Maske kemantika kiampa tijyolmatij, Jehová kineki ma tijpiakaj toyolo uan ma tijchiakaj ma asi nopa tonali tlen ya kiixtlalijtok para kitlamiltis tlen amo kuali. ¿Kenke kineki kiampa ma tijchiuakaj? Uan ¿tlake techpaleuis nojua ma tijchiakaj nopa tonali ika pakilistli?

¿KENKE JEHOVÁ KINEKI MA TIMOCHIAKAJ?

Biblia kiijtoua: “TOTEKO inmechchia inkitemosej para uelis inmechnextilis iteiknelijkayo. Yajaya kineki inmechtlasojtlas keja kiijtojtok, pampa TOTEKO, yajaya se Dios tlen senkistok kichiua tlen xitlauak. Uajka ma pakikaj nochi tlakamej tlen motemachiaj ipan ya para ma kinpaleui” (Is. 30:18). Isaías kiniljuik ni tlamantli, Judíos katli amo kinekiyayaj kineltokasej Jehová (Is. 30:1). Pero ipan nopa tonali nojkia itstoyaj se keskij Judíos katli kena tlaneltokayayaj. Yeka, tlen Isaías kiijtok kinyolchikajki uan nojkia uelis techyolchikauas ipan ni tonali.

Uajka, ¿kenke moneki tijpiasej toyolo? Pampa Jehová nojkia kinextijtok kipia iyolo. Ya kiixtlalijtok nopa tonali uan nopa hora kema kitsontlamiltis tlen amo kuali uan kichixtok ma asi (Mat. 24:36). Kema asis nopa tonali, nesis Satanás san kiistlakauijtok Jehová uan itekipanojkauaj. Yeka, Jehová kitsontlamiltis Satanás uan katli kitokiliaj. Pero kintlasojtlas itekipanojkauaj.

Maske Jehová amo techkixtilis nochi nopa tlaouijkayotl tlen tijpiaj ya kiijtoua uelis tiitstosej ika pakilistli. Kej kiijtok Isaías uelis tijchiasej ika pakilistli ma asi tlen tijchiaj (Is. 30:18). a ¿Tlake uelis techpaleuis? Ma tikitakaj naui tlamantli tlen uelis tijchiuasej.

¿KENIJKATSA UELIS TIJCHIASEJ IKA PAKILISTLI?

Ma timosentlalikaj san ipan tlen kuali. Ipan nochi inemilis, tlanauatijketl David kiitak kenijkatsa maseualmej kichiuayayaj tlen amo kuali (Sal. 37:35). Maske kiampa kipanok ya kiijkuilok: “Xijpia moyolo kema tiitstok iixpa TOTEKO. Amo ximolini. Xijchia para yajaya kichiuas tlen moiljuijtok kichiuas. Amo xikualani ininuaya tlen kipiaj nochi tlen kinekij ama” (Sal.  37:7). David kiampa kichijki kema mosentlalik Jehová kimanauiskia. Uan nojkia kipatiitak nochi tlen toTeotsij kichijki (Sal. 40:5). Tlaj tojuantij nojkia timosentlaliaj san ipan nopa kuali tlamantli tlen techpano uan amo ipan tlen amo kuali, techpaleuis ma tijchiakaj nopa tonali kema Jehová kikualtlalis Tlaltipaktli.

Nochipa ma tijueyichiuakaj Jehová. Katli kiijkuilok Salmo 71, katli uelis elki David, kiiljuik Jehová: “Na más nimotemachis mopan ta para tinechpaleuis. Uan noja más nimitspakilismakas” (Sal. 71:14). ¿Kenijkatsa kiueyichiuayaya? Kinkamanaljuiyaya sekinok tlen Jehová uan kiuikatiyaya (Sal. 71:16, 23). Sanse kej David, tojuantij nojkia uelis tijueyichiuasej Jehová kema titlajtolmoyauaj, tikinkamanaljuiaj tlen toTeotsij touampoyouaj uan tochampoyouaj uan kema tijuikatiaj ika nopa uikatl tlen Jehová itlanechikol kikixtijtok. Yeka, kema sampa tijuikatis Jehová, kuali xijtlakakili tlen kiijtoua nopa uikatl. Nopa techpaleuis ma tijchiakaj ika pakilistli nopa tonali tlen Jehová kiixtlalijtok.

Ma tiitstokaj ininuaya toikniuaj. Kema David kiixnamijki tlaouijkayotl, kiiljuik Jehová: “Uan san ipan ta nimochias para tinechtlasojtlas, pampa nochi kimatij para ta nelia tijpia ueyi moyolo ika tlen moaxkauaj” (Sal. 52:9). Sanse kej David kiyolchikajki kema itstoya ininuaya sekinok toTeotsij itekipanojkauaj, tojuantij nojkia uelis tiitstosej ininuaya toikniuaj ipan tlanechikoli, ipan tlajtolmoyaualistli uan kema tijchiuaj sekinok tlamantli (Rom. 1:11, 12).

Más ma timotemachikaj ipan tlen tijselisej teipa. Salmo 62:5 kiijtoua: “Pero na san nimochia ipan Toteko Dios, san nimochia para yajaya ma nechmanaui, pampa san ya ueli temakixtia”. Pampa amo tijmatij kema asis nopa tonali kema Jehová kitlamiltis nochi tlen amo kuali, moneki timotemachisej ipan tlen tijselisej teipa. Maske uelis uejkauas tijchixtosej ma asi nopa tonali, moneki timotemachisej Jehová kichiuas tlen kitenkajtok. ¿Kenijkatsa uelis tijchiuasej? Moneki timomachtisej toTeotsij iTlajtol, tikitasej kenijkatsa moaxitijtok tlajtolpanextili, kenijkatsa nochi Biblia mouika uan tikitasej tlake kuajkuali tlamantli kinextia Jehová (Sal. 1:2, 3). Nojkia moneki timomaijtosej uan tijtlajtlanisej Jehová ma techpaleui ika ichikaualis, kiampa nojua timouampojchijtosej iuaya uan tijchixtosej ma asi nopa tonali kema techmakas nemilistli para nochipa (Jud. 20, 21).

Sanse kej David, tojuantij nojkia uelis timotemachisej Jehová kinita uan tlauel kintlasojtla nochi katli kichiaj ma asi nopa tonali kema kitlamiltis tlen amo kuali (Sal. 33:18, 22). Yeka, tlaj tijnekij tijchiasej ika pakilistli ma asi nopa tonali, moneki ma timosentlalikaj san ipan tlen kuali, ma tijueyichiuakaj Jehová, ma timosentilikaj ininuaya toikniuaj uan más ma timotemachikaj ipan tlen tijselisej teipa.