Dakaranyi Pamunovetera Jehovha Ngo Kusengerera Kwese
IMWIMWI muri kuvetera no cidaka-daka cese njiku yokuti Jehovha anozopeja ushati hwese nokuzoita zviro zvese zvipsa? (Apokaripsi 21:1-5) Pacina kukana-kana imwimwi muri kuvetera! Ngo kudaro, azvizivi kureruka mukuvo wese kuvetera Jehovha ngo kusengerera maningi-ningi patinonga tecihwisana no zvineso. Patinovetera ciro cokuti ciri kunonoka, izvi zvingatihwaja mwoyo.—Mazwi Akangwara 13:12.
Pikija nozvakadaro, Jehovha anovetera kuti itusu timuvetere ngo kusengerera kwese kuti iyena azoite zviro mu nguva yaakagaja. Ngenyi iyena anovetera zvondhozvo? Ngozvapi zvinozotibesera kuti tidakare patinonga tecivetera?
NGENYI JEHOVHA ANODA KUTI TIVETERE?
Bhaibheri rinoti: “Asi Jehovha anoimira ngo kusengerera kwese kuti amuitire unyasha, Iyena anozomuka kuti amuitire usizi. Ngokuti Jehovha ndi Mwari wo ururami. Vandhu vese vanomuimira vano mudakaro.” (Isaia 30:18) Magama aya a Isaya akatarihwa Vajudha vainga vacikazwiri. (Isaia 30:1) Asi pakati pavo paingavo no Vajudha vokuti vainga vakagondeka, magama aya akavapa vetero. Magama aya anopavo vetero vashandiri vakagondeka va Jehovha vo mu njiku jino.
Ngo iyo ndava, tinodikana kuvetera ngo kusengerera kwese ngokuti Jehovha ari kuveteravo nokusengerera. Iyena wakagaja njiku yokuti anozopeja mugariro uwu wo zviro, nokutizve ari kuvetera njiku no nguva yaakagaja. (Mateu 24:36) Pa nguva yondhoyo, zvinozovoneka kuti kupumbha kwaakaita Sathana kuna Jehovha pomwe no vashandiri Vake ngo ko kunyepa. Jehovha anozoparaja Sathana na vese vari ku divi rake asi iyena “anozotitatijira unyasha.”
Izvi zvicito zvaitika, Jehovha angatama kupeja zvineso zvedu zvese wari uno, asi iyena anotigondesa kuti zvinokwanisika kuva takadakara patinonga tecivetera. Inga zvakanangwa ndi Isaya, itusu tingava tecidakara patinonaga tecivetera kuti ciro caushoni ciitike. (Isaia 30:18) a Tingauwanisa kudini mudakaro uwu? Ngativone mudanyu murongomuna jicazotibesera.
TINGAVETERESA KUDINI NOTAKADAKARA?
Rangariranyi ngo zvaushoni zviri kuitika mu upenyu hwenyu. Mambo Dhavhidhi wakavona zviro zvakawanda zvakashata mu upenyu hwake. (Nduyo 37:35) Pikija zvakadaro, iyena wakatara kudari: “Zororai mwa Tenji Mwari, muveterei; ucanyangajwa ngo vanogarisika mu njira yavo, vanorangarira kuita njimba.” (Nduyo 37:7) Dhavhidhi washandisa mbhangiro iyi no kuramba akasotesesa vetero yake yo ruponeso. Iyena waibongesera nga cimwe na cimwe caaishira cecivha kuna Jehovha. (Nduyo 40:6) Kuva kwedu no mavonero akanaka kuciripi kuva no mavonero akashata ngo pamusoro po zviro kana mugariro jakatitendeneja, zvicazotibesera kuti tivetere Jehovha.
Batikananyi pakukuja Jehovha. Mutari wo nduyo 71 wokuti wainga Dhavhidhi, wakati kuna Jehovha: “Ndinovetera ndicikaregi, ndecimusimba no kusimba.” (Nduyo 71:14) Dhavhidhi waizokujisa kudini Jehovha? Ngo kuvhunja vamweni ngo pamusoro pa Mwari no kuimba ndumbo jinomukuja. (Nduyo 71:16, 23) Kudari inga ndi Dhavhidhi itusu tingawana mudakaro patinonga tecivetera. Tinokuja Jehovha ngo kubhuya no vamweni ngo pamusoro pake, pa mabhuyo edu atinoita njiku no njiku kubatanijavo no kuimba ndumbo jedu pamusongano. Pa vhaza inotevera pamunozoimba ndumbo jo Umambo, madini kubatikana pamaretera o mumbowo nokuvona manera ajinotipa mudakaro?
Siyanyi kuti hama no hambzaji jenyu jimuvangise. Dhavhidhi paakasongana no zvineso, iyena wakati kuna Jehovha: “Pambeji po vatendi venyu ndinozosimba zina renyu.” (Nduyo 52:11) Na itusuvo tingavangiswavo maningi ngo vanamati doni vedu vakagondeka haiwa basi pa musongano jedu pomwe no mu basa rokucumaera, asi tinovangiswavo patinonga tecibungaija—Varoma 1:11, 12.
Vangisanyi vetero yenyu. Nduyo 62:6 inoti: “Mwiha wangu unozorora kuna Mwari basi, kwa yena hunobva ruponeso hwangu.” Zvinosisira maningi kuvangisa vetero yedu, manini-ningi kudari tiri kuvetera kupera ko nyika ino ko njiku jakawanda. Tinodikana kunasa kuthemba kuti zvaakagondesa Jehovha zvinozokwanisika pikija zvikanonoka. Tingavangisa vetero yedu ngo kujija soko ra Mwari Bhaibheri, kujija ngo pamusoro po zviporofita, kujija ngo pamusoro po kumbeji no zvro zvimweni ngo pamusoro pa Jehovha. (Nduyo 1:2, 3) Tinodikana kuramba teciita mukumbiro tecikumbira “mujimu mucena” kuti tienderere mberi tino ushamwari na Jehovha patinonga tecivetera kuti cigondiso cake co upenyu ucikaperi cikwanirisike.—Judha 20, 21.
Inga ndi Mambo Dhavhidhi, nasanyi kuthemba kuti Jehovha anovona vese vaya vanomuvetera ngo kusengerera kwese, i anokhombija rudo Hwake hucikacinji kwavari. (Nduyo 33:18, 22) Rambanyi mecivetera Jehovha ngo kubatikana ngo zviro zvakanaka mu upenyu hwenyu, ngo kumukuja, meciashira vangiso yamunopuwa ngo hama no hambzaji pomwe no kuramba mecivangisa vetero yenyu.
a Gama rakasandujwa kuti “kuramba tecivetera” ringarevavo “cido kana vetero yokuti ciro cinozoitika,” zvecikhombija kuti ngo zvocibarihwe kuthimwa-thimwa ngo pamusoro po ruponeso hwedu.
