Maa Ɛ Nye Ɛlie Wɔ Mekɛ Mɔɔ Ɛlɛsi Abotane Wɔahendɛ Gyihova La
Ɛ NYE la mekɛ mɔɔ Gyihova baye amumuyɛyɛlɛ kɔsɔɔti avi ɛkɛ na yeayɛ ninyɛne kɔsɔɔti fofolɛ la ade ɔ? (Yek. 21:1-5) Yɛze kɛ ɛ nye la ye ade! Noko tɛ dahuu biala a ɔla aze kɛ yɛbazi abotane yɛahendɛ Gyihova a, titili, saa yɛlɛyia ngyegyelɛ a. Anyelazo mɔɔ ɔkyɛ na yeara nu la kola maa ahonle ne anwo to ye.—Mrɛ. 13:12.
Noko Gyihova kulo kɛ yɛsi abotane yɛkendɛ ye yɛmaa ɔdi ninyɛne nwo gyima wɔ ye mekɛ kpalɛ nu. Duzu ati a ɔkulo kɛ yɛyɛ ye zɔ a? Duzu a bahola aboa yɛ yeamaa yɛ nye alie wɔ mekɛ mɔɔ yɛlɛkendɛ la ɛ?
DUZU ATI A GYIHOVA KULO KƐ YƐKENDƐ A?
Baebolo ne se: “Gyihova ɛlɛfa abotane ahendɛ kɛ ɔboa bɛ, na ɔbamaa ɔ nwo zo yeaze bɛ anwunvɔne. Ɔluakɛ Gyihova le pɛlepɛle Nyamenle. Anyelielɛ a le menli kɔsɔɔti mɔɔ bɛ nye la ɔ nwo zo la.” (Aye. 30:18) Bɛlimoale bɛhɛlɛle edwɛkɛ ɛhye bɛmaanle Dwuuma mɔɔ bɛ nzo yɛ se la. (Aye. 30:1) Noko ɛnee Dwuuma ne bie mɔ di nɔhalɛ, na edwɛkɛ ɛhye mɔ maanle bɛnyianle anyelazo. Edwɛkɛ ko ne ala maa Gyihova azonvolɛ nɔhavoma mɔɔ wɔ ɛkɛ ɛnɛ la noko nyia anyelazo.
Ɔti ɔwɔ kɛ yɛsi abotane yɛkendɛ ɔluakɛ Gyihova ɛlɛsi abotane ahendɛ. Yekpa mekɛ mɔɔ ɔbava yeazɛkye ewiade ɛhye a, na ɔlɛkendɛ yeamaa zɔhane kenle ne nee dɔnehwele ne adwu. (Mat. 24:36) Wɔ zɔhane mekɛ ne, awie biala banwu ye wienyi kɛ edwɛkɛ mɔɔ Abɔnsam hanle ye wɔ Gyihova nee menli mɔɔ sonle Ye la anwo la le adalɛ. Akee ɔbaye Seetan nee awie biala mɔɔ wɔ ye afoa la yeavi ɛkɛ, noko ɔbaze “yɛ anwunvɔne.”
Noko kɔkpula kɛ zɔhane mekɛ ne bara la, bie a Gyihova ɛnrɛye yɛ sɔnea ne mɔ ɛnrɛvi ɛkɛ, noko yemaa yɛnyia anwodozo kɛ yɛ nye bahola alie wɔ mekɛ mɔɔ yɛlɛkendɛ la. Kɛ mɔɔ Ayezaya hanle la, saa yɛ nwo ɛlɛdɔ debie anzɛɛ yɛ nye la debie kpalɛ bie ade ɛsesebɛ a, yɛ nye bahola alie. (Aye. 30:18) a Kɛ ɔkɛyɛ na yɛanyia zɔhane anyelielɛ ne ɛ? Ninyɛne nna bie bahola aboa yɛ.
NINYƐNE MƆƆ ƐYƐ A Ɛ NYE BALIE WƆ MEKƐ MƆƆ ƐLƐKENDƐ LA
Fa wɔ adwenle sie ninyɛne mgbalɛ zo. Belemgbunli Devidi nwunle amumuyɛyɛlɛ dɔɔnwo wɔ ye ɛbɛlabɔlɛ nu. (Edw. 37:35) Noko ɔhɛlɛle kɛ: “Yɛ koonwu wɔ Gyihova anyunlu na si abotane kendɛ ye. Mmagyegye ɛ nwo wɔ sonla mɔɔ kola di ye adwenle ɛtane mɔɔ ɔkɛbɔ anwo gyima la anwo.” (Edw. 37:7) Devidi mumua ne vale zɔhane folɛdulɛ ne lile gyima na ɔvale ye adwenle ɔziele anyelazo mɔɔ ɛnee ɔlɛ kɛ bɛbalie ye la azo. Eza ɔ nye zɔle nyilalɛ mɔɔ ɔnyianle ɔvile Gyihova ɛkɛ la. (Edw. 40:5) Saa yɛdayɛ noko yɛfa yɛ adwenle yɛsie ninyɛne mgbalɛ mɔɔ kɔ zo wɔ yɛ ɛbɛlabɔlɛ nu la azo na yɛammaa ninyɛndane mɔɔ ɛlɛkɔ zo la ando yɛ ɛbɔ nu a, ɔnrɛmaa ɔnrɛyɛ se kɛ yɛbahendɛ Gyihova.
Fa nwolɛ adenle biala mɔɔ ɛbanyia la ye Gyihova ayɛlɛ. Devidi mɔɔ ɔbayɛ kɛ ɔdaye a ɔhɛlɛle Edwɛne 71 ne la hanle hilele Gyihova kɛ: “Na mame, mebahɔ zo meahendɛ; mebaye wɔ ayɛlɛ meadɛla dɛba ne.” (Edw. 71:14) Kɛzi ɔbayɛ ye ɛ? Ɔbaha Gyihova anwo edwɛkɛ yeahile awie mɔ na yeado ayɛlɛyelɛ edwɛne yeamaa ye. (Edw. 71:16, 23) Saa yɛlɛkendɛ Gyihova a, yɛ nye bahola alie kɛ Devidi la. Yɛdua yɛ ɛzonlenlɛ gyima ne, adwelie mɔɔ yɛ nee awie mɔ di ye dahuu nee edwɛne mɔɔ yɛto la azo yɛye ye ayɛlɛ. Mekɛ biala mɔɔ ɛlɛto Belemgbunlililɛ edwɛne bie la, duzu ati a ɛndie nuhua edwɛkɛ ne kpalɛ na ɛnnea kɛzi ɔmaa ɛ nye die la ɛ?
Maa ɛ mediema ɛmaa wɔ anwosesebɛ. Mɔɔ Devidi yiale ngyegyelɛ la, ɔhanle ɔhilele Gyihova kɛ: “Wɔ wɔ nɔhavoma ne anyunlu, mebava me nye meado wɔ duma ne azo.” (Edw. 52:9) Yɛ mediema mɔɔ bɛdi nɔhalɛ la bahola amaa yɛ anwosesebɛ wɔ debiezukoalɛ bo nee daselɛlilɛ nu, yɛɛ mekɛ gyɛne mɔɔ yɛ nee bɛ babɔ nu alielie yɛ nye la.—Wlo. 1:11, 12.
Mia wɔ anyelazo ne anu. Edwɛne 62:5 ka kɛ: “Mebayɛ koonwu meahendɛ Nyamenle ɔluakɛ me nye la ɔ nwo zo.” Ɔhyia kɛ yɛbanyia anyelazo kpole, titili saa awieleɛ ne amba wɔ mekɛ mɔɔ yɛsuzu kɛ ɔbara la a. Ɔwɔ kɛ yɛdie yɛdi kɛ, ɔnva nwo mekɛ tendenle biala mɔɔ ɔwɔ kɛ yɛfa yɛkendɛ la, Gyihova ɛwɔkɛ ne mɔ bara nu. Saa yɛsukoa Nyamenle Edwɛkɛ ne—ngapezo ne mɔ, kɛzi nuhua edwɛkɛ ne le ko nee ɔdaye Gyihova mumua ne ɔ nwo edwɛkɛ dɔɔnwo mɔɔ yemaa yɛnwu ye la a, yɛ anyelazo ne anu bahola amia. (Edw. 1:2, 3) Eza ɔhyia kɛ ‘yɛdua sunsum nwuanzanwuanza ne azo yɛyɛ asɔne’ amaa yɛ nee Gyihova agɔnwolɛvalɛ ne ahɔ zo adɛnla ɛkɛ wɔ mekɛ mɔɔ yɛlɛkendɛ kɛ dahuu ngoane nwo ɛwɔkɛ mɔɔ yebɔ la bara nu la.—Dwu. 20, 21.
Kɛ mɔɔ Belemgbunli Devidi yɛle la, nyia anwodozo kɛ Gyihova anye wɔ bɛdabɛ mɔɔ bɛkendɛ Ye la anwo zo na ɔda Ye ɛlɔlɛ kpundii ne ali ɔkile bɛ. (Edw. 33:18, 22) Fa wɔ adwenle sie ninyɛne mgbalɛ mɔɔ ɛlɛkɔ zo wɔ wɔ ɛbɛlabɔlɛ nu la azo, ye Gyihova ayɛlɛ, maa ɛ mediema Alasevolɛ ɛboa wɔ na mia wɔ anyelazo ne anu, ɛhye mɔ bamaa wɔahɔ zo wɔazi abotane wɔahendɛ Gyihova.
a Aneɛ mɔɔ bɛlimoale bɛvale bɛhɛlɛle edwɛkɛ mɔɔ bɛhile ɔ bo kɛ “ɛ nye la ye ade” la eza kola kile kɛ “ɛ nwo ɛlɛdɔ debie anzɛɛ ɛlɛ anyelazo kɛ debie bazi,” na ɛhye kile kɛ ɔnle nvonleɛ kɛ yɛ nwo ɛlɛdɔ yɛ ngoanelielɛ ne la.
