Siovaa wahanda onthwe tukevelele noumphwa-lundo, atee onthiki makamanako ovivi. Oityi ahandela onthwe tukevelele kwe? Oityi matyitukwatesako atukala umwe vala tyahambukwa tyina tukevelela?

OITYI SIOVAA AHANDELA ONTHWE TUKEVELELE KWE?

Ombimbiliya yati: “Siovaa ukevelela noumphwa-lundo, opo emukwateseko, makakatuka opo emulingile okankhenda. Mokonda, Siovaa o Huku youviuki. Vena ehambu, ovovana vatwalako okukevelela kwe.” (Isa. 30:18) Onondaka ombo, Isaiya wembutolelele ova Sundaa onomphwililiki. (Isa. 30:1) Mahi tupu ova Sundaa vamwe vali neyumba-nthumbi, onondaka ombo ambuvepe ondundo yokutwalako okukevelela. Na hono onondaka ombo, mbupa ondundo ovanthu va Siovaa okutwalako okukevelela kwe.

Onthwe twesukisa okukevelela noumphwa-lundo, mokonda Siovaa nae otyo ekahi nokulinga. Ngwe wanaka-le onthiki mamane-ko ouye ou, ukuvelela umwe onthiki yatyo noola metyilingi. (Mat. 24:36) Ya onthiki yatyo oyo, matyikamoneka umwe nawa okuti atyiho Eliapu litendeleya Siovaa novanthu Vae, omatutu. Siovaa makapola-ko Satanasi na vana vetavela komatutu alio. Mahi Ngwe makakala nokankhenda novanthu vemufenda.

Pamwe Siovaa kamapoloko ovitateka aviho, mahi ngwe wati tupondola umwe okukala nehambu putyina tutwala-ko okukevelela. Isaiya wati onthwe tupondola umwe okukala nehambu putyina tukevelela otyipuka tyimwe otyiwa. (Isa. 30:18) a Opi tupondola okuvasa ehambu olio? Matutale ovipuka vikwana.

OITYI TUTILA TUPONDOLA OKUKALA NEHAMBU POKUKEVELELA?

Tala koviwa. Onondyale Mbohamba Ndaviti mbahandele umwe okumwipaa. (Ovii. 37:35) Ngwe wahoneka okuti: “Wahapopie natyike komaiho a Siovaa, kevelela vala kwe. Wahanumanene  omunthu, mokonda vala onomphango mbae onombi mbukahi nokweenda nawa.” (Ovii. 37:7) Ndaviti omutima wae weutomene vala meyovo lituka ku Siovaa. Ngwe amono oviwa ovinyingi, vituka kokukevelela. (Ovii. 40:5) Tusokei koviwa tulwete, atuhakalela vala okusoka kovivi, ine otyo tulinga otyo, matutwala-ko okukevelela ku Siovaa.

Lipaka mweevi vihivilika Siovaa. Tyipondola wahoneka Oviimbo 71, o Ndaviti, wapopilile Siovaa okuti: “Ame mandyitwalako okukevelela. Pahe mandyikuhivilika vali unene.” (Ovii. 71:14) Oñgeni Ndaviti ahivilikile Siovaa? Wapopilile vakwavo evi vinkhimaneka Siovaa, waimbile oviimbo vimumkhimaneka. (Ovii. 71:​16, 23) Nga Ndaviti, noonthwe tupondola okukala nehambu ine tukevelela ku Siovaa. Tutyilinga otyo putyina tweenda movilinga viokwivisa, no momatompho etu, nopokwimba oviimbo viokumuhivilika. Nanyo, tyina uli nokwimba oviimbo Viouhamba tehelela umwe nawa, unoñgonoke etyi vipopia.

Lipamekei na vakwenyi. Pweetyi Ndaviti eli movitateka wapopilile Siovaa ati: “Mandyikala ponthele yovanthu vove ovaviuki, andyikevelela kenyina liove, mokonda ewa.” (Ovii. 52:9) Onthwe katulipameka vala na vakwetu tufenda navo tyina tuli momaliongiyo, no movilinga viokwivisa, mahi tulipameka na vakwetu kese apa tuli. — Loma 1:​11, 12.

Pamena mweevi ukevela. Oviimbo 62:5 yati: “Mandyikala ponthele yovanthu vove ovaviuki, andyikevelela kenyina liove, mokonda ewa.” Tyesukisa umwe okupamena mweevi tukevelela momuvo uno wonthyulilo, namphila tyilinga ngoti tyaseta katutu. Twesukisa okukevelela noumpha-lundo kweetyi Siovaa apopia okuti metyilingi kamatyisete, tyihatale komuvo onthwe tuli-ale nokukevelela. Tupondola okupamena mweevi tukevelela putyina tulilongesa Ondaka ya Huku, nomaulo amwe apopiwa m’Ombimbiliya afwiswapo-ale naa ekahi nokufwiswa-po, na vimwe vilekesa oñgeni Siovaa ekahi. (Ovii. 1:​2, 3) Tupu twesukisa okwita ‘omphepo ikola’ ya Siovaa itukwatesako okutwalako noupanga wapama nae, putyina onthwe tukevelela, ngwe akamaneko ovipuka aviho ovivi. — Sunda 20, 21.

Ohamba Ndaviti, wali nonthumbi yokuti Siovaa makwatesako vana vayumba onthumbi molwembia Lwae olunene. (Ovii. 33:​18, 22) Pwa umwe elundo okevelela ku Siovaa otyo utala koviwa eli-ale nokukupa, nokumuhivilika, nokulipameka na vakwenyi, nokupamena mweevi ukevelela.