Kwonka, Yehova naayenda ngu tugumisirize tutegyereize kugira eki yaakora omu bwire obuhikire. Ahabw’enki naayenda ngu tutegyereze? Niki ekirikubaasa kutuhwera kutegyereza tushemereirwe?

AHABW’ENKI YEHOVA NAAYENDA NGU TUTEGYEREZE?

Baibuli neegira eti: ‘[Yehova] ategyereize ngu abagirire embabazi, kandi ngu abagirire esaasi; ahabw’okuba [Yehova] ni Ruhanga orikucwa emanja z’oburyo, abarikumutegyereza boona baine’ okushemererwa. (Isa. 30:18) Ebigambo bya Isaaya ebi bikahandiikirwa Abayudaaya abagomi. (Isa. 30:1) Kwonka omu Bayudaaya abo hariho abaagumire bari abeesigwa, kandi ebigambo ebyo bikaba nibibaha amatsiko. Ebigambo nibyo bimwe nibiha amatsiko abaheereza ba Yehova abeesigwa obunaku obu.

N’ahabw’ekyo twine kugumisiriza tutegyereize ahabw’okuba Yehova nawe naagumisiriza ategyereize. Akataho obwire obu emperu y’entebeekanisa y’obusingye obu eraabeho, kandi ategyereize izooba n’eshaaha obu biraahikye. (Mat. 24:36) Omu bwire obwo, nikiija kureebwa butunu ngu ebi Omuregi yaagambire ahari Yehova n’abaheereza be n’ebishuba. Naija kwihaho Sitaane na boona abarikumushagika, kwonka naija “kutugirira embabazi.”

Ekyo kitakabaireho, naabaasa kutaihaho oburemeezi, kwonka naatuhamiza ngu nitubaasa kutegyereza tushemereirwe. Nk’oku Isaaya yaagambire, nitubaasa kushemererwa tutegyereize ebintu birungi kubaho. (Isa. 30:18) Nitubaasa kugira tuta okushemererwa? Ka twetegyereze ebintu bina ebirikubaasa kutuhwera.

OKU ORIKUBAASA KUSHEMERERWA OTEGYEREIZE

Ta omutima aha birungi. Omugabe Daudi akareeba ebikorwa bibi bingi. (Zab. 37:35) Kwonka akahandiika ati: “Omutegyereze n’okugumisiriza; otemereza omutima ahabw’omuntu orikuhiirwa omu muhanda gwe, akahikiiriza enaama ze embi.” (Zab. 37:7) Daudi akagyendera aha buhabuzi obwo arikuteekateeka aha matsiko ge  g’okujunwa. Kandi akateekateeka n’aha migisha ei Yehova yaabaire amuhaire. (Zab. 40:5) Naitwe twata omutima aha birungi omu mwanya gw’okuguta aha bintu bibi ebirikubaho, nikitworobera kutegyereza Yehova.

Koresa buri mugisha kuhimbisa Yehova. Omuhandiiki wa Zaaburi 71, obundi owaabaire ari Daudi, akagambira Yehova ati: ‘[Ninyija] kuguma n’amatsiko obutoosha, nyeyongyere kukuhimbisa.’ (Zab. 71:14) Akaba naija kuhimbisa ata Yehova? Akaba naija kugambira abandi ebirikukwata ahari Yehova kandi arikweshongora eby’okumuhimbisa. (Zab. 71:​16, 23) Nka Daudi, nitubaasa kushemererwa tutegyereize Yehova. Nitumuhimbisa omu kubuurira, twaba nitugaaniira, na twaba nitweshongora ebyeshongoro by’okuramya. Omurundi ogundi waayeshongora ekyeshongoro ky’Obukama, ta omutima aha butumwa oburikushemeza oburi omu bigambo by’ekyeshongoro.

Gumibwa ab’eishe-emwe na banyaanyazi-itwe. Obu Daudi yaagira oburemeezi, akagira Yehova ati: ‘[Ninyija] kugamba eiziina ryawe omu maisho g’abarikwera baawe.’ (Zab. 52:9) Naitwe nitubaasa kugumibwa Abakristaayo bagyenzi baitu, ti mu bwire bw’enteerane bwonka nari omu kubuurira, kureka na twaba turi hamwe omu bwire bw’okweshemeza.—Rom. 1:​11, 12.

Hamya amatsiko gaawe. Zaaburi 62:5 nihagira hati: “Amagara gangye gacureera nigategyereza Ruhanga wenka, ahakuba niwe amatsiko gangye garugaho.” Amatsiko gahami nigatwariramu okutegyereza twine obwesigye, kandi ekyo ni kikuru twaba turi ab’okugumisiriza entebeekanisa y’obusingye obu ei tutarikumanya obu eraahendere. Twine kugira obwesigye ngu Yehova naija kuhikiiriza ebi yaaraganiise, n’obu turaabe twine kubitegyereza kumara obwire buraingwa. Nitubaasa kwongyera kuhamya amatsiko gaitu turikweyegyesa ebiri omu Kigambo kya Ruhanga nk’obunabi, oku ebiri omu Baibuli birikuhikaana, n’obushonshorekye oburikukwata ahari Yehova. (Zab. 1:​2, 3) Kandi, twine kugumizamu nitushaba omwoyo gurikwera kutuhwera kuguma twine omukago murungi na Yehova, obwo tutegyereize ekiraganiso kye ky’amagara agatahwaho kuhikiirira.—Yud. 20, 21.

Gira obwesigye nk’Omugabe Daudi, ngu Yehova naareeba abarikumutegyereza, kandi naabagirira rukundo etarikuhwaho. (Zab. 33:​18, 22) Gumizamu otegyereize Yehova orikuta omutima aha bintu birungi ebirikubaho, orikumuhimbisa, orikugumibwa ab’eishe-emwe bagyenzi baawe, kandi orikugumizamu noohamya amatsiko gaawe ag’omuhendo.