeba ǁkhā i. (Psa. 71:16, 23) Davidi khami da ge sida tsîna ǃgâiaǂgaoba ūhâ ǁkhā ǃâu da hâ ǁaeb ai. Sida tsîn ge aoǁnâ sîsenni, tsēs hoasa da ra ǃhoa xūn tsî ǁnaeda ra amdi ǃnâ-ūs tsîna ǁîba koa ǁkhā. Saora ǃnās Gaosib ǁnae-amde du ra ǁnaes ai du, tae-i ǃaroma xoasa mîdi tsî mati di ǃgâiaǂgaoba ra mā du ǀgaub xa ǂâi tama?
ǃGâsana mā-am re în ǂkhâǃnâ du. ǃGomsinab gere hōǃâ ob ge Davida, Jehovaba ǃoa ge mî: “Sa ǃanun di ǀgūhâsib ǃnâ hâs a ǃgâi xui-ao.” (Psa. 52:9) Sida tsîn ge ǂkhâǃnâsa ǂgomǂgomsa ǃoaba-aona xu a hō ǁkhā, sida ǀhaodi tsî aoǁnâ sîsenni ǃnâs ǀguis ose xawe ǁîn ǀkha da ga ǁkhoaxa ǁaeba ūhâ ǁaeb ais tsîna.—Rom. 1:11, 12.
Sadu ǃâubasensa ǀgaiǀgai. Psalmdi 62:5 ge ra mî: “Elob aiǃâ ǃnō re ti ǀomse, ǁîb ai ǀgui ta ra ǂgomaiǂnûi xuige.” Kaise î ge a ǂhâǂhâsa î da ǀgaisa ǃâubasensa ūhâ, ǃgōsase ǀams ga sida ǃâubasen hâ ǁaeb ǃnâ hā tama io. ǂGomǃgâsiba da ge ūhâ, Jehovab mîmaidi nî ama ī ǃkhaisa, gaxuse da ga ǃâu xawe. Sida ǃâubasensa da ge Elobmîsa ǁkhāǁkhāsen, kēbode ôaǃnâs tsî Elobmîs xoa-aogu ǀguiǃnâxa xūna xoahâ ǀgaub ǃnâ ǀgaiǀgai ǁkhā. Tsî Jehovab ǁîb xa ra mîba da xūn tsîna. (Psa. 1:2, 3) Aiǃgû tsî da ge “ǃanu gagab ǃnâ ra ǀgorese” ǃgâi ǀhōsagusisa Jehovab ǀkha nî ūhâ, ǃâu ǀgara da hâ ǁîb mîmâis ǀamose ûis dis nî dīǀoaǀoahes kōse.—Jud. 20, 21.
Gao-aob Davidi khami ǂgomǃgâsiba ūhâ re, Jehovab ǁîb ai ra ǃâu ǀgarana kōǃgâ tsî ǁîb hâhâ ra ǀnamma ǁîna nî ra ǁgausa. (Psa. 33:18, 22) Jehovab ai ǃnūǃnâxase ǃâu ǀgara re. ǃGâi xūn ai ǂâisa ǂnûi tsî ǃgâsana xu ǂkhâǃnâsa ūǃoa. Tsî sadu ǀō-aisa ǃâubasensa ǃkhōǀgara re.
