Kerewo, Jɛhova ɛmadɛɛ̄ kɔ i egerebu tɔɔ̄baɛ sɔ̄ alɛ edoo dogo. Ena anua a ɛmadɛɛ̄ kɔ i doo wo a? Ena edap i yerebah nɛ kɔ i kiisī lo e’ɛrɛ ɛɛbu sɔ̄ i gaa ye tɔɔ̄baɛ ani?

ENA ANUA JƐHOVA ƐMADƐƐ̄ KƆ I TƆƆ̄ YE BAƐ A?

Baibol kɔ: “Jɛhova gaa le tɔɔ̄baɛ loo e’ɛrɛ i ewonu loo; nyɔɔbee wo a dana loo ye nɛ nyɔɔ loo e’ɛrɛ i toesaɛ̄ loo. Nyɔnɛbee Jɛhova lu Bari loo kaāna biaɛ; leelee a le nɛ dɛ̄dɛɛ̄ pya a ye tɔɔ̄baɛ.” (Ais 30:18) Taɛ pya nɛɛ Aizaia aa bee kɔ pya ue ama nɛ na pya Juu a bee erabee. (Ais 30:1) Mɛ a ɛrɛ pio pya a bee bɔ ture nyiɛ loo a bee le yɛɛ pya Juu ama, e pya ue ama bee wa nɛ bɛābu. Pya ue ama nɛnage bɛābu pya nɛɛ Jɛhova lo ba tɔɔ̄ agara anii’ee.

Nyɔɔwo, i ɛrɛ e’egerebu tɔɔ̄baɛ dookɛ̄ Jɛhova aa egerenagebu tɔɔ̄baɛ doo. A ɛrɛ taɛ sɔ̄ alɛ bee sere lo emmɛ kuma loo lo sɔ̄ nyɔuwe ama, e a gaa tɔɔ̄baɛ taɛ dee le awa edoo wo. (Mat 24:36) Lo sɔ̄ dɛ̄dɛɛ̄ nɛɛ emuɛ kɔ pya ue lo Pɔrɔ-edɔɔ̄ bee dɛrɛ Jɛhova le pya a ye taāŋabah lu esah. A gaa le lɛɛ Setan le ɛrɛgebah nɛɛ a ye yerekpotɛ̄, mɛ “e’ɛrɛ i toesaɛ̄ loo.”

Jɛhova naale elɛɛ i taāŋa a taɛ nyaawo, mɛ a doo kɔ i suā kɔ i dap ɛrɛ ɛɛbu kuma sɔ̄ i gaa tɔɔ̄baɛ. Dookɛ̄ Aizaia kɔ doo, i dap ɛrɛ ɛɛbu sɔ̄ i gaa ɛmadɛɛ̄ lenu esira aabu nu i bɛābu. (Ais 30:18) a Bu mɛ sīdee na i dap ɛrɛ ɛɛbu ama a? A ɛrɛ nia nu a i dap yerebah nɛ.

KƐ̄ E’ƐRƐ ƐƐBU DOO SƆ̄ I GAA TƆƆ̄BAƐ

Ɛrɛ ekɛɛrɛ nyɔɔ pya lenu esira a loo bu dum. Mɛnɛ Devid bee muɛ gbɛnɛ-edo bag dogo pya nɛɛ doo bu dɛ̄dɛɛ̄ sɔ̄ a bee le dum. (Yɔɔ 37:35) E a bee ɛm kɔ: “Tɔɔ̄ bu efɛɛloo kɛ̄sī Jɛhova, sa su egerebu ye tɔ̄ma baɛ; o aa doo lo o saŋ bɛamiā nyɔɔbee nɛɛ nu lee loo bu ye dee, nyɔɔ nɛɛ a ɛrɛ pɔrɔ ekɛɛrɛ alu keekee!” (Yɔɔ 37:7) Devid bee su zuurabahtɔ̄ ama tɛ̄maloo ebie ekɛɛrɛ nyɔɔ yii Jɛhova yira kɔ ekpɔāe ye. A bee yerenage nukuādɛɛ̄ loo dɛ̄dɛɛ̄ leelee lo a bee ɛrɛ aābah Jɛhova. (Yɔɔ 40:5) Lo ili bienage  ekɛɛrɛ nyɔɔ pya lele nu a i siraloo bu dum, sa ii bialoo kɛɛrɛbu loo pya pɔrɔ pɔrɔ nu a gaa sira, edoo kɔ a waɛ i bah lo etɔɔ̄baɛ Jɛhova.

Su ɛrɛgebah dee a a kpaānɛ kɔā nu akiiloo Jɛhova. Naadaba Devid na alu nɛɛ a bee ɛm kpa Le-yɔɔ 71 ekobee a. A bee kɔ nɛ Jɛhova kɔ: “Olo na mdaa bɛābu a, e m leera a sa a sinagekɛ̄ leera.” (Yɔɔ 71:14) Bu mɛ sīdee na a bee leera Jɛhova a? A bee kɔ nu akiiloo Jɛhova nɛ pya dɔɔ̄na sa ye uɛ yɔɔ leera nɛ. (Yɔɔ 71:16, 23) Doodoo Devid, i dap ɛrɛ ɛɛbu sɔ̄ i aa tɔɔ̄baɛ Jɛhova. I leera ye tɛ̄maloo i tam zue ue, pya ue i yɔ pya nɛɛ kɔnia ziī ziī dee, le sɔ̄ i uɛ pya i yɔɔ Buɛ̄-mɛnɛ. Dɔɔ̄na sɔ̄ o sikɛ̄ uɛ yɔɔ Buɛ̄-mɛnɛ, kɛɛrɛbu loo pya bee bee ue a le bu sa ɛp kɛ̄ a a tɔaloo doo.

Ɛrɛ mɛm aāloo pya o wuga nɛɛdam le nɛɛwa tɛ̄maloo etɔɔ̄ wa kpaɛ̄. Sɔ̄ Devid bee kpesī e’aga kɛ̄tɔɔ̄, a bee kɔ nɛ Jɛhova kɔ: “M gaa le tɔɔ̄baɛ o bee nyɔnɛbee a lee, kɛ̄sī pya o kaɛ.” (Yɔɔ 52:9) Ili dapnage ɛrɛ mɛm aāloo pya i wuga lo i gaa gbaa taāŋabah Bari, naale aba bie enɔānu le uwe zue ue, mɛ sɔ̄ i gaa gbaa ɛrɛ ekpeloo.—Rom 1:11, 12.

Agɛrɛtɛ̄ o bɛābu. Le-yɔɔ 62:5 kɔ: “Aba Bari na mdaa piogi tɔɔ̄baɛ bu ubɛpiī a.” Lu ebɛɛ̄ kɔ i agɛrɛtɛ̄ i bɛābu eetɔɔ̄ na lo a le kuma naa lu sɔ̄ i bee ɛmadɛɛ̄. I ɛrɛ eyiga kaāna kɔ pya yii Jɛhova yira ɛrɛ edooa kaɛlɛɛ kɛ̄ i etɔ̄na baɛ doo. I dap agɛrɛtɛ̄ i bɛābu tɛ̄maloo enɔ Muɛ̄ Ue Bari doodoo pya mɔmanudɛɛ̄ Baibol, kɛ̄ ue a le bu gbaaloo ziī doo, le pya nu Jɛhova muūna akiiloo aba ɛɛ. (Yɔɔ 1:2, 3) Gbaāloo wo, i kiinagesī lo “[etaāŋa] bu kaɛ edɔɔ̄” lokwa i dap kiisī lo e’ɛrɛ le gbanialoo kumaloo Jɛhova kuma sɔ̄ i aa tɔɔ̄baɛ kɔ ye yii akiiloo dum anaatah edooa.—Jud 20, 21.

Doodoo Mɛnɛ Devid, dɛrɛ nyiɛ nyɔɔ kaāna kɔ Jɛhova kuūdɛɛ̄loo pya a ye tɔɔ̄baɛ sa tɔgɛ ye wereloo a naa wee nyaa wa kumaloo. (Yɔɔ 33:18, 22) Kiisī lo e’egerebu tɔɔ̄baɛ Jɛhova tɛ̄maloo ebie ekɛɛrɛ nyɔɔ pya lele nu a gaa a siraloo bu dum, ye leera, le tɛ̄maloo e’ɛrɛ mɛm aāloo pya dɔɔ̄na wuga nɛɛdam le nɛɛwa ba lu Pya Ekeebee sa agɛrɛtɛ̄ o bɛābu a kuī.