Koma Yehova oyembekezela kuti tikoyembekezela moleza mtima kuti yove acitepo kanthu pa nthawi yoyenela. Ndaŵa yanji oyembekezela izi kwa seo? Kansi n’cinji cingatiyavye kuti tikonkhala osangalala patuyembekezela?

NDAŴA YANJI YEHOVA OTIYEMBEKEZELA KUTI TIKOYEMBEKEZELA?

Baibo yulaŵila kuti: “Yehova oyembekezela moleza mtima kuti akuwamileni mtima ndipo akanyamuke kuti akucitileni cifundo, cifukwa Yehova ni Mulungu wamene oweluza mwacilungamo. Odala ni ŵanthu amene omuyembekezela.” (Yes. 30:18) Mau aŵa a Yesaya enzokuya kuli Ayuda amene enzomvwila lini Yehova. (Yes. 30:1) Koma pakati pao penze Ayuda ayakine amene enze okhulupilika, ndipo mau aŵa eŵapasa ciyembekezo. Mau amozimozi opasa soti ciyembekezo atumiki okhulupilika a Yehova masiku ŵano.

Tufunika kuyembekezela moleza mtima cifukwa Yehova oyembekezela moleza mtima. Yove ali na nthawi yoikika pati akasilizhye dongosolo ino ya vinthu, ndipo oyembekezela kuti siku koma soti ola iyi ifwike. (Mat. 24:36) Pa nthawi iyi, zikaonekeletu patuŵa kuti zakulaŵila Maleŵania ponena za Yehova na atumiki ŵake, ni zawenye. Pavuli pake, akafumyepo Satana na ŵala onse amene ali ku mbali yake. Koma seo ‘akationeshe cifundo.’

Pali pano, nthawi ziyakine Yehova angaticoselepo lini mayeselo. Koma otisimikizhyila kuti tingakwanishe kunkhala acimwemwe patuyembekezela. Monga ni mwecilaŵilila Yesaya, tingankhale osangalala patuyembekezela kuti cinthu ciyakine cicitike. (Yes. 30:18) a Kansi tingacipeze tyani cimwemwe ici? Onani vinthu 4 vingatiyavye.

VINTHU VAMENE VINGATIYAVYE KUNKHALA OSANGALALA PATUYEMBEKEZELA

Mukoika maganizo ŵanu pa vinthu vabwino. Mfumu Davide enze eona vinthu viipa vinyinji mu umoyo wake. (Sal. 37:35) Olo n’tetyo, elemba kuti: “Nkhala celele pamenso pa Yehova, ndipo umuyembekezele na mtima wako wonse. Usapye mtima na aliyense wamene vinthu vumuyendela bwino, munthu wamene okwanilisha volinga vake viipa.” (Sal. 37:7) Davide eseŵenzesha malangizo aŵa  mwa kuika maganizo ŵake pa lonjezo ya Yehova yakuti am’pulumushe. Enzoyamikila soti Yehova pa vinthu vabwino veenzomucitila. (Sal. 40:5) Nase ngati tuika maganizo ŵasu pa vinthu viweme, osati pa mavuto ŵasu, cinkhale cosavuta kuyembekezela Yehova.

Mukonkhala otangwanika potamanda Yehova. Wolemba Salimo 71, wamene cuoneka kuti ni Davide, euzhya Yehova kuti: “Nikoyembekezela mweo nthawi zonse, ndipo niyangizhyile kukutamandani kupambana kale.” (Sal. 71:14) Kansi emutamanda tyani Yehova? Yove enzouzhya ayakine zokhuza Yehova nomuimbila nyimbo zacitamando. (Sal. 71:​16, 23) Molingana na Davide, nase tingankhale osangalala patuyembekezela Yehova. Tingamutamande kupitila m’nchito yolalikila, patulaŵizhyana na ŵanthu ayakine siku iliyonse koma soti kupitila m’nyimbo zasu. Nthawi iyakine pati mukaimbe nyimbo ya Ufumu, mukaganizile ngako mau a m’nyimbo iyo na mwayokucitishilani kunkhala na cimwemwe.

Mukolola akwasu na azilongosi kukulimbikishani. Davide peenzokumana na mavuto, euzhya Yehova kuti: “Nikoyembekezela zina yanu pamenso pa okhulupilika ŵanu.” (Sal. 52:9) Nase tingapeze cilimbikiso kufumila kuli olambila ayasu, osati tyala pa misonkhano na mu utumiki, koma na pa maceza.—Aro. 1:​11, 12.

Mukotang’isha ciyembekezo canu. Salimo 62:5 yulaŵila kuti: “Nikoyembekezela Mulungu modekha cifukwa ciyembekezo cangu cufumila kuli yove.” N’cinthu cofunika ngako kunkhala na ciyembekezo cotang’a makamaka ngati masilizhyilo ofwika lini pa nthawi yetenzoyembekezela. Tufunika kunkhala osimikizhya kuti malonjezo a Yehova akakwanilishiwe mosasamala kanthu kuti tingafunike kuyembekezela kwa nthawi itali. Tingatang’ishe ciyembekezo casu mwa kuphunzila Mau a Mulungu. Mwacisanzo, tingaphunzile maulosi amene ekwanilishiwa kale, mwamene olemba Baibo osiyanasiyana elembela zinthu zokatizhyana koma soti zinthu zakutiululila Yehova zokhuza yove. (Sal. 1:​2, 3) Tufunika soti kupitilizhya “kupemphela mu mphamvu ya mzimu utuŵa” kuti tipitilizhye kunkhala pa ushamwali wotang’a na Yehova patuyembekezela kuti akwanilishe lonjezo ya moyo wosasila.—Yuda 20, 21.

Molingana na Mfumu Davide, nkhalani na cidalilo cakuti Yehova oona ŵala onse amene omuyembekezela ndipo oŵaonesha cikondi cokhulupilika. (Sal. 33:​18, 22) Pitilizhyani kuyembekezela Yehova moleza mtima mwa kuika maganizo ŵanu pa vinthu vabwino, kumutamanda, kulola akwasu na azilongosi kukulimbikishani koma soti mwa kupitilizhya kutang’isha ciyembekezo canu.