Nanyana kunjalo, uJehova usalindele ukuthi simlinde ngesineke bona athathe igadango ngesikhathi sakhe asibekileko. Kubayini alindele lokho kithi? Khuyini engasisiza sihlale sithabile nasisamlindileko?

KUBAYINI UJEHOVA AFUNA SIMLINDE NGESINEKE?

IBhayibheli lithi: “uJehova ulinde ngesineke bona abe nomusa begodu uzokuthatha igadango bona abe nesirhawu. Ngombana uJehova nguZimu wobulungiswa. Bayathaba boke abamlindelako.” (Isa. 30:18) Amezwi ka-Isaya la, atlolelwa amaJuda ebekanekani. (Isa. 30:1) Kodwana bewasese khona amaJuda athembekileko begodu amezwi la bekawakhuthaza abe awanikele ithemba. Amezwi la asanikela abantu bakaJehova abathembekileko ithemba namhlanjesi.

Yeke kufuze silinde ngesineke ngombana uJehova ulinde ngesineke. Ubeke isikhathi lapho azokuqeda khona zoke izinto ezimbi ezenzekako esikhathini sethu begodu ulinde ngesineke bona lifike ilangelo ne-irelo. (Mat 24:36) Ngesikhatheso, kuzokubonakala ukuthi lokho uSathana nabantu bakhe ebebasola ngakho uJehova kumamala. Uzokuqeda nya ngoSathana nalabo abamsekelako kodwana “uzokuba nomusa kithi.”

Nasisalinde lokho, uJehova kungenzeka angasusi iintjhijilo esiqalene nazo kodwana uyasiqinisekisa ukuthi singathaba nasisalindile. Njengombana u-Isaya atjhwile, singathaba nasifuna namkha sithemba ukuthi kunento ehle ezokwenzeka. (Isa 30:18) a Singalifumana njani ithabelo? Nazi iindlela ezine ezingasisiza.

UNGATHABA NJANI NAWUSALINDILEKO?

Cabanga ngezinto ezihle ezenzeka ekuphileni kwakho. IKosi uDavida beyibone ubumbi obunengi ekuphileni kwayo. (Rhu. 37:35) Nanyana kunjalo, yatlola yathi: “Thula phambi kwakaJehova umlinde ngokululukela. Ungasilingwa mumuntu ophumelelako ekwenzeni amaqhingakhe.” (Rhu. 37:7) UDavida ngokwakhe wasisebenzisa iselulekwesi ngokuthi adzimelelise umkhumbulwakhe  ethembeni lesindiso. Wabuye watjheja neembusiso azifumene kuJehova. (Rhu. 40:5) Ngendlela efanako, nathi nasidzimelela ezintweni ezihle kunokuthi sidzimelele ezintweni ezimbi ezenzeka ekuphileni kwethu, sizokufumana kubulula ukulinda uJehova.

Hlala umajadu ekulotjheni uJehova. Umtloli weRhubo 71, okungenzeka nguDavida, wathi kuJehova: “Mina ngizokuraga nokulinda; Ngizokudumisa khulu kunekuthomeni.” (Rhu. 71:14) Bekazomdumisa njani uJehova? Bekazokutjela abanye ngoJehova bekamdumise. (Rhu. 71:​16, 23) NjengoDavida, nathi singathaba nasisalinde uJehova. Simdumisa ngokuthi siye esimini, lokho esikhuluma ngakho qobe lilanga, neengoma zokudumisa esizilalelako. Esikhathini esizako nawucula iingoma zomBuso, kubayini ungalalelisisi kuhle umlayezo okhuthazako?

Fumana isikhuthazo kubafowenu nakibodadwenu. UDavida nakaqalene neentjhijilo, wathi kuJehova: “Phambi kwabathembikileko bakho, Ngizokuthembela egameni lakho.” (Rhu. 52:9) Nathi singakhuthazwa bafowethu nabodadwethu abathembekileko, ingasi esifundweni nesimini kwaphela kodwana nalokha nasihlangeneko.—Rom 1:​11, 12.

Qinisa ithemba lakho. IRhubo 62:5 lithi: “Ngilinda uZimu ngithulile ngombana ithemba lami livela kuye.” Ithemba lamambala lihlanganisa ukulinda ngokuqiniseka—okuyinto eqakathekileko nasizakukghona ukukghodlhelela nangabe isiphelo asifiki msinyana ngendlela esilindele ngayo. Kufuze siqiniseke ukuthi iinthembiso zakaJehova zizokuzaliseka kungayi ngokuthi kufuze silinde isikhathi esingangani. Singaqinisa ithemba lethu ngokuthi sifunde iliZwi lakaZimu—iimphorofido, ukuvumelana kwalo nemininingwana uJehova asembulela yona ngaye. (Rhu. 1:​2, 3) Ngaphezu kwalokho, kufuze siragele phambili ‘sithandaza ngomoya ocwengileko’ bona sihlale sinetjhebiswano elihle noJehova lokha nasisalinde ukuthi azalise iinthembiso zakhe zokuphila okungapheliko.—Juda 20, 21.

NjengeKosi uDavida, singaqiniseka ukuthi uJehova uyabavikela labo abamlindileko begodu ubathanda ngokusuka ehliziyweni. (Rhu. 33:​18, 22) Yeke linda uJehova ngesineke ngokuthi udzimelele ezintweni ezihle ezenzeka ekuphileni kwakho, ngokumdumisa, ngokukhuthazwa bafowethu nabodadwethu nokuragela phambili uqinisa ithemba lakho.