Nkhalani osangalala pamupitilija kuyembekezela Yehova moleza ntima
KANSI mwewo muyembekezela mwachidwi nthawe yamene Yehova yakuti azachose mavuto onse nopanga vinthu vonse kunkhala vanyowani? (Chiv. 21:1-5) Mosakaikila niye vamuchita! Koma olo n’tetyo, kupitilija kuyembekezela Yehova moleza ntima ni nthawe zonse lini pakunkhala kupepu, maka-maka keno tulimbana na mavuto. Keno vinthu vatuyembekezela vuchelwa kuchitika vulwalisha ntima.—Miy. 13:12.
Koma olo n’tetyo, Yehova ofuna kuti sewo tikoyembekezela moleza ntima nthawe yechiikilatu yove kuti azachitepo kanthu. Ndaŵa yanji yove oyembekezela vamene ivi kuli sewo? Kansi n’chinji chingatiyavye kuti tikosangalala patuyembekezela Mulungu?
NDAŴA YANJI YEHOVA OFUNA KUTI TIKOMUYEMBEKEZELA?
Baibolo yunena kuti: “Yehova oyembekezela moleza ntima kuti akuwamileni ntima, ndipo azaime kuti akuchitileni chifundo. Chifukwa Yehova ni Mulungu wamene oweluza mwachilungamo. Osangalala ni ŵanthu amene omuyembekezela.” (Yes. 30:18) Poyamba, mawu a Yesaya amene aŵa enze oluta kuli Ayuda osamvwila. (Yes. 30:1) Koma pakati pa Ayuda amene awo penze ŵanthu ayakine okhulupilika ndipo mawu amene aŵa eŵapasa chiyembekezo. Mawu amene aŵa opeleka soti chiyembezo kuli atumiki okhulupilika a Yehova masiku ŵano.
Sewo tufunika kuyembekezela moleza ntima chifukwa naye Yehova oyembekezela moleza ntima. Yove eika kale nthawe yakuti azawononge chino chalo chiipa. Mulungu oyembekezela tyala nthawe na nsiku kuti ikwane. (Mat. 24:36) Panthawe yamene iyo, vinthu vakulaŵila Satana vokhuza Yehova komasoti atumiki a Mulungu vizawonekele patuŵa kuti n’vawenye. Pavuli pake, Yehova azawononge Satana na onse amene ali kumbali yake koma sewo, Yehova “azatichitile chifundo.”
Nthawe yamene iyo ikaliyefwika, Yehova payakine angasilijiletu lini mavuto ŵatukumana nawo, koma yove otisimikijila kuti tingakwanishe kunkhala osangalala patumuyembekezela. Molingana na mwechinenela Yesaya, n’vokwanishika kunkhala oleza ntima panthawe yatuyembekezela chinthu chiyakine chiweme kuti chichitike. (Yes. 30:18) a Koma kansi vamene ivi vingakwanishike tyani? Tiyeni tikambilane vinthu 4 vamene vingatiyavye kunkhala oleza ntima patuyembekezela Mulungu.
MWATINGANKHALILE OSANGALALA PATUYEMBEKEZELA MULUNGU
Mukoika maganizo ŵanu pa vinthu viweme. Mfumu Davide ewona vinthu vinyinji viipa pa moyo wake. (Sal. 37:35) Koma olo n’tetyo, yove elemba kuti: “Nkhala chelele pamenso pa Yehova ndipo umuyembekezele moleza ntima. Osati ukokhumudwa na munthu wamene ochita viŵembu novikwanilisha paliye vuto iliyonse.” (Sal. 37:7) Davide enzekonkheja malangizo amene aŵa ndipo enzeika maganizo ŵake pa chiyembekezo chachipulumuso chechimupasa Yehova. Komasoti yove enzetembeja Yehova pa vinthu vonse viweme vechimuchitila. (Sal. 40:5) Keno nase tuchitasoti chimozi-mozi noika maganizo ŵasu pa vinthu viweme vamene vuchitika pa moyo wasu mmalo moganizila vinthu viipa, kuzankhale kosavuta kuli sewo kuyembekezela Yehova.
Mukonkhala bize na ntchito zotamanda Mulungu. Munthu wamene elemba Salimo 71, wamene payakine enze Davide, euja Yehova kuti: “Newo nipitilije kuyembekezela; Nizakutamandeni moweleja-weleja kupambana mwenenzechitila kale.” (Sal. 71:14) Kansi Davide sembe emutamanda tyani Yehova? Yove sembe eujako ŵanthu ayakine vokhuza Mulungu na kuimba nyimbo zotamanda Mulungu. (Sal. 71:16, 23) Molingana na mwechichitila Davide, nase tingapitilije kunkhala osangalala patuyembekezela Yehova. Sewo tutamanda Mulungu tikokata ntchito yolalikila, potandala na ayasu nsiku na nsiku, komasoti tikoimba nyimbo zasu zauzimu. Lomba nthawe yokonkhapo yati muzaimbe nyimbo zasu zauzimu, tyani kuchita chidwi ngako na uthenga wake kuti muzawone mwaukhuzila ntima wanu?
Mukolola kuti abale na alongo ŵanu akutang’isheni. Panthawe yenzekumana na mavuto, Davide euja Yehova kuti: “Pamenso pa okhulupilila ŵanu, nizayembekezele zina yanu.” (Sal. 52:9) Abale na alongo ŵasu angatitang’ishe, osati tyala tikankhala pamisonkhano na muutumiki, koma tikapatulasoti nthawe yotandala nawo.—Alo. 1:11, 12.
Mukotang’isha chiyembekezo chanu. Lemba ya Salimo 62:5 yunena kuti: “Nuyembekezela Mulungu modekha chifukwa chiyembekezo changu chufumila kuli Yove.” N’chinthu chofunika ngako kupitilija kutang’isha chiyembekezo chasu—maka-maka keno tankhala tuyembekezela mapeto a chino chalo kwa nthawe itali ngako. Sewo tufunika kukhulupilila kuti malonjezo onse a Yehova azakwanilishiwe, viliye kanthu kuti tufunika kuyembekezela kwa nthawe itali tyani. Sewo tingatang’ishe chiyembekezo chasu mwakuphunzila Mawu a Mulungu—maulosi, mwazukatanijilana nkhani za m’Baibolo, komasoti vechichita Yehova potiululila luweme zaumunthu wake. (Sal. 1:2, 3) Sewo tufunikasoti kupitilija “kupemphela mokatijana na mzimu utuŵa” kuti tipitilije kunkhala paushamwali wotang’a na Yehova patuyembekezela kukwanilishiwa kwa lonjezo yake ya moyo wosasila.—Yuda 20, 21.
Molingana na mwechichitila Mfumu Davide, mukokhulupilila kuti Yehova osamalila, oteteza, komasoti owonesha chikondi chokhulupilika kuli aliyense amene oyembekezela yove. (Sal. 33:18, 22) Tetyo, pitilijani kuyembekezela Yehova moleza ntima poika maganizo ŵanu pa vinthu viweme vamene vuchitika pa moyo wanu, kutamanda Mulungu, kulola kuti abale akokutang’ishani, komasoti kupitilija kutang’isha chiyembekezo chanu chamene ni chiweme ngako.
a Mawu oyambilila amene ŵechimasulila kuti “kuyembekezela” angatanthauze “kufunishisha ngako kuti chinthu chiyakine chichitike,” vamene vuwonesha kuti n’kuphoniyalini kunkhala ofunishisha kuti Yehova asilije mavuto ŵasu.
