Hizaʼi, hasambalö ifalua mbuʼusa linia Yehowa ba ginötö si no itatugöi, ba omasi ia na tabaloi daʼö si fao faʼebolo dödö. Hana wa omasi ia na ebolo dödöda? Hadia zanolo yaʼita enaʼö lö tebulö tarasoi waʼomuso dödö sagötö tabaloi Yehowa?

HANA WA OMASI YEHOWA NA EBOLO DÖDÖDA?

Imane Sura Niʼamoniʼö, ”Ebolo dödö Yehowa khömi ba wombaloi, ba ifalua daʼö ba wangoromaʼö faʼahakhö dödönia khömi. Börö me Yehowa andrö Lowalangi satulö. Dozi niha sanötöna khönia lasöndra waʼomuso dödö.” (Yes. 30:18) Sindruhunia, mufanandrösa wehede Yesaya ba niha Yahudi sabeʼe högö. (Yes. 30:1) Hizaʼi ba gotaluara, so ösa niha Yahudi si lö faröi, ba fehede daʼö zangaʼaroʼö tödöra wa hasambalö sökhi dania zalua. Fehede daʼö göi zameʼe tötönafö ba nono mbanua Yehowa si lö faröi iadaʼa.

Börö daʼö, moguna tabaloi si fao faʼebolo dödö börö me simane daʼö göi nifalua Yehowa, ibaloi si fao faʼebolo dödö. No ihonogöi hawaʼara ihori gulidanö si lö sökhi andre, ba iadaʼa ibalo-baloi ngaluo hegöi inötö wamaluania daʼö. (Mat. 24:36) Ba luo daʼö, fefu niböbögö Gafökha khö Yehowa hegöi ba niha samosumange Lowalangi, oroma wa fasala daʼö. Aefa daʼö, ihori Zatana andrö Yehowa ba fefu zoloʼö khönia, ba hasambalö ’iforomaʼö waʼahakhö dödönia khöda’.

Iadaʼa, te lö iheta Yehowa gabula dödö salua khöda. Hizaʼi, ifaduhuʼö khöda wa tola taʼomusoiʼö dödöda sagötö tabalo-baloi dötönafö ba zi so miföna si no ifabuʼu. Daʼö göi niwaʼö Yesaya samaʼeleʼö. (Yes. 30:18) a Fanofunia khöda: Hadia zinangea tafalua enaʼö tasöndra waʼomuso dödö? So öfa ngawalö zi tola manolo yaʼita.

HEWISA ENAʼÖ LÖ TEBULÖ WAʼOMUSO DÖDÖDA SAGÖTÖ TABALOI YEHOWA?

Osambuaʼö dödömö ba ngawalö zi sökhi. Sagötö faʼaurinia, oya sibai waʼalösökhi niʼila Razo Dawido. (Si. 37:35) Hizaʼi imane, ”Baloi Yehowa si fao faʼebolo dödö. Baloi ia si fao fanötöna. Böi abao dödöu ba niha si no aʼozu mamalua niʼera-erania.”  (Si. 37:7) Ifalua göi daʼö Dawido. Iʼosambuaʼö dödönia ba mbuʼusa li Yehowa wa hasambalö teʼefaʼö ia. Iʼangerönusi göi howu-howu nitemania moroi khö Yehowa. (Si. 40:5) Na taʼosambuaʼö göi dödöda ba ngawalö zi sökhi, tenga ha abula dödöda, itugu aoha khöda ba wombaloi Yehowa.

Ogunaʼö ginötö ba wanuno Yehowa. Sanura Sinunö 71, te Dawido, imane khö Yehowa, ”Lö uböhöli wombaloi; usuno ndraʼugö ba ufuli zui usuno.” (Si. 71:14) Hewisa lalania ba wanuno Yehowa? Itutunö ba niha böʼö sanandrösa khö Yehowa, ba iʼanunöisi göi zinunö fanuno. (Si. 71:16, 23) Simane Dawido, tola tasuno Yehowa na manuriaigö ita, na tafadunö-dunö sanandrösa khö Yehowa ba wahuhuosada sero maʼökhö, hegöi na taʼanunöisi zinunö ba wamati. Na öʼanunöisi fazambua moroi ba zinunö andrö, nehegö atö lirik-nia ba angeragö hewisa wa möi fanolomö daʼö enaʼö itugu örasoi waʼomuso dödö.

Fariawö khö ndra talifusö si sara lala wamati enaʼö teʼabölöʼö ndraʼugö. Me oya gabula dödö salua khö Dawido, imane khö Yehowa, ”Föna ndra enonimö si lö faröi, ba döimö manötöna ndraʼo.” (Si. 52:9) Simane Dawido, tola göi teʼabölöʼö ita na fariawö ita khö ndra talifusöda, na so ita ba gangowuloa, na fao ita manuriaigö hegöi na so nifaluada tanö böʼö.—Rom. 1:11, 12.

Aroʼö wamatimö ba mbuʼusa li Yehowa. Imane Sinunö 62:5, ”Udöna-döna Lowalangi si fao faʼebolo dödö börö me yaʼia dötönafögu.” Moguna sibai wamati saro, mendrua manö na amozua götö daʼa lö alua ba ginötö si no tadöna-döna. Moguna tafaduhusi tödö wa hasambalö alua nifabuʼu Yehowa, hewaʼae no ara tabalo-baloi ia. Tola taʼaroʼö wamatida na tafahaʼö ita ba Daromali Lowalangi. Duma-dumania, tandraigö angerönusi sanandrösa ba wamaʼeleʼö Zura Niʼamoniʼö si no alua, faʼatefaudu fefu nösi Zura Niʼamoniʼö hegöi ngawalö nitutunö Yehowa sanandrösa khönia. (Si. 1:2, 3) Baero daʼö, böi göi taböhöli ’wangandrö si fao fanuturu lala moroi ba geheha niʼamoniʼö’ enaʼö tola tarorogö wahuwusada khö Yehowa gasa-gasa wombaloida faʼauri si lö aetu si no ifabuʼu.—Yud. 20, 21.

Simane Razo Dawido, tola faduhu dödömö wa hasambalö irorogö Yehowa niha sombaloi yaʼia ba iforomaʼö waʼomasinia si lö faröi khöra. (Si. 33:18, 22) Börö daʼö, osambuaʼö dödömö ba ngawalö zi sökhi, suno Yehowa, lau fariawö khö ndra talifusöda ba aroʼö wamatimö. Na öfalua daʼö, hasambalö tola öbaloi Yehowa si fao faʼomuso dödö ba faʼebolo dödö!