Abɛse ngaso ko, Yehova yɔ ka ti e ya, e kũ na yɔngɔrɔ bɛ zu lá mɛ lo kpã ti onzingɔ na akpale niko. Nda mɛ lo yɔ ya, e li ngaso nɛ? Ye mɛ lengbi ti zangɔ e ya, e du na dengɔ bɛ na ngoi mɛ e ndo kũ lo nɛ?

NDA MƐ YEHOVA YƆ YA, E KŨ LO NA YƆNGƆRƆ BƐ ZU NƐ?

Ngbangɔ tɛnɛ ya: “Yehova ndo kũ na yɔngɔrɔ bɛ zu so fangɔ nzɔ̃ bɛ na ĩ, lo na longɔ ndozu so mangɔ vundu tɛ ĩ na lo mɛ ya, Yehova du Nzapa ti mbilimbili. Dengɔ bɛ na azi ko la ndo ngbã lá kwɛ kũngɔ lo.” (Yis. 30:18) Tɛnɛ mɛ adu tɛnɛ mɛndó Yisaya tɛnɛ hɛ̃ azi ti Yuda mɛndó adu awa kpengba li. (Yis. 30:1) Kanda ambanga azi ti Yuda ti mbilimbili ndó da, wa tɛnɛ niko ahɛ̃ndó ala nzɔ̃ dangɔ bɛ. Tɛnɛ niko ndo hɛ̃ nga nzɔ̃ dangɔ bɛ hɛ̃ awa kwa tɛ Yehova ti mbilimbili ndɛ.

Ni la ayɔ ya, e kũ Yehova na yɔngɔrɔ bɛ zu na lo mɛ ya, lo nvɛ̃ni lo ndo kũ nga na yɔngɔrɔ bɛ. Lo kpã ngoi kɔi mɛ lo na onzingɔ akpale ti gigi mɛ, wa lo ndo kũ ya, bi ná ngoi ni alengbi. (Mat. 24:36) Na ngoi niko, na singɔ yangondo ya, kalangɔ lo mɛndó Zabolo kala tɛrɛ Yehova ná azi mɛ ndo vɔrɔ lo ko, ta adu biani ma. Lo na hongɔ Satana ná azi zu mɛ ka mbage tɛ lo, wa lo na “mangɔ vundu tɛ [e].”

Uzu ti nɛngɔ ya, ngoi niko alengbi ko, ta Yehova na hãngɔ kpengba kpale tɛ e ma, kanda lo pa hɛ̃ e ya elengbi ti dungɔ na dengɔ bɛ na ngoi mɛ e ndo kũ lo. Nga ma se mɛ Yisaya tɛnɛ na ni, elengbi ti dungɔ na dengɔ bɛ na ngoi mɛ e ndo kũ ya, akpale ti nzɔ̃ni ali tɛrɛ lo. (Yis. 30:18) a Ngasia la elengbi ti luangɔ dengɔ bɛ ti ngaso nɛ? E ba aye siɔ mɛ alengbi ti zangɔ e.

SE MƐ ELENGBI TI DUNGƆ NA DENGƆ BƐ NA NGOI MƐ E NDO KŨ YEHOVA

Kpã lɛ mɔ na ndo akpale ti nzɔ̃ni. Gbia Davidi hũndó akpale ti siɔni nvɛ̃ni na ya dungɔ lɛ ngɛ̃́ tɛ lo. (Nz. 37:35) Abɛse ngaso ko, lo sundó ya: “Du so kpɔ ka gbɛlɛ Yehova, wa kũ lo na yɔngɔrɔ bɛ zu. Ta mɔ ma ngɔnzɔ na lo tɛ zo mɛ ndo longa lingɔ aye tɛ lo na lége ti siɔ kɔdɛ ma.” (Nz. 37:7) Davidi nvɛ̃ni landandó wangɔ ni na ndenge mɛ lo kpãndó lɛ lo na ndo kapa tɛ Yehova ti sarangɔ azi tɛ lo. Wa lo ndo hɛ̃ ngandó Yehova sia kɔli  na lo ti aye ti nzɔ̃ni zu mɛndó Yehova li na lo tɛ lo. (Nz. 40:5) Se du ya, e kpã lɛ e na ndo akpale ti nzɔ̃ni ti ya dungɔ lɛ ngɛ̃́ tɛ e, zangangɔ kpãngɔ lɛ e ngoi zu na ndo akpale ti siɔni mɛ ndo ɔ so gunda e ko, na dungɔ woni ya, e kũ Yehova.

Gonda Yehova ngoi zu. Ngoi mɛndɛ̃, Davidi ndó la asu mbeti ti Nzembo 71, lo pandó hɛ̃ Yehova ya: “Mbi na ngbãngɔ lá kwɛ kũngɔ; Mbi na gondangɔ ili mɔ fãni mɛndɛ̃ gba.” (Nz. 71:14) Ngasia la lo lengbindó ti gondangɔ ili Yehova nɛ? Lo lengbindó ti lingɔ ni na pangɔ kpale mɛ aba Yehova hɛ̃ azi mɛndɛ̃ nga na gondangɔ lo na lége ti bia. (Nz. 71:16, 23) Nga ma Davidi, elengbi ti dungɔ na dengɔ bɛ na ngoi mɛ e ndo kũ Yehova. E ndo hɛ̃ lo gonda na lége ti kwa tɛ e ti fangɔ tɛnɛ, na ya tɛnɛ tɛ e ti bi zu, nga na ngoi mɛ e ndo ye bia hɛ̃ lo. Se du ya, mɔ ndo ye bia ti Lo-lengɔ Gbia ko, nda mɛ ta mɔ kpã lɛ mɔ ndo tɛnɛ mɛ bia niko ndo tɛnɛ ma nɛ?

Lua ngunu ka tɛ ayata. Na ngoi mɛndó Davidi tengbi na kpengba kpale ko, lo pandó hɛ̃ Yehova ya: “Na lɛ azi tɛ mɔ ti mbilimbili, mbi na kpãngɔ bɛ mbi na ndo ili mɔ.” (Nz. 52:9) Elengbi nga ti luangɔ ngunu na ngoi mɛ e ndoni kɔi na ayata e awakristo, ta bo na ngoi mɛ e si kwa ti fangɔ tɛnɛ bere e ka bombi ma, kanda nga na ngoi mɛ e ndo gwe ka tɛ ayata ti bangɔ ala.​—Roma 1:11, 12.

Li ya, nzɔ̃ dangɔ bɛ tɛ mɔ ati kpengbani. Nzembo 62:5 tɛnɛ ya: “Mbi ndo kũ Nzapa so kpɔ zangangɔ tɛnɛngɔ tɛnɛ, na lo mɛ ya, nzɔ̃ dangɔ bɛ tɛ mbi alo ka tɛ lo.” Ti nɛngɔ ya, nzɔ̃ dangɔ bɛ tɛ e ati kpengbani ko, ayɔ ya, e ye na bɛ e kɔi ya, akapa tɛ Yehova na tingɔ na seni biani abɛse ayɔ ya, e kũ ni na pɛ abulu gba. Se du ya, ta nda gigi olo aga nga ma se mɛ e ndo da na bɛ e ma ko, ayɔ ya, e du na nzɔ̃ dangɔ bɛ mɛ kpengbani na ya ngoi ti ngaso. Elengbi ti lingɔ ya, nzɔ̃ dangɔ bɛ tɛ e ati kpengbani na mandangɔ tɛnɛ tɛ Nzapa, mandangɔ aprofesi, mandangɔ se mɛ azi mɛ asu Ngbangɔ atɛnɛ tɛnɛ mɛ na mangbi, nga na se mɛ Yehova kambisa akpale mɛ aba lo hɛ̃ e. (Nz. 1:2, 3) Ayɔ nga ya, e ngbã lá kwɛ ti “lingɔ sambela ndoni kɔi na nyingɔ vurú tɛ Nzapa” ti nɛngɔ ya, e bata mangbi tɛ e na lo kpengbani na ngoi mɛ e ndo kũ ya, akapa tɛ lo ti hɛ̃ngɔ e dungɔ lɛ ngɛ̃́ ti kaka ati na seni.​—Yuda 20, 21.

Nga ma tɛ gbia Davidi, du na loyengɔ ya, Yehova ndo bata azi zu ko la ndo kũ lo na yɔngɔrɔ bɛ zu, wa lo ndo fa songo ti mbilimbili na ala. (Nz. 33:18, 22) Ngbã lá kwɛ kũngɔ Yehova na kpãngɔ lɛ mɔ na ndo aye ti nzɔ̃ni ti ya dungɔ lɛ ngɛ̃́, na gondangɔ lo, na luangɔ ngunu na mbage tɛ ayata mɔ awakristo, nga na batangɔ nzɔ̃ dangɔ bɛ tɛ mɔ kpengbani.