Le ga go le bjalo, Jehofa o letetše gore re mo letele ka go se fele pelo gore a tšee kgato ka nako yeo a e beilego. Ke ka baka la’ng a letetše seo go rena? Re ka thušwa ke’ng gore re thabe ge re dutše re letile?

KE KA BAKA LA’NG JEHOFA A NYAKA GORE RE LETE?

Beibele e re: “Jehofa o tla dula a le letile gore a le gaugele, gomme o tla ema gore a le bontšhe kgaugelo. Jehofa ke Modimo wa kahlolo. Go thaba bao ba dulago ba mo letetše.” (Jes. 30:18) Mantšu a a Jesaya a be a ngwaletšwe Bajuda ba dinganga. (Jes. 30:1) Eupša go be go na le Bajuda bao ba botegago gomme mantšu a a ile a ba nea kholofelo. Ona mantšu a swanago a sa nea bahlanka ba Jehofa bao ba botegago kholofelo lehono.

Ka gona re swanetše go leta ka go se fele pelo ka gobane Jehofa le yena o letile ka go se fele pelo. O beile nako yeo a tlago go fediša tshepedišo ye gomme o letetše gore letšatši leo le iri di fihle. (Mat. 24:36) Ka nako yeo, go tlo ba molaleng gore dilo tšeo Sathane a bego a latofatša Jehofa le bahlanka ba gagwe ka tšona ke maaka. Jehofa o tlo fediša Sathane le bao ba mo thekgago, gomme “a [re] bontšha kgaugelo.”

Gona bjale Jehofa a ka no se tloše mathata a rena eupša o re kgonthišetša gore re ka thaba ge re sa dutše re letile. Jesaya o boletše gore re ka kgona go thaba ge re dutše re letetše gore dilo tše dibotse di direge. (Jes. 30:18) a Re ka hwetša bjang lethabo leo? A re boneng megato e mene yeo e ka re thušago.

DILO TŠEO DI KA DIRAGO GORE RE THABE GE RE LETILE

Naganišiša ka dilo tše dibotse. Kgoši Dafida o ile a diragalelwa ke dilo tše dintšhi tše mpe bophelong bja gagwe. (Ps. 37:35) Lega go le bjalo, o ngwadile gore: “Ikhomolele pele ga Jehofa gomme o mo letele ka go se fele pelo. O se ke wa kwatišwa ke motho yo a atlegago ge a phetha maano a gagwe a mabe.” (Ps. 37:7) Dafida o ile a diriša keletšo ye ka go dula a naganišiša ka  kholofelo yeo a bego a na le yona ya gore Jehofa o tshepiša gore o tla mo phološa. O ile a naganišiša le ka ditšhegofatšo tšeo a di hweditšego go Jehofa. (Ps. 40:5) Le rena ge re ka dula re nagana ka dilo tše dibotse gomme ra se dule re nagana ka dilo tše mpe tšeo di re diragalelago, go tlo ba bonolo gore re kgone go letela Jehofa.

Dula o swaregile ka go tumiša Jehofa. Mongwadi wa Psalme 71, yo go ka diregago gore ke Dafida, o boletše gore: “Ke tla tšwela pele ke go letetše, ke tla go tumiša go feta peleng.” (Ps. 71:14) O be a ka tumiša Jehofa bjang? Ka go botša ba bangwe ka Jehofa le ka go mo opelela. (Ps. 71:​16, 23) Le rena re ka hwetša lethabo ge re dutše re letetše Jehofa go swana le Dafida. Re mo tumiša ka go ya tšhemong, ka dilo tše re di bolelago letšatši le letšatši le ka go mo opelela. Nakong e tlago ge o opela kopelo ya Mmušo, o ka naganišiša ka molaetša wa yona wo o kgothatšago.

Kgothatšwa ke bana beno le dikgaetšedi. Ge Dafida a be a na le mathata, o itše go Jehofa: “Ke tla bontšha gore ke tshepa leina la gago pele ga bao ba go botegelago.” (Ps. 52:9) Le rena re ka kgothatšwa ke bana babo rena le dikgaetšedi e sego feela ge re le dibokeng goba tšhemong eupša le ge re iketlile dipokanong tša bogwera.—Baroma 1:​11, 12.

Tiiša kholofelo ya gago. Lengwalo la Psalme 62:5 le re: “Ke tla letela Modimo ke sa fele pelo, ka gobane ke tshepile yena.” Kholofelo e tiilego e ra gore re swanetše go tshepa gore selo seo re se letetšego se tlo direga, e bile se se bohlokwa ge e ba re swanetše go kgotlelela tshepedišo ye go feta kamoo re bego re nagana ka gona. Re swanetše go kgodišega gore dilo tšeo Modimo a re tshepišitšego tšona di tlo direga go sa šetšwe gore re tlo fetša nako e kae re di letetše. Re ka tiiša kholofelo ya rena ka go ithuta Beibele. Ka mohlala, re ka ithuta ka boporofeta, kamoo bangwadi ba Beibele ba ba fapafapanego ba dumelelanago ka gona le ka dilo tšeo Modimo a di utollago ka yena. (Ps. 1:​2, 3) Ka gona, re swanetše go dula re “[rapela] ka moya o mokgethwa” gore o re thuše go dula re na le segwera se sebotse le Jehofa ge re sa dutše re letile gore kholofelo yeo re nago le yona ya go phela ka mo go sa felego e phethagale.—Juda 20, 21.

Go swana le Kgoši Dafida, kgodišega gore Jehofa o dula a lebeletše bao ba mo letilego e bile O bontšha gore O a ba rata. (Ps. 33:​18, 22) Dula o letetše Jehofa ka go dula o naganišiša ka dilo tše dibotse tšeo di diregago bophelong bja gago, ka go mo tumiša, ka go kgothatšwa ke badumedigotee le wena le ka go ba le kholofelo e tiilego.