Ulole embere erilindirira Yehova ighunatsemire
UNEMULINDIRIRA omughulu Yehova akendisyabughaho obubi bosi n’eriyira emyatsi yosi mo mihya-mihya? (Erib. 21:1-5) Inga! Aliwe, si kiribya kyolo mughulu wosi erilola embere eriyibombeka ukalindirira Yehova, kutsibu-tsibu omughulu unemulaba omo maligho. Amaha awakalindirirawa akaleka omutima iniasimba.—Misyo 13:12.
Nomo bine, Yehova anzire itwalola embere eriyibombeka tukamulindirira akole oko ndambi eyo abirihiraho. Busanaki Yehova anzire itwalindirira? Niki kyo kyangatuwatikya erilindirira itunatsemire?
BUSANAKI YEHOVA ANZIRE ITWALINDIRIRA?
EBiblia ikabugha yiti: “[Yehova] akasonda eribaganyira. Kandi busana nʼekyo akalinda endata iniabakwira olukogo. Kusangwa [Yehova] ni [Mungu] wʼeribanza litunganene. Omuyisa ali oko bosi abakamukwa olukando.” (Isa. 30:18) Ebinywa bya Isaya ebi, oko nzuko byabya bikabwirwa Abayahudi abatere. (Isa. 30:1) Aliwe hanabya n’abandi Bayahudi bataleghula. Abayahudi abo mubabana amaha omo binywa ebyo. Kandi ebinywa bighumerera ebyo bikaha amaha oko bandu abakakolera Yehova yo butaleghula munabwire.
Litolere itwayibombeka tukalindirira Yehova kusangya Yehova naye akayibombeka akalindirira. Anawite endambi yiwe eyakendisyatsandiryako ekihugho kibi kino, kandi anemulindirira ekiro ekyo n’esaha eyo bihike. (Mat. 24:36) Oko mughulu oyo, kikendisyalangirika ndeke-ndeke ngoko ebyo Diabolo abugha oko Yehova n’oko bandu abakamukolera ni by’amabehi. Neryo akendisyatoghotya Sitani n’abosi abali oko luhande lwiwe, aliwe itwe akendisyatulamya.
Itunemulindirira ekiro ekyo, Yehova anganasombola eritendibughaho amaligho wetu, aliwe ati twanganayikerera ngoko anganatuwatikya eribya n’obutseme tukamulindirira. Ngoko Isaya anabugha, twanganabya n’obutseme tukalindirira omwatsi mubuya ahike. (Isa. 30:18) a Twangabana obutseme obo bo tuti? Hali emyatsi ini eyangatuwatikya.
NIKI KYO KYANGATUWATIKYA ERILINDIRIRA ITUNATSEMIRE?
Tubye tukalengekania oko ebyuwene ebyo tukabana. Omwami Daudi mwalola oko maligho mangyi omo ngebe yiwe. (Esy. 37:35) Nomo bine, mwahandika ati: “Uyibombeke embere sya [Yehova], umulinde nʼerisikya-sikya omutima, suhahukaye omutima busana nʼabakabana omugaso, kutse busana nʼabakagasa omo syombita nyibi syabo.” (Esy. 37:7) Daudi iyuwene-wene mwakolesya erihano eryo akayiketera omulaghe wa Yehova aw’erimusabula. Kandi inyakasima Yehova oko bibuya byosi ebyo akamukolera. (Esy. 40:5) Netu twamabya tukalengekania oko ebyuwene omo ngebe yetu n’eritendihwererya amalalengekania wetu oko ebiteghendeka, ikikenditwolobera eriyibombeka tukalindirira Yehova.
Ubye ukakolesya ehyanya hyosi ehyamabanika erikania ndeke oko Yehova. Omuhandiki w’ Esyonyimbo 71; alinga abya Daudi, mwabugha atya oko Yehova: “Nikwa nasyahira amaha ukʼuwe emigulu yosi, nasyakupipa akandi nʼakandi.” (Esy. 71:14) Endipipa Yehova yo ati? Endibwira abandi oko Yehova n’erimupipa omo syonyimbo. (Esy. 71:16, 23) Nga Daudi, twanganalindirira Yehova itunatsemire. Tukamupipa omughulu tukatulira abandi, omughulu tukabwira abira betu n’ab’oko kihanda kyetu okw’iye, n’omughulu tukimba esyonyimbo syetu. Omughulu ukendibana akanya ky’erimba oko syonyimbo sy’Obwami, ulengekanaye kutsibu oko binywa by’asyo kandi ngoko sikakutsemesaya?
Ubye ukasiba n’abaghala n’abali betu batoke erikusikya mutima. Omughulu Daudi abya omo maligho, mwabugha atya oko Yehova: “Nasyalindirira erina ryawe . . . embere syababuyirire bawe.” (Esy. 52:9, NTN62) Netu twangasubibwa mutima omughulu tuli n’abaghala n’abali betu, omughulu tuli oko mihindano yetu, omughulu tukatulira nabo, nibya n’omughulu kukayitsemesaya kughuma nabo.—Rom. 1:11, 12.
Uwataye amaha waghu. Esyonyimbo 62:5 hati: “Ngayiketera [oMungu] iyowene, Iye ni maha wage.” Ni ky’omughaso munene eribya n’amaha awawatire, kutsibu-tsibu twamalangira endulya y’ekihugho kibi kino iyamabya nga yamaghana eryasa luba kulenga ngoko twabya tukalengekania. Litolere itwikirirya kundu ngoko ebyo Yehova abirilagha bikendisyabererera. Twanganawatya amaha wetu omwigha Ekinywa ky’oMungu. Ngy’eky’erileberyako, lengekanaya oko maminyeri wosi agho eBiblia yabugha embere awabiribererera, ngoko abahandika eBiblia mubabugha emyatsi eyitasighene, n’eyindi myatsi mike-mike eyo Yehova akabugha okw’iye. (Esy. 1:2, 3) Kandi litolere itwaleka “ekirimu ky’oMungu kisondole emisabe” yetu tutoke erilola embere eribya n’obwira obuwene haghuma na Yehova tukalindirira endaghane yiwe y’erisyatuha engebe y’erikota yibererere.—Yuda 20, 21.
Ng’Omwami Daudi, naghu wikiriraye ngoko Yehova akateghaya abakamulindirira kandi Akakanganayabo obubuya bwiwe b’olwanzo. (Esy. 33:18, 22) Omwiyibombeka tulole embere erilindirira Yehova, omwibya tukalengekania oko ebyuwene omo ngebe yetu, omwibya tukamupipa, omwisikibwa-mutima n’abagha n’abali betu, n’omwilola embere eriwatya amaha wetu mabuya.
a Ekinywa kya kera ekyabindulawa mo “erilola embere eribya n’amaha” kyanganamaanisya “erilindirira kutse eriyiketera omwatsi mulebe akoleke.” Ekyo kikakanganaya ngoko si kibi erikandira erisabuka lyetu.
